Read sango Esther 1 Bible Online

Esther 1 - sango bible

Esther 1

¹Ye ni asi na ngoi ti gbia Zerses; Zerses ayeke ando gbia na ndö ti akodro-sese ngbangbo oko baleuse na mbarambara, ti londo na Inde ngbii asi na Etiopii.

²Na ngoi ni so, ngu ota na peko ti so lo gbu mbata ti kua ti lo na kota kodro ni so ayeke Suze,

³lo leke mbeni kota matanga ti tengo kobe ndali ti akota zo ti kua ti lo kue na akota zo ti akua nde nde. Lo leke nga ni ndali ti akota zo so ayeke na li ti aturugu ti Perse na ti Medii, nga ndali ti azo so azo ane ala mingi na akota zo ti kua ti kodro ni kue.

⁴Lo fa na ala anengo mosoro ti kodro ti lo na aye ti pendere so afa gonda ti lo ti gbia. Matanga ni aninga ngbii nze omene.

⁵Tongana lango ni so ahon awe, lo kiri lo leke mbeni matanga ndali ti azo kue, akota zo na asenge zo so ayeke lango na kota kodro ti Suze. Ala sara matanga ni na kota le ti kodro ni, na ndo so a lu akeke daa na ya ti yangbo ti gbia ni; ala sara matanga ni ngbii aninga yenga oko.

⁶A leke ya ti yangbo ni na apendere vuru bongo ti *len nga na kua ti tere ti taba so nzoroko ni akpa le ti nduzu. A kanga abongo ni na nduzu na kamba ti bongo so abe bengo; a kanga ni na tere ti *kati so a sara ni na wen ti nginza si a kanga ni na tere ti angbongboro yongoro gere ti da ni so a sara ni na têne ti marbre. A leke apendere kota ngende ti tengo kobe so ayeke na lôro nga na wen ti nginza. Sese ti yangbo ni ayeke na têne so abe bengo, mbeni avuru vurungo, mbeni ayeke za zango si mbeni avuko vukongo.

⁷A kangbi samba na azo ni na ya ti akopo nde nde so ayeke na lôro. Vin ti gbia ayeke sua suango tongana ngu si a mu na azo alingbi na nzoni be ti gbia.

⁸Lo mu yanga na azo ti kua ti lo titene ala mu vin na azo alingbi na nzara ti ala; ala gbu zo na ngangu pepe, wala ala gbanzi zo oko pepe.

⁹Vasti, wali ti gbia, asara nga ti lo matanga ni ndali ti awali na yangbo ti gbia ni kâ.

¹⁰Na lango mbarambara ti matanga ni, na peko ti so lo nyon vin ngbii si tere ti lo anzere awe, lo mu yanga na *ambaiwa ti lo mbarambara Mehuman, Bizta, Harbona, Bigta, Abagta, Zetar na Karkas

¹¹titene ala gue, aga na lo wali ti lo Vasti. Na gango ti lo, ayeke nzoni lo kanga na li ti lo ye ti pendere ti lôro ti gbia-wali. Biani, Vasti ayeke pendere wali mingi. Nilaa gbia aye ti fa pendere ti lo ni na le ti akota zo ti kua ti lo nga na le ti azo so kue aga na matanga ni.

¹²Me Vasti, wali ti gbia, ake ti ma yanga ti gbia so lo tokua na lege ti ambaiwa so si lo ga pepe. Tongana gbia abaa ye ni tongaso, ngonzo agbu lo mingi si ngonzo ni ayeke gbi lo na be ti lo tongana wâ.

¹³Tongaso lo gue, lo baa tënë ni na azo so ayeke mu ka na lo wango. Biani, lakue tongana mbeni tënë asi na gbia, lo yeke baa ni na azo so ahinga ndia nga na azo so ayeke gi nda ti atongoro.

¹⁴Azo ni ayeke azo tongana: Karshena, Shetar, Admata, Tarsis, Meres, Marsena na Memukan; ala laa ayeke lakue nduru na tere ti lo; ala laa ayeke akota zo mbarambara ti Perse na ti Medii; ala yeke azo so lo yeke ma ka ala mingi, ala laa ayeke duti na kozo ndo na ya ti kodro ni.

¹⁵Gbia atene na ala, atene: “Mbi gbia Zerses, mbi tokua ambaiwa ti mu yanga na Vasti, wali ti mbi, ti ga, me lo ke ti ma yanga ti mbi. Ndia so alingbi na ye so lo sara so ayeke so wa? Fade a sara nyen na lo?”

¹⁶Tongaso Memukan atene na gbia nga na akota zo ti kua ti lo, atene: “Sioni so Vasti, wali ti gbia, asara so, lo sara ni gi na gbia oko pepe, me lo sara ni nga na azo ti kua ti gbia kue nga na azo ti kodro kue so ayeke na ya ti akodro-sese nde nde kue ti gbia Zerses.

¹⁷Biani, fade awali kue ayeke ma tënë ti ye so wali ti gbia asara so si ala yeke baa akoli ti ala tongana ambumbuse zo. Fade awali ni atene: ‘Gbia amu lani yanga titene a gue, aga na lo wali ti lo Vasti, me lo ke ti ga!’

¹⁸Gi laso laso, tongana awali ti akota zo ti kodro ti Perse na ti Medii ama tënë ti sarango ye ti wali ti gbia so, ala kue ayeke tene ande gi mara ti tënë so na akoli ti ala. Fade awali ayeke baa akoli ti ala tongana ambumbuse zo; ye so ayeke sara si ngonzo ayeke londo na be ti akoli ni.

¹⁹Gbia, tongana be ti mo aye, fade mo mu mbeni kota mbela ti kanga lege na Vasti ti kiri ti ga na dawa ti mo. Fade mo mu ndo ti Vasti na mbeni wali so ayeke nzoni ahon lo. Fade ndia so ali na ya ti mbeti ti andia ti kodro ti Perse na ti Medii si ngangu ni ayeke ngba tongaso biani biani.

²⁰Tongana azo ti kodro ni kue ama tënë ti mbela so na ya ti kodro ti mo so akono mingi so, fade wali oko oko kue ayeke ne koli ti lo, ataa koli ni ayeke kota zo wala senge zo.”

²¹Tënë so anzere na be ti gbia nga na be ti akota zo ti kodro ni si gbia asara ye alingbi gi na tënë so Memukan atene.

²²Tongaso a su mbeti na yanga ti kodro ti amara oko oko so ayeke lango na kodro-sese oko oko ti lo ni si lo tokua ni na ala. A su mbeti ni nga na lege ti kode ti sungo mbeti ti azo ti akodro-sese oko oko, tongaso si koli oko oko alingbi ti duti makonzi ti da ti lo wani si lo tene tënë na yanga ti kodro ti lo.