Read sango Sigingo 18 Bible Online

Sigingo 18 - sango bible

Sigingo 18

¹Zetro, wayango-sandaga ti azo ti mara ti Madian, kogara ti Moïse ama tënë ti aye so kue Nzapa asara ndali ti Moïse na azo ti Israel, azo ti Nzapa. Lo ma lege so KOTA GBIA asara si azo ti Israel asigigi na Ezipte.

²Zetro, kogara ti Moïse, ayamba Sefora, wali ti Moïse so Moïse atene lani na lo ti kiri ti duti na ndo ti babâ ti lo.

³Zetro ayamba nga amolenge ti Sefora ti koli use: iri ti mbeni ayeke Gershom, so ti tene “Gene na ndo so”. Biani, Moïse atene lani, atene: “Mbi yeke gene na sese ti awande.”

⁴Iri ti mbeni ayeke Eliezer, so ti tene “Nzapa amu maboko na mbi”. Biani, Moïse atene lani, atene: “Nzapa ti babâ ti mbi amu maboko na mbi; lo zi mbi na yanga ti yongoro zeme ti Faraon.”

⁵Zetro, kogara ti Moïse, lo na amolenge ti Moïse ti koli na wali ti Moïse ague ti wara Moïse na benyama, na ndo so lo sara bâbâ ti lo daa, na tere ti hoto ti Nzapa.

⁶Zetro atokua na Moïse, atene: “Mbi kogara ti mo Zetro laa mbi ga ti baa mo so, mbi na wali ti mo nga na amolenge ti mo use.”

⁷Moïse ague ti wara kogara ti lo na lege, lo kuku na gbe ti lo, lo londo si lo su ngbangba ti lo. Ala hunda tere na popo ti ala: “Ala yeke nzoni?” Na pekoni, ala li na ya ti da ti bongo ti Moïse.

⁸Moïse afa na kogara ti lo peko ti ye so kue KOTA GBIA asara na Faraon nga na azo ti Ezipte ndali ti azo ti Israel. Lo fa nga na lo peko ti akpale so kue ala wara na lege si KOTA GBIA azi ala na ya ni.

⁹Tere ti Zetro anzere ndali ti nzoni ye so kue KOTA GBIA asara na azo ti Israel, so lo zi ala na maboko ti azo ti Ezipte.

¹⁰Zetro atene: “Singila na KOTA GBIA so azi ala na maboko ti azo ti Ezipte nga na maboko ti Faraon so. Singila na lo so lo zi azo ni na gbe ti azo ti Ezipte so!

¹¹Fadeso mbi hinga, mbi tene, KOTA GBIA ayeke kota ahon anzapa kue. Lo fa ni na ngoi so azo ti Ezipte ayeke sara sana na azo ti Israel.”

¹²Na pekoni, Zetro, kogara ti Moïse aya *sandaga so a yeke gbi ni kue na wâ nga na asandaga nde nde na Nzapa. Tongaso Aaron na *akangba ti Israel kue aga ti te kobe na kogara ti Moïse na dawa ti Nzapa.

¹³Lango oko na pekoni, Moïse aduti ti fâ ya ti ngbanga ti azo ni. Ti londo na ndaperere ngbii asi na lakui, azo ni ayeke ku titene lo fâ ya ti ngbanga ti ala.

¹⁴Kogara ti Moïse abaa ye so kue Moïse ayeke sara na azo ni si lo hunda lo, lo tene: “Nyen laa mo yeke sara na azo ni tongaso? Ngbanga ti nyen si mo duti gi mo oko si azo kue aluti lutingo na dawa ti mo, ti londo na ndaperere ngbii asi na lakui so?”

¹⁵Moïse akiri tënë na kogara ti lo, atene: “Azo ni aga na mbage ti mbi ti hunda na Nzapa ye so lo ye.

¹⁶Tongana ala yeke na mbeni tënë, ala yeke ga na mbage ti mbi, mbi yeke fâ ya ti ngbanga na popo ti ala; mbi yeke fa nga na ala ambela ti Nzapa na andia ti lo.”

¹⁷Kogara ti Moïse atene na lo: “Lege ti sarango kua ti mo so ayeke nzoni pepe.

¹⁸Fade mo yeke woko si azo so ayeke na tere ti mo ayeke woko nga. Kua ni ane mingi na ndö ti mo. Mo lingbi ti sara ni gi mo oko pepe.

¹⁹Fadeso, mo ma mbi si! Mbi ye ti mu na mo wango; ayeke nzoni Nzapa aduti na mo. Mo laa mo yeke luti na dawa ti Nzapa na iri ti azo; mo laa mo yeke mu tënë ti ala ti fa na Nzapa.

²⁰Mo laa mo yeke fa na azo ni ambela ti Nzapa na andia ti lo; mo laa mo yeke sara si ala hinga lege so ala lingbi ti tambula daa nga na ye so ala lingbi ti sara.

²¹Fade mo yeke soro nga na popo ti azo ni ambeni zo so alingbi, ala so ayeke kpe mbeto ti Nzapa, ala so azo ane ala, ala so ake tënë ti goro, mo zia ala tongana amakonzi. Mo zia ambeni na ndö ti azo saki oko, ambeni na ndö ti azo ngbangbo oko, ambeni na ndö ti azo baleoku si ambeni na ndö ti azo baleoko.

²²Ala laa ayeke duti lakue ti fâ ya ti ngbanga ti azo. Akota tënë, fade ala yeke ga na ni na dawa ti mo; me akete tënë, ala wani ayeke leke ni. Tongaso si mo zi mbeni kungba na li ti mo, ngbanga ti so mo na ala akangbi ya ti kua ni awe.

²³Tongana mo sara tongaso — tongana biani Nzapa laa amu yanga na mo — fade mo yeke woko pepe. Ti azo ni, fade ala yeke kiri na siriri na ndo ti ala.”

²⁴Moïse ama wango ti kogara ti lo si lo sara ye so kue kogara ti lo atene na lo.

²⁵Na popo ti azo ti Israel kue, Moïse asoro azo so alingbi si lo zia ala makonzi na ndö ti azo ni: ambeni na ndö ti azo saki oko, ambeni na ndö ti azo ngbangbo oko, ambeni na ndö ti azo baleoku si ambeni na ndö ti azo baleoko.

²⁶Amakonzi ni aduti lakue ti fâ ya ti ngbanga ti azo. Atënë so ayeke ngangu, ala yeke ga na ni na Moïse; me akete tënë, ala wani ayeke leke ni.

²⁷Na pekoni, Moïse azia lege na kogara ti lo si kogara ti lo akiri na kodro ti lo.