Read sango 2 Mbai 32 Bible Online

2 Mbai 32 - sango bible

2 Mbai 32

¹Na peko ti aye ti mbirimbiri so Ezekias asara na mbage ti Nzapa, Senakerib, gbia ti Asirii ali na kodro-gbia ti Juda; lo ngoro agbata so a sara ngangu gbagba na tere ni si lo ye ti li na ya ti agbata ni na ngangu.

²So Ezekias abaa Senakerib ayeke ga ti tiri bira na gbata ti Jérusalem,

³lo ma tere na amakonzi ti lo nga na aturugu ti lo ti kota kamba ti kanga lege na li ti ngu so ayeke na mbage ti gigi ti gbata ni. Azo ni kue ayeda na tënë ti lo.

⁴Azo gbani gbani abongbi tere si ala kanga ali ti ngu kue nga na kete ngu so ayeke sua na ya ti kodro ni. Ala tene: “Tongana azo ti Asirii asi, ayeke nzoni ala wara gba ti ngu pepe.”

⁵Ezekias awara ngangu si lo kiri lo leke gbagba ti gbata ni na ando so adu akoro daa. Ada so ayo na nduzu, lo kiri lo leke ni titene ayo na nduzu ahon ti kozoni; lo sara mbeni gbagba nde na gigi ti kozo gbagba ni; lo leke nga ndo so iri ni Milo so ayeke na Gbata ti David; lo mu yanga si a sara na lo gba ti aye ti bira na *avala.

⁶Na pekoni, lo zia amakonzi ti aturugu na li ti azo ti gbata ni. Lo bongbi azo kue na kota le ti kodro so ayeke nduru na yanga ti gbata ni si lo mu wango na ala, lo tene:

⁷“Ala gbu ngangu, ala kanga be ti ala! Ala sara mbeto pepe, ala do na mbeto pepe na dawa ti gbia ti Asirii na gba ti azo so amu peko ti lo so. Biani, ngangu so ayeke na e ayeke mingi ahon ti lo.

⁸Ngangu ti gbia ni ayeke gi ngangu ti zo; me ngangu ti e ayeke KOTA GBIA, Nzapa ti e so ayeke mu maboko na e si lo yeke tiri bira ndali ti e.” Azo ni aluti na ndö ti tënë ti Ezekias, gbia ti Juda.

⁹Na pekoni, so Senakerib, gbia ti Asirii na aturugu ti lo angba ti ala na Lakish, lo tokua ambeni turugu ti lo na gbia Ezekias nga na azo ti Juda so kue ayeke na Jérusalem, lo tene:

¹⁰“Tënë so Senakerib, gbia ti Asirii atene ayeke so: ‘Ala zia be ti ala na ndö ti nyen si ala ngba ti duti na Jérusalem so a ngoro ni kue na bira awe so?

¹¹Ezekias ayeke tene na ala atene, fade *KOTA GBIA, Nzapa ti ala ayeke zi ala na maboko ti gbia ti Asirii. Me lo yeke handa ala titene nzara ti kobe na nzara ti ngu afâ ala!

¹²Ando so azo aleke na ndö ti ahoto ti voro KOTA GBIA daa, na agbalaka ti lo, Ezekias laa azi ni pepe? Lo laa lo tene na azo ti Juda nga na azo ti Jérusalem ti voro KOTA GBIA gi na dawa ti gbalaka oko so, ti zö dukani gi na ndö ti oko gbalaka ni pepe?

¹³Ye so mbi na ababâ ti mbi, e sara na azo ti akodro kue so, ala hinga pepe? Anzapa ti azo ti amara so awara ngangu ti zi akodro ti ala na maboko ti mbi?

¹⁴Na popo ti anzapa so kue ababâ ti mbi afâ azo ti ala kue kue kue so, nzapa wa laa awara ngangu ti zi azo ti lo na maboko ti ababâ ti mbi si fade nzapa ti ala alingbi ti zi ala na maboko ti mbi?

¹⁵Fadeso, ala zia Ezekias ahanda pepe, lo pusu ala na ya ti ye tongaso pepe! Ala zia be ti ala na ndö ti lo pepe, ngbanga ti so mbeni nzapa oko ti amara nde wala ti mbeni kodro-gbia alingbi ti zi azo ti lo na maboko ti mbi wala na maboko ti ababâ ti mbi pepe. Biani, fade nzapa ti ala ayeke zi ala na maboko ti mbi pepe.’ ”

¹⁶Azo ti kua ti Senakerib angba ti tene sioni tënë na tere ti KOTA GBIA nga na tere ti Ezekias, zo ti kua ti lo.

¹⁷Senakerib atokua mbeti ti zonga *KOTA GBIA, Nzapa ti Israel. Lo tene na ya ti mbeti ni, lo tene: “So anzapa ti amara nde azi azo ti ala na maboko ti mbi pepe so, fade nzapa ti Ezekias ayeke zi nga azo ti lo na maboko ti mbi pepe.”

¹⁸Azo ti kua ti Senakerib adekongo ngangu na yanga ti hebro na azo ti Jérusalem so aduti na ndö ti gbagba; ala ye ti zia mbeto na be ti azo ni, ti woko be ti ala si azo ti Senakerib awara lege ti mu kodro ni.

¹⁹Ala yeke tene tënë ti Nzapa ti Jérusalem tongana ti so azo ayeke tene tënë ti anzapa ti amara nde so azo asara ni na maboko ti ala.

²⁰Gbia Ezekias na wayanga-Nzapa Ésaïe, molenge ti Amoz asambela Nzapa ti yayu, ala dekongo na lo titene lo mu na ala maboko.

²¹Tongaso *KOTA GBIA atokua mbeni *ange so afâ ya ti bâbâ ti gbia ti Asirii, akpengba zo ti bira kue, aturugu ti kota kamba, na akota zo ti lo. Gbia ti Asirii ni akiri na kodro ti lo, na kamene na le ti lo. Na pekoni, lo li na ya ti da ti nzapa ti lo si taa amolenge ti lo laa afâ lo na yongoro zeme.

²²Tongaso laa KOTA GBIA asoo Ezekias na azo ti Jérusalem na kuâ, na maboko ti Senakerib, gbia ti Asirii nga na maboko ti awato ti ala kue. Na pekoni, lo mu na ala siriri mbage na mbage kue.

²³Azo mingi aga na Jérusalem ti mu aye na KOTA GBIA, ala ga nga na apendere kadoo na Ezekias, gbia ti Juda. Na peko ti aye so asi so, amara kue ane Ezekias mingi.

²⁴Na ngoi ni so, tere ti Ezekias aso nduru na kuâ. Lo sambela *KOTA GBIA si KOTA GBIA akiri tënë na lo na lege ti mbeni ye so afa atene, fade kobela ti lo ayeke kai.

²⁵Me Ezekias ahinga pepe nzoni so KOTA GBIA asara na lo. Baba ahon ndö ti lo si ndali ti baba ni, lo sara si ngonzo ti KOTA GBIA ati na ndö ti lo, na ndö ti kodro-gbia ti Juda nga na ndö ti gbata ti Jérusalem.

²⁶Me ataa so Ezekias asara fade baba, lo na azo ti Jérusalem asara tere ti ala kete. Nilaa na ngoi so Ezekias ade na fini, ngonzo ti KOTA GBIA ati na ndö ti ala pepe.

²⁷Ezekias awara mosoro mingi, azo agonda lo mingi. Lo bongbi amosoro ti wen ti nginza, ti lôro, ti atêne ti ngangu ngere, ti ayombo, ti *avala na mara ti aye nde nde ti ngangu ngere.

²⁸Lo sara ada ti batango na *ble, vin na mafuta; lo sara agbagba ti batango na mara ti anyama nde nde; lo vo anyama ti zia ala na ya ti agbagba ni.

²⁹Lo leke agbata ndali ti lo si lo yeke na gba ti ataba, angasa na abagara, ngbanga ti so Nzapa amu na lo mosoro gbani gbani.

³⁰Ezekias nga laa akanga lege na li ti ngu ti Gihon na mbage ti nduzu ti sua; lo zi lege ni titene asua ti gue na gbeni na mbage ti Do, na Gbata ti David. Aye so kue Ezekias asara aga nzoni.

³¹Me tongana amakonzi ti Babilone atokua azo na Ezekias titene ala hunda tënë ti ye ti dongo be so asi na ya ti kodro ti lo, Nzapa ado Ezekias azia lo ti tara be ti lo, tongaso si lo hinga ye so kue ayeke na be ti Ezekias.

³²Tanga ti atënë na ndö ti Ezekias, a su tënë ni na ya ti mbeti so iri ni “Aye so wayanga-Nzapa Ésaïe, molenge ti Amoz, abaa na ya ti mbeni ye tongana bango-li”; a su nga tënë ni na ya ti “Mbeti ti agbia ti Juda na ti Israel”. Ambeti ni atene tënë na ndö ti lege so lo bata be ti lo na Nzapa.

³³Ezekias akui, lo hon na peko ti ababâ ti lo, a lu lo na ndo so a yeke lu *ahale ti David daa, na mbage ti nduzu; azo ti Juda kue na azo ti Jérusalem amu nengo na kuâ ti lo. Molenge ti lo Manase laa aga gbia na peko ti lo.