Read sango 2 Mbai 31 Bible Online

2 Mbai 31 - sango bible

2 Mbai 31

¹So matanga ni ahunzi awe, azo ti Israel so kue ayeke kâ ague na ya ti agbata ti Juda, ala fâ ya ti angbongboro têne so a leke si aluti na nduzu, ala kungbi na sese akeke so a leke si aluti na nduzu ndali ti nzapa-wali *Ashera, ala buba ando so azo aleke na ndö ti ahoto ti voro anzapa nde daa, ala buba nga agbalaka ti ando ni. Ala sara gi oko ye so na sese ti Juda kue, ti Benjamin, ti Efraim na ti Manase. Na pekoni, azo ti Israel kue akiri na ya ti agbata ti ala, zo oko oko na ndo ti lo.

²Ezekias azia na sese abongbi nde nde ti awayango-sandaga na ti azo ti mara ti Lévi. Na ya ti abongbi ni so, lo zia zo oko oko na yanga ti kua ti lo. Kua ti awayango-sandaga na ti azo ti mara ti Lévi ayeke ti ya *asandaga so a yeke gbi ni kue na wâ na asandaga ti beoko, kua ti hengo bia ti mungo singila na Nzapa na ti sepelango Nzapa na ya ti gbagba ti kota da ti *KOTA GBIA.

³Gbia amu mbage ti aye ti lo na sandaga so a yeke gbi ni kue na wâ, so ti tene asandaga ti ndaperere na ti lakui, ti *lango ti wungo tere, ti fini nze na ti ambeni matanga, alingbi na tënë so a su na ya ti mbeti ti *Ndia ti KOTA GBIA.

⁴Gbia amu yanga na azo so ayeke lango na Jérusalem ti mu ye so ayeke ti awayango-sandaga na ti azo ti mara ti Lévi na ala, tongaso si ala zia be ti ala kue na akua so Ndia ti KOTA GBIA afa.

⁵Gi so azo ti Israel ama yanga so gbia amu so, ala ga na gba ti akozo le ti kobe ti ala: *ble, fini vin, mafuta, mafuta ti wotoro nga na akobe nde nde ti ayaka ti ala. Ala ga nga na gba ti *dime ti aye kue.

⁶Azo ti Israel na azo ti Juda so ayeke lango na ya ti agbata ti Juda aga nga na dime ti abagara, ti ataba na ti angasa. Ala ga nga na dime ti aye so a zia nde ndali ti KOTA GBIA, Nzapa ti ala; ala bongbi aye ni na gba ni, na gba ni.

⁷Ala to nda ti bongbi aye ni na gba ni, na gba ni na nze ota ni, ala hunzi ni na nze mbarambara ni.

⁸Ezekias na amakonzi aga ti baa aye so a bongbi ni na gba ni, na gba ni so; ala mu singila na KOTA GBIA, ala gonda nga azo ti Israel.

⁹Ezekias ahunda awayango-sandaga na azo ti mara ti Lévi ndali ti aye so azo abongbi ni na gba ni, na gba ni so.

¹⁰Kota wayango-sandaga Azaria, zo ti kete mara ti Sadok akiri tënë na lo, atene: “Aye so azo azi na ndö ti aye so ala wara si ngbene ye, ala to nda ti ga na ni na ya ti kota da ti KOTA GBIA, e te kobe, ya ti e asi, e zia tanga ni angba gbani, ngbanga ti so KOTA GBIA asara tufa na ndö ti azo ti lo. Gba ni laa angba ge ahon ndoni so.”

¹¹Ezekias amu yanga titene ala leke akubu na ya ti kota da ti KOTA GBIA ti bata aye ni daa. Tongaso ala leke akubu ni.

¹²Aye so azo azi na ndö ti ye so ala wara, adime na aye so ala zia nde ndali ti Nzapa, ala ga na ni lakue na legeni na ya ti akubu ni. Konania, zo ti mara ti Lévi laa ayeke makonzi na ndö ti aye ni. Ita ti lo Shimei laa ayeke use makonzi ni.

¹³Gbia Ezekias na kota wayango-sandaga Azaria, makonzi ti kota da ti Nzapa, amu yanga si Yehiel, Azazia, Nahat, Asael, Yerimot, Yozabad, Eliel, Ismakia, Mahat na Benaya abaa ndo na ndö ti aye ni, na gbe ti Konania na ita ti lo Shimei.

¹⁴Kore, molenge ti Imna, zo ti mara ti Lévi, zo ti batango yanga ti gbagba na mbage ti To, ayeke baa lege ti aye so azo amu na be ti ala wani na Nzapa. Aye so azo azi na ndö ti aye so ala wara si ala zia nde ndali ti KOTA GBIA nga na aye so ayeke nde si ayeke nzoni kue ahon atanga ni, lo laa lo yeke kangbi ni.

¹⁵Na ya ti agbata ti awayango-sandaga, azo so ayeke sara kua na gbe ti lo ayeke Eden, Miniamin, Yeshua, Shemaya, Amaria na Shekania. Ala laa ayeke kangbi aye lakue na legeni na popo ti a-ita ti ala, ataa akota zo wala akete zo, na lege ti bongbi ti kua ti azo ni.

¹⁶Ala yeke mu aye ni na azo so kue a su iri ti ala na mbeti, ti londo na amolenge-koli so ngu ti ala alingbi ngu ota na ala so ngu ti ala ahon ngu ota. Ala yeke mu nga aye ni na azo so kue ayeke li na ya ti kota da ti KOTA GBIA na ya ti lango oko oko ti sara kua ti ala alingbi na lango ti kua ti ala ni, na lege ti bongbi ti ala.

¹⁷A su iri ti awayango-sandaga na mbeti na lege ti asewa ti ala. Azo ti mara ti Lévi so ngu ti ala alingbi baleuse wala ahon baleuse, a su iri ti ala na mbeti na lege ti kua ti ala nga na lege ti bongbi ti ala.

¹⁸A su iri ti azo ni kue na mbeti, ala na azo ti sewa ti ala, awali ti ala, amolenge ti ala ti koli na ti wali nga na tanga ti azo ti sewa ti ala so kue alingbi ti te aye so a zia nde ndali ti Nzapa.

¹⁹Ambeni wayango-sandaga so ayeke *ahale ti Aaron aduti na ayaka so ayeke na tere ti agbata ti ala. Na ya ti gbata oko oko, a soro ambeni zo ti kangbi aye ni na akoli so kue angba na yaka si ala yeke na popo ti awayango-sandaga nga na azo ti mara ti Lévi so kue a su iri ti ala na mbeti.

²⁰Ye so Ezekias asara na ya ti kodro-gbia ti Juda kue laa. Lo sara ye so ayeke nzoni, ye so ayeke mbirimbiri na ye so ayeke na legeni na le ti KOTA GBIA, Nzapa ti lo.

²¹Kua so lo sara ndali ti kota da ti Nzapa, kua so lo sara titene azo abata ndia ti Nzapa na atënë ti ndia ti lo, lo sara ni na be ti lo kue, lo gi Nzapa ti lo si ye ti lo kue aga nzoni.