Read sango Esther 4 Bible Online

Esther 4 - sango bible

Esther 4

¹So Mardochée ama tënë ti ye so kue asi so, lo suru bongo na tere ti lo, lo yu bongo ti mua si lo tuku mburu ti wâ na li ti lo. Lo tambula na ya ti gbata ti Suze kue, na kota mawa na be ti lo, lo yeke dekongo.

²Lo si na yanga ti yangbo ti gbia, me lo lingbi ti li pepe, ngbanga ti so zo so ayu bongo ti mua alingbi ti li kâ pepe.

³Andaa na ya ti kodro-sese oko oko so kue atënë ti ndia na mbela ni asi daa, azuife kue ayeke na ya ti kota mawa: ala ke kobe si gi toto na toto, demango tere na demango tere; ambeni mingi na popo ti ala ayu gi bongo ti mua si ala yeke lango na ya ti mburu ti wâ.

⁴Amaseka-wali so ayeke sara kua na Esther nga na *ambaiwa ti lo aga si ala tene peko ti aye so kue na lo; be ti lo kue afun na mango tënë so. Na pekoni, lo tokua bongo na Mardochée titene lo yu si lo zi bongo ti mua so ayeke na tere ti lo, me Mardochée ake.

⁵Tongaso Esther airi Hatak, so ayeke oko ti ambaiwa so gbia azia lo ti sara kua na Esther. Esther atokua Hatak na Mardochée ti hunda lo na ndö ti ye so asi si lo gi nga lege ti hinga ndani so Mardochée asara aye ni so.

⁶Hatak asigigi si lo gue, lo tengbi Mardochée na kota ndo ti gbata ni; ndo ni ayeke baa ndo na yanga ti yangbo ti gbia ni.

⁷Mardochée atene na Hatak peko ti ye so kue asi na lo; lo tene nga tënë ti wungo ti nginza so Haman amu zendo ti tuku na ya ti sanduku ti gbia tongana a fâ azuife kue.

⁸Mardochée amu nga na lo mbeti ti mbela so gbia asu maboko ti lo daa na gbata ti Suze si na ya ni gbia amu yanga titene a fâ azuife kue ahunzi ala so. Lo hunda nga na Hatak ti gue ti tene na Esther peko ti atënë so lo ma si lo fa na lo mbeti ti mbela ni. Lo hunda na Hatak ti gue nga ti tene na Esther titene lo gue, lo voro tere ti lo na gbia, tongaso si gbia ni alingbi ti baa mawa ti azo ti mara ti lo si ti sara nzoni be na ala.

⁹Hatak akiri si lo tene na Esther peko ti atënë so kue Mardochée atene na lo.

¹⁰Esther amu yanga na lo ti gue ti tene na Mardochée tongaso:

¹¹“Azo ti kua ti gbia kue nga na azo ti akodro-sese oko oko ti gbia kue, ataa koli wala wali ahinga atene, gi ndia oko laa ayeke daa: zo so gbia airi lo pepe si zo ni ague nduru na tere ti gbia na ndo so lo yeke duti ka daa na ya ti yangbo ti lo, gi kuâ laa zo ni ayeke wara. Zo so ayeke ngba na fini ayeke gi zo so gbia ayoro na lo keke ti lo ti gbia so a sara na lôro. Ti mbi, asara laso nze oko so gbia atisa mbi pepe ti gue na tere ti lo.”

¹²Azo atene na Mardochée peko ti atënë ti Esther.

¹³Mardochée akiri tënë na lo, atene: “Ti be ti mo, tongana a fâ azuife kue, gi mo oko laa mo yeke ngba ande na fini, ngbanga ti so mo yeke na yangbo ti gbia ma?

¹⁴Ataa mo ke ti zi yanga na ndö ti ye so asi na e fadeso, ye ti zingo azuife na ya ti mawa nga na ya ti kuâ ayeke londo ande na mbeni ndo nde. Me ti mo na sewa ti mo kue, fade ala yeke kui. Mbi hinga pepe, ndali ti zingo e na ya ti ye ti ngangu tongaso si mo ga wali ti gbia so!”

¹⁵Esther akiri tënë na Mardochée, atene:

¹⁶“Gue mo bongbi azuife so kue ayeke na Suze, mo tene na ala titene ala ke kobe ti sambela ndali ti mbi; bi na lâ na ya ti lango ota, ala te kobe pepe, ala nyon ngu pepe. Mbi nga, mbi na azo ti kua ti mbi ti wali, e yeke sara ande tongaso. Na pekoni, mbi yeke gue na tere ti gbia, ataa so ndia agbanzi lege ni; ti kuâ ni, mbi yeke kui!”

¹⁷Tongaso Mardochée alondo, lo gue si lo sara ye alingbi gi na yanga so Esther amu na lo.