Read sango 2 Mbai 9 Bible Online

2 Mbai 9 - sango bible

2 Mbai 9

¹Gbia-wali ti kodro ti Saba ama sango ti Salomon si lo ga na Jérusalem ti tara ndara ti Salomon na lege ti angangu hundango tënë. Lo ga na azo gbani gbani na peko ti lo, *azambala so ayo ayombo, lôro gbani gbani nga na atêne ti ngangu ngere. So lo si na tere ti Salomon awe, lo hunda na lo atënë so kue lo leke na be ti lo.

²Salomon akiri na lo peko ti ahundango tënë ti lo kue; mbeni tënë oko so angba na hondengo ni so Salomon akiri tënë daa pepe ayeke pepe.

³Gbia-wali ti Saba abaa ndara ti Salomon, yangbo so lo sara,

⁴kobe so ayeke na ndö ti meza ti lo, da ti lango ti azo ti yangbo ti lo, lege so azo ti gbe ti lo ayeke sara kua ti ala, bongo so ala yeke yu, amakonzi ti azo ti mungo samba na lo nga na bongo so ala yeke yu; lo baa gbia so ayeke na li ti azo so ayeke tambula ti gue na ya ti kota da ti *KOTA GBIA. Na bango aye so kue, li ti gbia-wali ni kue akpe.

⁵Tongaso lo tene na gbia: “Tënë so mbi ma na kodro ti mbi kâ na ndö ti mo nga na ndö ti ndara ti mo ayeke taa-tënë biani.

⁶Kozo titene mbi ga si mbi baa aye ni na le ti mbi, mbi ke ti yeda na atënë so azo atene na mbi. Ye so azo ni afa peko ni na mbi so, asi na ndambo ti kota ndara ti mo so mbi baa ge so pepe! Ndara ti mo ahon ti so mbi ma sango ni.

⁷Ti ala nzoni, azo ti mo! Ti ala nzoni, azo ti kua ti mo, ala so ayeke duti na tere ti mo lakue ti ma atënë ti ndara ti mo so!

⁸Singila na KOTA GBIA, Nzapa ti mo so asara nzoni be na mo si lo soro mo titene mo le-gbia na iri ti lo na ndö ti Israel! Nzapa ti mo aye azo ti Israel, lo ye si ala ngba kpu na kpu, nilaa lo zia mo gbia na ndö ti ala titene mo fâ ngbanga mbirimbiri si mo sara ye na lege ti ndia.”

⁹Na pekoni, gbia-wali ni amu na gbia Salomon kilo ti lôro saki ota na ngbangbo oku, ayombo gbani gbani nga na atêne ti ngangu ngere. Yombo so gbia-wali ti Saba amu na gbia Salomon, zo ade ti baa mara ni laoko pepe.

¹⁰Azo ti kua ti Hiram na ala ti Salomon so lani amu lôro na kodro ti Ofir si aga na ni, ala ga nga na keke ti santal na atêne ti ngangu ngere.

¹¹Gbia amu keke ti santal ni, lo leke na sese ti ya ti kota da ti KOTA GBIA na ti yangbo ti lo pendere pendere. Lo mu nga keke ni, lo sara na aye ti mozoko, akete kundi na akota kundi ndali ti azo ti hengo bia. Zo ade ti baa mara ti ye so kozoni pepe na sese ti Juda.

¹²Ti gbia Salomon, lo mu na gbia-wali ti Saba aye so kue be ti lo aye nga na aye so kue lo hunda. Aye ni akiri ahon ye so lo ga na ni na gbia. Na pekoni, gbia-wali na azo ti yangbo ti lo akiri na kodro ti ala.

¹³Nengo ti lôro so gbia Salomon ayeke wara na ya ti ngu oko oko ayeke kilo saki baleuse.

¹⁴Na ndö ni, lo yeke wara nga nginza ti lapo so azo ayeke futa na ndö ti akungba so ayeke londo na kodro wande nga na ndö ti akungba ti dengo buze. Agbia ti Arabii kue na agovoronere ti kodro ni ayeke ga nga na lo lôro na wen ti nginza.

¹⁵Gbia Salomon asara akota *vala ngbangbo use na lôro so a pika tere ni pikango. Ti sara vala oko, a mu kilo omene ti lôro so a pika tere ni pikango.

¹⁶Lo sara nga akete vala ngbangbo ota na lôro so a pika tere ni pikango; ti sara vala oko, a mu kilo ota ti wen. Gbia azia avala ni na ya ti da so a iri ni “Gbako-ti-Liban”.

¹⁷Gbia asara mbeni kota mbata ti gbia na pembe ti doli, a zia lôro ti nzoni ni na tere ni.

¹⁸Titene zo ako na ndö ti mbata ni, lo yeke bi gere ti lo na ndö ti eskalie oko na oko ngbii omene. Agere ti mbata ni ayeke na lôro; a pika agere ni na tere ti mbata ni. Ndo ti ziango maboko daa ayeke mbage na mbage; a sara alimo use ti abamara so aluti na nduzu na tere ti ndo ti ziango maboko ni, oko na mbage, oko na mbage.

¹⁹A sara nga alimo baleoko na use ti abamara so aluti na ndö ti eskalie, na ndo so a yeke bi gere daa ti ko na ndö ti mbata ni so: limo omene ti abamara ayeke na mbage ti maboko ti koli, omene na mbage ti maboko ti wali. Zo ade ti sara mara ti ye tongaso laoko pepe na ya ti mbeni kodro-gbia.

²⁰Akopo ti gbia Salomon kue ayeke na lôro; asembe so kue ayeke na ya ti da so a iri ni “Gbako-ti-Liban” ayeke na lôro ti nzoni ni. Mbeni ye oko so a sara ni na wen ti nginza ayeke daa pepe. Na ngoi ti gbia Salomon, azo abaa wen ti nginza tongana senge ye na le ti ala.

²¹Biani, gbia ayeke na amangboko so ayeke gue na Tarsis; azo ti gbia Hiram laa ayeke kpe na ni. Lakue na peko ti ngu ota ota, amangboko ti Tarsis ayeke yo gba ti lôro, wen ti nginza, pembe ti doli, amakako nga na apendere ndeke ti ga na ni.

²²Gbia Salomon ahon agbia ti sese kue na mosoro nga na ndara.

²³Agbia ti sese kue ayeke gi lege ti baa Salomon titene ala ma tënë ti ndara so Nzapa azia na be ti lo.

²⁴Na ngu oko oko, zo oko oko ayeke ga na mbeni nzoni ye ti mu na lo: aye so a sara na wen ti nginza nga na lôro; abongo, aye ti bira, ayombo, ambarata na *apâkârâ.

²⁵Salomon ayeke lani na ando ti batango ambarata na apusu ti mbarata saki osio; lo yeke nga na azo ti kpengo na ambarata saki baleoko na use. Lo bata ambeni mbarata ni nga na azo ti kpengo na ni na tere ti lo na Jérusalem; lo bata ambeni na ya ti agbata so a leke ndali ni.

²⁶Salomon ayeke sara komandema na ndö ti agbia kue, ti londo na *bale ti Efrate asi na kodro ti azo ti Filistii, akiri ague ngbii asi na katikati ti sese ti Ezipte.

²⁷Gbia asara si wen ti nginza asi singo na Jérusalem tongana têne; lo sara si keke ti sedre asi singo tongana akeke ti sikomor na *Kodro-ti-gbeni.

²⁸A mu ambarata ndali ti Salomon na Ezipte nga na ya ti akodro nde nde kue si a yeke ga na ala.

²⁹Tanga ti atënë na ndö ti Salomon, na tongo nda ni ngbii asi na ndani, na aye so kue lo sara, a su tënë ni na ya ti “Mbeti ti aye so wayanga-Nzapa Natan asara”, “Mbeti ti aye so Ahia, zo ti Silo atene na peko ti yanga ti Nzapa” nga na ya ti “Mbeti ti aye so zo ti bango nda ti aye Yedo abaa na ya ti mbeni ye tongana bango-li”. Ota mbeti ni so ayeke tene tënë na ndö ti Yeroboam, molenge ti Nebat.

³⁰Salomon ale-gbia ngu baleosio na Jérusalem na ndö ti azo ti Israel kue.

³¹Na pekoni Salomon akui, lo hon na peko ti ababâ ti lo si a lu lo na Gbata ti David, babâ ti lo. Molenge ti lo Roboam laa aga gbia na peko ti lo.