Read sango 2 Mbai 4 Bible Online

2 Mbai 4 - sango bible

2 Mbai 4

¹A sara gbalaka na bengba wen; yongoro ti gbalaka ni ayeke metere baleoko, nduru ni ayeke metere baleoko, yongo ni na nduzu ayeke metere oku.

²A kporo bengba wen si a sara na ngbongboro sembe. Ti londo na yanga ni ti si na mbeni yanga ni, yongo ni ayeke metere oku. Ti londo na ngbonda ni ti si na yanga ni na nduzu, yongo ni ayeke metere use na ndambo. Tongana a gboto kamba na yanga ni angoro na ni atengbi, alingbi metere baleoko na oku.

³Na gbe ti yanga ti ngbongboro sembe ni, a leke limo ti abagara angoro tere ni kue. Molongo ti alimo ni ayeke use; na ya ti metere oko oko, abagara ayeke baleuse, baleuse. A kporo bengba wen si a leke na alimo ni legeoko na sembe ni.

⁴A zia sembe ni na ndö ti abagara baleoko na use; abagara ota abaa ndo na mbage ti Banga, ota abaa ndo na mbage ti Do, ota abaa ndo na mbage ti Mbongo si ota abaa ndo na mbage ti To. Ngbongboro sembe ni ayeke na ndö ti abagara ni, ngbonda ti ala kue aturne na mbage ti ya ni.

⁵Yanga ti sembe ni *amï alingbi na santimetere miombe. A leke tere ti yanga ni tongana ti so a leke tere ti yanga ti mbeni kopo so akpa pendere kongo. Sembe ni alingbi ti mu sembe so iri ni bat saki ota.

⁶A sara akota sembe baleoko na bengba wen; a zia oku na mbage ti maboko ti koli ti kota da ti Nzapa, oku na mbage ti maboko ti wali titene a sukula aye daa: na ndo so laa a yeke sukula *asandaga so ayeke gbi ni kue na wâ. Awayango-sandaga ayeke *sukula sioni ti ala na ya ti ngbongboro sembe ni.

⁷A sara agere ti lamba baleoko na lôro alingbi na kode ni. A zia ni na ya ti kota da ti Nzapa: oku na mbage ti maboko ti koli, oku na mbage ti maboko ti wali.

⁸A sara ameza baleoko si a zia ni na ya ti kota da ti Nzapa: oku na mbage ti maboko ti koli, oku na mbage ti maboko ti wali. A sara akopo ngbangbo oko na lôro titene a zia mene daa ti fi na tere ti aye.

⁹A sara gbagba ndali ti awayango-sandaga; a sara nga mbeni gbagba so ya ni akono si a sara ayanga ni daa; a zia bengba wen na tere ti ayanga ti gbagba ni.

¹⁰A zia ngbongboro sembe ni na mbage ti maboko ti koli ti kota da ti Nzapa, na mbage ti Mbongo-To.

¹¹Huram asara adu ti sembe, apao nga na akopo. Aye so gbia Salomon amu yanga na lo ti sara ndali ti kota da ti Nzapa, Huram asara ni kue awe. Aye ni ayeke so:

¹²angbongboro yongoro gere ti da use, aye use so akpa kpoto ti zia na li ti angbongboro gere ti da ni, agbanda use ti zia na tere ti aye use so akpa kpoto si ayeke na li ti angbongboro gere ti da ni,

¹³ale ti keke ti grenade ngbangbo osio so a kanga na tere ti agbanda use so; molongo ti ale ti grenade ni ayeke use si ayeke na ndö ti angbongboro yongoro gere ti da ni;

¹⁴lo sara apusu si lo zia akota sembe na ndö ni;

¹⁵lo sara ngbongboro sembe oko, abagara baleoko na use so ayo ngbongboro sembe ni;

¹⁶lo sara adu ti sembe, apao na afurshete. Aye so kue Salomon amu yanga na Huram-Abi ti sara ndali ti kota da ti KOTA GBIA, lo sara ni kue na bengba wen so tere ni ayeke za zango.

¹⁷A kporo bengba wen, a tuku na ya ti sese si a sara na aye so kue na ndo so ayeke na tere ti ngu ti Jourdain, na popo ti kodro ti Sukot na ti Seredata.

¹⁸Salomon amu yanga si a sara aye so kue gbani gbani; asara si zo alingbi ti hinga nengo ti bengba wen so a sara na ni pepe.

¹⁹Salomon amu yanga si a sara nga aye so kue a yeke sara na kua na ya ti kota da ti Nzapa: gbalaka so a sara na lôro, ameza so a yeke zia na ndö ni amapa so a yeke zia na dawa ti Nzapa,

²⁰agere ti lamba na alamba ti ala so a yeke zia wâ daa na dawa ti da so ayeke nde si ayeke nzoni kue ahon atanga ni; a sara ni kue na lôro ti nzoni ni, alingbi na kode ni.

²¹Akongo ni, alamba ni na aye ti zingo na zende na tere ti ameshe ti lamba ni kue, a sara ni na pendere lôro ti nzoni ni,

²²aye ti mingongo na wâ ti alamba, akangu, adu ti sembe na akete ta ti zongo na dukani, a sara ni na lôro ti nzoni ni. Yanga ti kota da ti Nzapa na ayanga ti da ti ya ni so a yeke hon daa ti gue na ndo so ayeke nde si ayeke nzoni kue ahon atanga ni, a sara ni na lôro.