Read sango 2 Mbai 5 Bible Online

2 Mbai 5 - sango bible

2 Mbai 5

¹So Salomon ahunzi ti sara kota da ti *KOTA GBIA kue awe, lo tene na azo ti ga na aye so babâ ti lo David azia ando nde ndali ti KOTA GBIA so: wen ti nginza, lôro na akungba kue; lo zia aye ni na ya ti kubu so ayeke bata ka amosoro ti da ti Nzapa daa.

²Tongaso, Salomon abongbi *akangba ti Israel, amakonzi ti amara kue nga na amakonzi ti asewa ti Israel na Jérusalem titene ala mu sanduku ti *mbuki ti *KOTA GBIA so ayeke na Gbata ti David, so ti tene na Sion, ti gue na ni na ya ti kota da ti Nzapa.

³Azo ti Israel kue abongbi na tere ti gbia ti sara matanga ti nze mbarambara ni.

⁴So akangba ti Israel kue asi awe, azo ti mara ti Lévi ayo sanduku ti mbuki ni.

⁵Ala yo sanduku ti mbuki ni, da ti bongo so KOTA GBIA na azo ti lo ayeke wara tere daa nga na aye so a zia nde ndali ti Nzapa si ayeke na ya ti da ti bongo ni. Awayango-sandaga so ayeke azo ti mara ti Lévi laa ayo aye ni so.

⁶Gbia Salomon na azo ti Israel so kue abongbi na tere ti lo na dawa ti sanduku ni, amu gba ti ataba na angasa nga na gba ti abagara na *sandaga; zo alingbi ti diko ala pepe wala ti hinga wungo ti ala pepe.

⁷Na pekoni, awayango-sandaga aga na sanduku ti mbuki ti KOTA GBIA na ya ti kota da ti Nzapa, na ndo so ayeke nde si ayeke nzoni kue ahon atanga ni, na gbe ti *akpangi ti *asheruben.

⁸Asheruben ni azi ya ti akpangi ti ala na ndö ti ndo so sanduku ti mbuki ni ayeke daa ti kanga ndö ti sanduku ni nga na akeke ti yongo na ni.

⁹Ndali ti so akeke ni ayo mingi, zo alingbi ti baa yanga ni gi tongana lo luti na popo ti sanduku ti mbuki nga na dawa ti ndo so ayeke nde si ayeke nzoni kue ahon atanga ni. Me tongana zo aluti na gigi, lo lingbi ti baa yanga ti akeke ni pepe. Sanduku ni angba kâ ngbii asi laso.

¹⁰Mbeni ye nde ayeke na ya ti sanduku ni pepe, gi akpangbara têne use so Moïse awara lani na ndö ti hoto ti Horeb. Lo zia akpangbara têne ni ya ti sanduku ni na ndembe so KOTA GBIA asara mbuki na azo ti Israel, na peko ti so lo sara si ala sigigi na sese ti Ezipte.

¹¹Awayango-sandaga alondo na ndo so ayeke nde si ayeke nzoni kue si ala sigigi. Awayango-sandaga so kue ayeke daa na ngoi ni so *asukula sioni ti ala, me na lege ti molongo ti ala pepe.

¹²Azo ti mara ti Lévi so ayeke azo ti hengo bia, Asaf, Heman, Yedutun, ala na amolenge ti ala nga na a-ita ti ala ayu abongo ti *len. Ala luti na tere ti gbalaka, na mbage ti To, ala gbu na maboko ti ala ngo, akota kundi na akete kundi. Awayango-sandaga ngbangbo oko na baleuse ayeke huru tatalita nduru na ala.

¹³Azo ti hurungo tatalita na azo ti hengo bia abongbi tere ti ala kue ti sepela na ti gonda KOTA GBIA. Na ndembe so toto ti tatalita, ti ngo na ti aye ti mozoko alondo, ala yeke sepela KOTA GBIA, atene: “E mu singila na KOTA GBIA, ngbanga ti so lo yeke nzoni; nzoni be ti lo angba kpu na kpu!” Tongaso, mbinda asi singo na ya ti kota da ni, da ti KOTA GBIA.

¹⁴Awayango-sandaga alingbi pepe ti sara kua ti ala ndali ti mbinda ni, ngbanga ti so gonda ti KOTA GBIA asi singo na ya ti kota da ni.