Read sango Esther 9 Bible Online

Esther 9 - sango bible

Esther 9

¹Lango baleoko na ota ti nze baleoko na use, so ti tene nze ti Adar alingbi awe. Lango so mbela ti gbia ayeke wara ngangu ti lo na ni laa; so ti tene lango so awato ti azuife abaa ti ala atene, ala yeke sara komandema na ndö ti azuife, me ye ni akiri aga nde: azuife laa akiri ale-gbia na ndö ti azo so lani ake ala.

²Na ya ti agbata ti akodro-sese nde nde ti gbia Zerses, azuife abongbi tere ti ala ti fâ azo so agi lege lani ti sara sioni na ala, azuife so. Zo oko agbu le ni na azuife ni pepe, ngbanga ti so mbeto ti ala agbu azo kue.

³Ataa akota zo ti kodro ni kue, ataa akota komanda, agovoronere nga na akota zo so ayeke baa ndo na ndö ti amosoro ti gbia amu mbage ti azuife, ngbanga ti so mbeto ti Mardochée ahon ndö ti ala.

⁴Biani, Mardochée ayeke lani kota zo mingi na yangbo ti gbia, sango ti lo amu ya ti akodro-sese ni kue si lo ngba ti ga kota zo lakue.

⁵Tongaso azuife asara taa ye ti be ti ala na azo so ake ala nga na awato ti ala; ala fâ ala kue na yongoro zeme si ala nika ala nikango.

⁶Gi na kota kodro ti Suze oko, azuife afâ si anika azo ngbangbo oku. Ala fâ nga:

⁷Parshanedata, Dalfon, Aspata,

⁸Porata, Adalia, Aridata,

⁹Parmasheta, Arisai, Aridai na Vayezata.

¹⁰Ala kue ayeke amolenge baleoko ti Haman, molenge ti Hamedata, zo ti sarango ngangu na azuife. Me a gbu ye ti azo ni pepe.

¹¹Gi na oko lango ni so, azo ague, afa na gbia wungo ti azo so a fâ ala na kota kodro ti Suze.

¹²Gbia atene na wali ti lo Esther, atene: “Gi na kota kodro ti Suze oko, azuife afâ si anika azo ngbangbo oku; ala fâ nga amolenge ti Haman baleoko kue. Ti tanga ti akodro-sese ni kâ ayeke oke? Me mo ye nyen? Fade a yeke mu ni na mo. Nyen laa mo hunda, nyen? Fade mbi yeke sara na mo ye so kue be ti mo aye.”

¹³Esther akiri tënë: “Gbia, tongana be ti mo aye, ayeke nzoni mo zia lege na azuife so ayeke lango na Suze ti sara kekereke gi oko mara ti ye so ala sara laso so alingbi gi na oko tënë ti ya ti mbela so. Fade mo mu yanga si a mu kuâ ti amolenge ti Haman baleoko so, a kanga go ti ala na tere ti keke na nduzu.”

¹⁴Gbia amu yanga titene ala sara tongana ti so ala fa so: na kota-kodro ti Suze, lo kiri lo mu mbeni fini mbela si a kanga kuâ ti amolenge ti Haman na tere ti keke na nduzu.

¹⁵Na lango baleoko na osio ti nze ti Adar, azuife so ayeke na Suze akiri abongbi tere ti ala si ala fâ azo ngbangbo ota, me ala gbu ye ti azo ni pepe.

¹⁶Ti tanga ti azuife so ayeke lango na ya ti ambeni kodro-sese ni, ala bongbi tere ti ala ti luti ti bata fini ti ala si ala wara lege ti wu pupu na maboko ti awato ti ala. Azuife afâ azo so ake ala saki balembarambara na oku, me ala gbu ye ti azo ni pepe.

¹⁷Ala sara ye ni so na lango baleoko na ota ti nze ti Adar. Na lango baleoko na osio ni, ala wu tere ti ala. Ala sara si lango ni so aga lango so ala yeke duti ti te, ti nyon, ti sara ngia.

¹⁸Me azuife so ayeke ti ala na Suze, na peko ti so ala bongbi tere ti ala na lango baleoko na ota nga na lango baleoko na osio, ala wu tere ti ala na lango baleoko na oku. Ala sara si lango ni so aga lango so ala yeke duti ti te, ti nyon, ti sara ngia.

¹⁹Ndani laa azuife so ayeke lango na ya ti akete kodro ayeke sara kua na lango baleoko na osio ti nze ti Adar pepe; ala sara si lango ni so aga lango so ala yeke duti ti te, ti nyon, ti sara ngia, ti sara amatanga si ti tokua akobe na amba ti ala na popo ti ala.

²⁰Aye so kue asi so, Mardochée asu na mbeti. Na pekoni, lo tokua ambeti na azuife so kue ayeke na ya ti akodro-sese kue ti gbia Zerses, ataa ala so ayeke na yongoro ndo nga na ala so ndo ti ala ayeke nduru.

²¹Lo hunda na ala titene na ngu oko oko, ala mu lango baleoko na osio nga na lango baleoko na oku ti nze ti Adar tongana alango ti matanga.

²²Na ya ti alango ni so laa azuife awara lege ti wu pupu na maboko ti awato ti ala; na ya ti nze so laa vundu ti ala aga ngia si mawa ti ala aga lango ti matanga. Alango ni so aga alango so ala yeke sara matanga ti tengo kobe, ala yeke sara ngia; ala yeke tokua kobe na amba ti ala na popo ti ala si ala yeke mu aye na azo ti mawa.

²³Azuife ayeda ti ngba ti sara kozo matanga so ala to nda ti sarango ni lani so; ala yeda nga ti sara ye alingbi na yanga so Mardochée amu na ala.

²⁴Ala yeda, ngbanga ti so Haman, molenge ti Hamedata, mbeni zo ti *hale ti Agag, so lo yeke zo ti sarango ngangu na azuife kue, lo leke lani na be ti lo titene a fâ azuife kue ti hunzi ala; nilaa lo mu yanga titene a bi zeke so iri ni purim ti fa lango so a yeke fâ na azuife ni.

²⁵Me so Esther ague, abaa gbia, gbia amu yanga titene a su mbeni mbeti ti sara titene sioni so Haman aye ti sara na azuife so akiri gi na ndö ti lo wani; a mu Haman a kanga go ti lo na tere ti keke na nduzu, lo na amolenge ti lo baleoko.

²⁶Ndani laa a di iri ti alango ti matanga ni purim. Nda ti iri so alondo na lege ti mbupa so “pur”. Azuife abata atënë ti ya ti mbeti so kue Mardochée atokua ni na ala so; ala bata nga atënë so kue ala baa si asi na ala wani so.

²⁷Ala sara si alango use so aga mbeni ndia ndali ti ala wani, ndali ti ahale ti ala nga na azo so kue ayeke ga azuife; ala yeke bata ande alango ni so tongana alango ti matanga. Ala yeke sara ande ni lakue lakue taa gi na lango ni so, na ngu oko oko alingbi na yanga so Mardochée amu na ala.

²⁸Fade azo kue ti ngoi so ayeke ga, na asewa oko oko ti azuife so ayeke na ya ti akodro-sese oko oko na ti agbata oko oko ayeke bata alango so tongana alango ti matanga na lege ti molongo ti dutingo ti ala oko oko kue. Alango ti purim so ayeke girisa na popo ti azuife pepe; ahale ti ala yeke zia lege ti sarango matanga ni laoko pepe.

²⁹Esther, wali ti gbia, molenge ti Abihail, lo na Mardochée, zuife ni, asu mbeti na lege ti ngangu so ala wara ti fa atene, use mbeti so a su si abaa tënë ti purim so angba lakue na ngangu.

³⁰A tokua ambeti ni na azuife so kue ayeke na ya ti akodro-sese ngbangbo oko baleuse na mbarambara ti gbia Zerses. Na ya ti ambeti ni, ala sambela titene azuife ni aduti na siriri si mbeni sioni ye awara ala pepe.

³¹Na ya ti mbeti ni nga, a hunda na azuife titene ala ngba lakue ti sara matanga ti purim ni taa gi na alango ni so Esther, wali ti gbia, na Mardochée afa. Ala wani laa amu alango ni so ndali ti ala na ahale ti ala gi tongana ti so a mu ndia ndali ti kengo kobe na ti demango tere.

³²Yanga so Esther amu asara si tënë ti matanga ti purim aga taa-tënë; nilaa a su tënë ni na ya ti mbeti so.