Read sango 2 Mbai 33 Bible Online

2 Mbai 33 - sango bible

2 Mbai 33

¹Manase ayeke na ngu baleoko na use si lo ga gbia; lo le-gbia ngu baleoku na oku na Jérusalem.

²Lo sara ye so ayeke sioni na le ti *KOTA GBIA. Lo mu gi peko ti sioni sarango ye ti amara so KOTA GBIA atumba ala na ya ti kodro ni si lo mu kodro ni na azo ti Israel; sioni sarango ye so zo alingbi ti baa na le ti lo fani use pepe.

³Ando so azo aleke na ndö ti ahoto ti voro anzapa nde daa, babâ ti lo Ezekias abuba ni kue; me Manase akiri aleke ni. Lo sara agbalaka ndali ti anzapa *Baal, lo leke akeke aluti na nduzu ndali ti nzapa-wali *Ashera; lo kuku na gbe ti aye mingi mingi so ayeke na le ti nduzu si lo sara na ala.

⁴Lo sara agbalaka ndali ti anzapa nde na ya ti kota da ti KOTA GBIA na Jérusalem, da so KOTA GBIA atene tënë ndali ni, atene: “Fade iri ti mbi yeke duti kâ kpu na kpu.”

⁵Lo leke agbalaka na ya ti agbagba use ti kota da ti KOTA GBIA ndali ti aye mingi mingi so ayeke na le ti nduzu.

⁶Lo gbi amolenge ti lo ti koli na wâ ti mu na *sandaga na ndo so ayeke na popo-hoto ti Hinom; lo gi nda ti aye, lo sara mazi, lo sara yoro; lo zia azo titene ala hunda yingo ti akuâ si ala fa nda ti aye so ayeke na hondengo ni. Lo kiri lo sara sioni so ague guengo na nduzu ti ke KOTA GBIA, ye so azia ngonzo na be ti lo.

⁷Lo sara yanda si lo zia ni na ya ti kota da ti Nzapa. Andaa Nzapa atene ando na David nga na molenge ti lo Salomon, atene: “Na ya ti kota da so nga na Jérusalem, gbata so mbi soro na popo ti agbata ti amara kue ti Israel laa mbi yeke sara titene iri ti mbi aduti daa kpu na kpu.

⁸Tongana azo ti Israel asara ye kue alingbi na yanga so mbi mu na ala, na andia, na akpengba tënë nga na mbela so mbi mu na ala na lege ti Moïse, fade mbi yeke kiri ti tumba ala pepe ti gue yongoro na sese so mbi mu na akotara ti ala.”

⁹Me Manase apusu azo ti Juda na ti Jérusalem titene ala kiri asara sioni ahon amara so KOTA GBIA afâ ando ala kue kue kue na dawa ti azo ti Israel so.

¹⁰KOTA GBIA atene tënë na Manase nga na azo ti lo, me ala dingi mê ti ala pepe ti ma tënë ni.

¹¹Tongaso KOTA GBIA asara si amakonzi ti aturugu ti gbia ti Asirii aga na tere ti ala. Aturugu ni agbu Manase, ala yoro *kongi na ngbangba ti lo, ala kanga lo na zingiri ti bengba wen si ala gue na lo na Babilone.

¹²So lo yeke na ya ti pasi, lo voro tere ti lo na KOTA GBIA, Nzapa ti lo; lo sara tere ti lo kete mingi na gbe ti Nzapa ti akotara ti lo.

¹³Lo voro KOTA GBIA ti baa mawa ti lo. KOTA GBIA azia ngonzo ti lo, lo ma toto ti lo si lo kiri na lo na Jérusalem titene lo kiri lo sara kua ti lo ti gbia. Tongaso Manase ahinga atene, KOTA GBIA laa ayeke taa Nzapa.

¹⁴Na pekoni, Manase asara ngangu gbagba na tere ti Gbata ti David, na mbage ti gigi; gbagba ni ayo na nduzu mingi. Gbagba ni ahon na mbage ti Do, na ndo so li ti ngu ti Gihon ayeke daa, angoro vaka ti Ofel, ahon na popo-hoto ti Sedron, ague ngbii asi na yanga ti gbagba so iri ni Ti-asusu. Manase azia amakonzi ti aturugu na ya ti agbata ti Juda so kue ngangu gbagba ayeke na tere ni.

¹⁵Anzapa nde nga na yanda so lo zia lani na ya ti kota da ti KOTA GBIA so, lo zi ni; agbalaka so lo leke na ndö ti hoto ti kota da ti KOTA GBIA nga na Jérusalem, lo zi ni kue, lo tuku ni na gigi ti gbata ni.

¹⁶Lo kiri lo leke gbalaka ndali ti KOTA GBIA; lo mu *asandaga ti beoko na asandaga ti mungo singila na KOTA GBIA na ndö ti gbalaka ni. Na pekoni, lo mu yanga na azo ti Juda ti voro KOTA GBIA, Nzapa ti Israel.

¹⁷Andaa azo angba ti mu sandaga na ando so a leke na ndö ti ahoto, me ala yeke mu ni gi na KOTA GBIA, Nzapa ti ala.

¹⁸Tanga ti atënë na ndö ti Manase, aye so lo sara, sambela so lo sara na Nzapa ti lo nga na atënë so azo ti bango nda ti aye atene na lo na iri ti KOTA GBIA, Nzapa ti Israel, a su tënë ni na ya ti mbeti ti agbia ti Israel.

¹⁹Tënë ti sambela ti lo, lege so Nzapa azia ti sara ngonzo na tere ti lo, asiokpari ti lo nga na aye so lo sara ti ke Nzapa, a su tënë ni na ya ti mbeti ti Hozai. Na ya ti mbeti ni, a su nga iri ti ando so lo leke na ndö ti ahoto titene azo avoro anzapa nde daa, ando so lo leke akeke daa aluti na nduzu ndali ti nzapa-wali *Ashera nga na ayanda nde nde; lo sara aye ni so kozo titene lo sara tere ti lo kete.

²⁰Manase akui, lo hon na peko ti ababâ ti lo si a lu lo na ndo ti lo. Molenge ti lo Amon laa aga gbia na peko ti lo.

²¹Amon ayeke na ngu baleuse na use si lo ga gbia; lo le-gbia ngu use na Jérusalem.

²²Lo sara ye so ayeke sioni na le ti *KOTA GBIA tongana ti babâ ti lo Manase. Amon amu *sandaga na ayanda so kue babâ ti lo Manase aleke si lo voro nga ayanda ni.

²³Me lo sara tere ti lo kete pepe na dawa ti KOTA GBIA tongana ti so babâ ti lo Manase asara. Ti Amon ni, lo kiri lo sara sioni mingi ahon ti babâ ti lo.

²⁴Azo ti kua ti lo aleke tënë na tere ti lo na hondengo ni si ala fâ lo na yangbo ti lo.

²⁵Me azo ti kodro ni afâ azo so kue aleke tënë na tere ti gbia Amon. Na pekoni, ala mu molenge ti lo Yosias gbia na peko ti babâ ti lo.