Read sango Sigingo 11 Bible Online

Sigingo 11 - sango bible

Sigingo 11

¹KOTA GBIA atene na Moïse: “Mbi yeke tokua tanga ti kpale oko na ndö ti Faraon nga na ndö ti azo ti Ezipte. Na pekoni, lo yeke zia lege na ala ti gue, lo yeke tumba nga ala na ndo so biani biani.

²Tongaso, tene na azo ti Israel kue, mo tene: ‘Ayeke nzoni koli oko oko na wali oko oko ahunda na mba ti lo aye so a sara na wen ti nginza nga na lôro.’ ”

³KOTA GBIA asara si azo ti Ezipte abaa azo ti Israel na nzoni le. Na ndö ni kue, na sese ti Ezipte, azo ti gbe ti Faraon nga na azo ti kodro ni abaa Moïse tongana kota zo mingi.

⁴Moïse atene na gbia Faraon: “Tënë so KOTA GBIA atene ayeke so: ‘Na be ti bi, mbi yeke hon na ya ti kodro ti Ezipte kue.

⁵Fade akozo molenge-koli so kue ayeke na kodro ti Ezipte ayeke kui: ti londo na kozo molenge ti mo Faraon, lo so lo lingbi ti duti gbia na peko ti mo, ngbii asi na kozo molenge ti ngbaa-wali so ayeke nika ale ti *ble, ala kue ayeke kui. Akozo molenge-koli ti anyama ayeke kui nga.

⁶Na ya ti kodro ti Ezipte kue, fade toto ayeke hon ndoni. Mara ti toto tongaso ade ti duti daa laoko pepe; mara ti toto tongaso ayeke kiri ti duti daa laoko pepe.

⁷Me na ndo ti azo ti Israel kue, fade mbo oko ayeke dekongo na li ti mbeni zo wala na li ti mbeni nyama pepe. Tongaso si ala hinga atene, mbi KOTA GBIA, mbi sara kangbi na popo ti azo ti Ezipte na azo ti Israel.’

⁸Moïse akiri atene: Na ndembe ni so, fade azo ti gbe ti mo so ayeke ge so ayeke ga na mbage ti mbi, ala yeke kuku ti kpo li ti ala na sese na gbe ti mbi si ala yeke tene na mbi, atene: ‘Hon kâ, mo na azo so kue amu peko ti mo so!’ Na pekoni, mbi yeke hon.” Tongaso Moïse alondo na ndo ti Faraon, lo sigigi na ngonzo ti wâ na be ti lo.

⁹KOTA GBIA atene na Moïse: “Gbia Faraon aye ti ma ala pepe; tongaso si aye ti dongo be so mbi yeke sara awu mingi na Ezipte.”

¹⁰Biani, Moïse na Aaron asara aye ti dongo be so kue na le ti Faraon, me KOTA GBIA akpengba be ti lo si lo ke ti zia lege na azo ti Israel ti londo na kodro ti lo ti gue.