Read sango Sigingo 14 Bible Online

Sigingo 14 - sango bible

Sigingo 14

¹KOTA GBIA atene na Moïse:

²“Tene na azo ti Israel ti kiri ti sara bâbâ ti ala na dawa ti gbata ti Pi-Hahirot, na popo ti Migdol na kota ngu-ingo ti Asosongo. Na ndo so laa ala yeke sara bâbâ ni, abaa le na Baal-Sefon, nduru na kota ngu-ingo.

³Fade Faraon ayeke tene tënë ti azo ti Israel, lo tene: ‘Ala girisa na ya ti benyama si li ti ala aga kirikiri; benyama akanga lege na ala awe!’

⁴Mbi yeke sara titene be ti Faraon akpengba si lo tumba peko ti ala. Tongaso, fade mbi yeke fa gonda ti mbi na ndö ti Faraon nga na ndö ti aturugu ti lo kue. Tongaso si azo ti Ezipte ahinga atene mbi laa mbi yeke KOTA GBIA.” Nilaa azo ti Israel asara ye ni tongaso.

⁵Azo atene na Faraon, gbia ti Ezipte, atene: “Baa azo ti Israel akpe awe.” Be ti Faraon na be ti akota zo ti gbe ti lo akiri asanze ndali ti azo ni si ala tene: “Nyen laa e sara si e zia lege na azo ti Israel si ala hon so? Ala yeke kiri ti sara kua ti ngbaa na e pepe!”

⁶Faraon aleke pusu ti mbarata ti lo si lo mu aturugu ti lo na tere ti lo si ala gue.

⁷Lo mu na tere ti lo anzoni pusu ti mbarata ngbangbo omene; lo mu nga apusu ti mbarata kue ti Ezipte. Na ya ti pusu oko oko, aturugu ota ayeke daa.

⁸KOTA GBIA asara si be ti Faraon, gbia ti Ezipte akpengba si lo to nda ti tumba peko ti azo ti Israel. Me azo ti Israel asigigi na Ezipte, ala yoro maboko ti ala na nduzu ti fa atene, ala sigigi na gbe ti ngbaa awe.

⁹Aturugu ti Ezipte, na ambarata ti ala, na apusu ti mbarata ti ala nga na azo ti kpengo na ambarata ni atumba peko ti azo ti Israel. Ala gue, awara azo ti Israel ni na ya ti bâbâ ti ala, nduru na yanga ti kota ngu-ingo, nduru na Pi-Hahirot so abaa le na Baal-Sefon.

¹⁰So gbia Faraon aga nduru awe, azo ti Israel ayo le ti ala na nduzu si ala baa so azo ti Ezipte ayeke ga na peko ti ala. Kota mbeto agbu azo ti Israel si ala dema tere ti ala na KOTA GBIA.

¹¹Ala tene na Moïse, atene: “Du ti kuâ ayeke na Ezipte pepe si mo ga na e titene e kui na benyama so? Mo zi e na Ezipte, mo sigigi na e ngbanga ti nyen?

¹²So e de na Ezipte so, e tene lani na mo, e tene: ‘Zia e duti kpoo, e sara kua na azo ti Ezipte ma! Ti sara kua na ala ayeke nzoni ahon titene e kui na benyama.’ ”

¹³Moïse akiri tënë na azo ni, atene: “Ala sara mbeto pepe! Ala luti tongana koli! Ala yeke baa lege so KOTA GBIA ayeke soo ala na kuâ laso. Biani, azo ti Ezipte so ala yeke baa ala laso, ala yeke kiri ti baa ala mbeni pepe!

¹⁴KOTA GBIA laa ayeke tiri bira ndali ti ala. Ti ala, fade ala yeke duti gi kpoo.”

¹⁵KOTA GBIA atene na Moïse: “Mo yeke dekongo na mbi ngbanga ti nyen? Tene na azo ti Israel, ala mu lege ague.

¹⁶Ti mo, mu keke ti mo, mo yoro ni na nduzu na ndö ti kota ngu-ingo; mo kangbi ya ti ngu ni mbage na mbage titene azo ti Israel ahon na popo ni na ndö ti kuru sese.

¹⁷Ti mbi, mbi yeke sara titene be ti azo ti Ezipte akpengba si ala li na peko ti ala na ya ti kota ngu-ingo ni. Fade mbi yeke fa gonda ti mbi na ndö ti Faraon nga na ndö ti aturugu ti lo kue, apusu ti mbarata ti lo nga na azo ti kpengo na mbarata ti lo.

¹⁸Tongana mbi fa gonda ti mbi na ndö ti Faraon, na ndö ti apusu ti mbarata ti lo nga na ndö ti azo ti kpengo na mbarata ti lo, fade azo ti Ezipte ayeke hinga atene, mbi laa mbi yeke KOTA GBIA.”

¹⁹*Ange ti Nzapa so ayeke tambula na dawa ti azo ti Israel so akiri ague, aluti na peko ti ala. Ngbongboro mbinda so ayeke tambula na dawa ti ala so akiri ague, aluti na peko ti ala.

²⁰Ngbongboro mbinda ni aga aluti na popo ti bâbâ ti azo ti Ezipte na ti azo ti Israel. Na mbeni mbage, mbinda ni avuko vukongo si na mbeni mbage ni, mbinda ni ayeke za zango. Tongaso na bi ni kue, azo ti Ezipte na azo ti Israel alingbi ti ga nduru na tere ti mba pepe.

²¹Moïse ayoro maboko ti lo na ndö ti kota ngu-ingo. KOTA GBIA atokua mbeni kota pupu ti To so aga aya na ndö ti kota ngu-ingo na bi ni kue si akangbi ya ti kota ngu-ingo ni. Lege azi na ya ni, ndo ni aga kuru sese.

²²Azo ti Israel ahon na ya ti kota ngu-ingo ni, ngu andu gere ti ala pepe. Na mbage ti maboko ti ala ti koli nga na mbage ti maboko ti ala ti wali, ngu ni aluti tongana mbeni kota gbagba.

²³Azo ti Ezipte atumba peko ti ala; ambarata ti Faraon kue, na apusu ti mbarata ti lo nga na azo ti kpengo na mbarata ti lo, ala li na ya ti kota ngu-ingo ni na peko ti azo ti Israel, ngbii asi na be ti ngu-ingo ni.

²⁴Na yanga ti ndaperere, KOTA GBIA so ayeke na ya ti ngbongboro wâ nga na ya ti ngbongboro mbinda abaa ndo na mbage ti aturugu ti Ezipte, lo sara si ye aga kirikiri na popo ti ala.

²⁵KOTA GBIA asara si gere ti apusu ti mbarata ti ala azi si ala ye ti hon, ala hon gbaa. Tongaso azo ti Ezipte atene: “E kpe yongoro na tere ti azo ti Israel, ngbanga ti so KOTA GBIA laa ayeke tiri bira na e ndali ti azo ti Israel!”

²⁶KOTA GBIA atene na Moïse: “Yoro maboko ti mo na ndö ti kota ngu-ingo titene ngu ni akiri na ndö ti azo ti Ezipte, na ndö ti apusu ti mbarata ti ala nga na ndö ti azo ti kpengo na mbarata ti ala.”

²⁷Moïse ayoro maboko ti lo na ndö ti kota ngu-ingo ni. So ndo aga nduru ti han, ngu ni akiri na plase ni tongana ti kozo. Azo ti Ezipte so angba ti kpe atengbi biaku na ngu ni. KOTA GBIA abi ala na ya ni.

²⁸Ngu ni akiri si akanga ndö ti apusu ti mbarata, azo ti kpengo na mbarata nga na aturugu kue ti Faraon so ali na ya ti kota ngu-ingo na peko ti azo ti Israel so; zo oko angba pepe.

²⁹Me azo ti Israel ahon na ya ti kota ngu-ingo ni na ndö ti kuru sese. Na mbage ti maboko ti ala ti koli nga na mbage ti maboko ti ala ti wali, ngu ni aluti tongana mbeni gbagba.

³⁰Na lango ni so, KOTA GBIA asoo azo ti Israel na maboko ti azo ti Ezipte si azo ti Israel abaa kuâ ti azo ti Ezipte na yanga ti kota ngu-ingo ni.

³¹Azo ti Israel abaa so, na lege ti ngangu ti maboko ti lo, KOTA GBIA ahon ndö ti azo ti Ezipte. Nilaa ala kpe mbeto ti KOTA GBIA si ala zia be ti ala na ndö ti KOTA GBIA nga na ndö ti Moïse, zo ti kua ti lo.