Read sango 2 Mbai 8 Bible Online

2 Mbai 8 - sango bible

2 Mbai 8

¹Na peko ti ngu baleuse, Salomon ahunzi ti sara kota da ti *KOTA GBIA nga na yangbo ti lo wani.

²Lo kiri lo leke agbata so Hiram, gbia ti Tir amu lani na lo, lo zia azo ti Israel ti lango daa.

³Na pekoni, Salomon ague, atiri bira na gbata ti Hamat-Soba si lo mu gbata ni.

⁴Lo kiri lo leke gbata ti Tadmor so ayeke na benyama; lo leke nga agbata so kue ayeke na sese ti Hamat titene lo bata akobe daa.

⁵Lo kiri lo leke Bet-Horon-ti-nduzu na Bet-Horon-ti-gbeni, agbata so a sara ngangu gbagba na tere ni, gbagba ayeke na tere ni si a kanga yanga ni na angbongboro wen.

⁶Lo kiri lo leke gbata ti Baalat, na agbata so kue lo yeke bata akobe daa, na agbata so lo yeke bata apusu ti bira ti lo na ambarata ti lo daa. Aye so kue be ti Salomon aye ti leke, lo leke ni na Jérusalem, na ndö ti hoto ti Liban nga na ya ti akodro so kue ayeke na gbe ti komandema ti lo.

⁷Ambeni zo angba na ya ti kodro ni so ala yeke ti Israel pepe: azo ti mara ti Het, ti Amon, ti Perizi, ti Hivi nga na ti Yebus.

⁸Azo ni so angba na ya ti kodro ni, ngbanga ti so azo ti Israel afâ ala kue kue kue pepe; Salomon amu ala ti sara angangu kua. *Ahale ti ala angba ti sara angangu kua ni ngbii asi laso.

⁹Me Salomon agbu mbeni ti zo ti Israel oko pepe na ngbaa ti sara akua ti lo, ngbanga ti so ala yeke aturugu, aturugu ti lo ti kota kamba, amakonzi ti azo ti kpengo na apusu ti lo ti bira wala azo ti kpengo na ambarata ti lo.

¹⁰Akapita ti akua so agovoronere ti Salomon asoro ala, wungo ti ala ayeke ngbangbo use na baleoku; kua ti ala ayeke ti baa ndo na ndö ti gba ti azo ti kua ni.

¹¹Salomon amu yanga si wali ti lo so ayeke molenge ti Faraon, alondo na Gbata ti David ti gue na yangbo so lo sara ndali ti wali ni. Biani, Salomon atene: “Wali ti mbi alingbi ti lango pepe na yangbo ti David, gbia ti Israel, ngbanga ti so ada so a zia sanduku ti *mbuki ti KOTA GBIA daa ayeke nde si ayeke nzoni kue.”

¹²Tongaso, Salomon amu *asandaga so a yeke gbi ni kue na wâ na KOTA GBIA na ndö ti gbalaka so lo sara ndali ti KOTA GBIA na dawa ti yanga ti kubu so a yeke hon daa ti li na ya ti kota da ti Nzapa.

¹³Lo yeke mu asandaga ni na ya ti lango oko oko alingbi na ndia so Moïse afa: na *lango ti wungo tere, na matanga ti fini nze nga na alango ti akota matanga ota so ayeke na ya ti ngu oko: matanga ti Mapa so a sara na mama ni pepe, matanga ti Pantekote na matanga ti Akpangba.

¹⁴Salomon asara ye alingbi na ye so babâ ti lo David amu yanga na lo ti sara: lo zia awayango-sandaga na yanga ti kua ti ala; lo zia nga azo ti mara ti Lévi na yanga ti kua ti ala titene ala yeke he bia ti sepela KOTA GBIA nga ti sara kua na ya ti lango oko oko na tere ti awayango-sandaga. Lo zia azo ti batango ayanga ti gbagba na lege ti bongbi ti ala oko oko titene ala bata ayanga ti gbagba oko oko kue. Yanga so David, zo ti Nzapa amu laa.

¹⁵Yanga so gbia amu ndali ti awayango-sandaga nga ndali ti azo ti mara ti Lévi, wala ndali ti ada ti batango mosoro, zo oko alingbi ti zia ni ti sara mbeni ye nde pepe.

¹⁶Lege so Salomon ahunzi na akua ti lo kue laa: ti to ndani na lango so a lu gere ti kota da ti KOTA GBIA ngbii asi na lango so da ni ahunzi. Kua ti kota da ni ahunzi nzoni mingi.

¹⁷Tongaso, Salomon ague na Esion-Geber nga na Elat, na yanga ti kota ngu-ingo, na sese ti Edom.

¹⁸Gbia Hiram atokua na lo amangboko so azo ti kua ti Hiram, ala so ahinga ti sara kua na le ti kota ngu-ingo laa aga na ni. Azo ti kua ni na azo ti kua ti Salomon asi na kodro ti Ofir si ala mu kilo ti lôro saki baleoko na ota aga na ni na gbia Salomon.