Read sango Esdras 3 Bible Online

Esdras 3 - sango bible

Esdras 3

¹So nze mbarambara ti ngu ni alingbi awe, azo ti Israel so kue aduti na ya ti agbata ti ala abongbi tere ti ala tongana zo oko na Jérusalem.

²Yeshua, molenge ti Yosadak, lo na amba ti lo awayango-sandaga, na Zorobabel, molenge ti Shealtiel, lo na a-ita ti lo alondo ti sara gbalaka ti Nzapa ti Israel. Ala ye ti ya asandaga so a yeke gbi ni kue na wâ na ndö ni alingbi na tënë so a su na ya ti *Ndia ti Moïse, zo ti Nzapa.

³Ataa so mbeto ti azo nde so aduti na ya ti kodro ni asara ala, azo ti Israel akiri aleke gbalaka ni na ndö ti akozo gere ni. Na pekoni ala ya asandaga so a yeke gbi ni kue na wâ na *KOTA GBIA: asandaga ti ndaperere na ti lakui.

⁴Azo ti Israel asara matanga ti Akpangba, alingbi na tënë so a su na mbeti. Na ya ti lango oko oko, ala ya na Nzapa asandaga so a yeke gbi ni kue na wâ, alingbi na wungo ni so ndia afa.

⁵Na pekoni, ala ya lakue asandaga so a yeke gbi ni kue na wâ, asandaga ti fini nze, asandaga ndali ti alango ti amatanga so a zia ni nde ndali ti KOTA GBIA nga na asandaga so azo ayeke mu na be ti ala wani na KOTA GBIA.

⁶Ataa so ala de ti lu gere ti kota da ti KOTA GBIA pepe, gi na kozo lango ti nze mbarambara ni, ala to nda ti ya na KOTA GBIA asandaga so a yeke gbi ni kue na wâ.

⁷Ala mu nginza na azo ti dengo tere ti têne nga na asarapande. Ala mu kobe ti tengo ni, ye ti nyongo ni nga na mafuta na azo ti Sidon na ti Tir titene ala tokua ndo si a mu akeke ti sedre ti Liban aga na ni na le ti kota ngu-ingo ngbii asi na Zafa. Ala sara tongaso, ngbanga ti so Sirus, gbia ti Perse amu lege na ala.

⁸Na ngu use ni so ala si na Jérusalem, na ndo so kota da ti Nzapa ayeke lani daa, na use nze ni, Zorobabel, molenge ti Shealtiel, lo na Yeshua, molenge ti Yosadak, na tanga ti a-ita ti ala, na awayango-sandaga, na azo ti mara ti Lévi nga na azo so kue a gbu ala lani, a gue na ala na kodro wande si ala kiri na Jérusalem, ala to nda ti kua ni. Ala soro azo ti mara ti Lévi so ngu ti ala ayeke baleuse wala ahon so titene ala baa ndo na ndö ti akua ti lekengo da ti KOTA GBIA.

⁹Ambeni zo ti mara ti Lévi Yeshua, ala na amolenge ti lo na a-ita ti ala, ala na Kadmiel na amolenge ti lo, azo ti kete mara ti Hodavia, ala bongbi oko ti baa ndo na ndö ti azo ti sarango kua ti kota da ti Nzapa. Azo ti mara ti Lévi, ala ti kete mara ti Henadad amu maboko na ala.

¹⁰So azo ti lekengo kota da ti KOTA GBIA alu gere ti da ni awe, awayango-sandaga ayu abongo ti ala ti kua, ala mu atatalita si ala ga ti mu ndo ti ala. *Ahale ti Asaf, azo ti mara ti Lévi amu wen so atoto ngangu si ala na awayango-sandaga ni asepela KOTA GBIA alingbi na lege so David, gbia ti Israel, afa na ala.

¹¹Ala gonda KOTA GBIA na lege ti bia si ala mu singila na lo; ambeni ahe bia ni si ambeni akiri peko ti bia ni, atene: “KOTA GBIA ayeke nzoni, nzoni be ti lo angba ndali ti azo ti Israel kpu na kpu!” Azo kue asepela nga KOTA GBIA, ala dekongo ngangu, ngbanga ti so a lu gere ti kota da ti KOTA GBIA awe.

¹²Awayango-sandaga mingi, na azo ti mara ti Lévi nga na ambeni zo ti li ti asewa so aga mbakoro awe si ala baa ando kozo da ni so, ala toto mingi na vundu na ndembe so a yeke lu na gbe ti le ti ala, gere ti fini da ni. Me ambeni zo mingi ayeke dekongo na ngia.

¹³Lege titene a hinga go ti azo so ayeke toto na ti azo so ayeke dekongo na ngia ayeke daa pepe, ngbanga ti so azo kue ayeke dekongo ngangu si a yeke ma go ti ala yongoro mingi.