Read sango Sigingo 2 Bible Online

Sigingo 2 - sango bible

Sigingo 2

¹Mbeni koli ti mara ti Lévi amu mbeni wali ti mara ti Lévi titene aga wali ti lo.

²Wali ni amu ngo si lo du molenge-koli. Lo baa so molenge ni ayeke pendere mingi si lo honde lo nze ota.

³Me lo lingbi ti honde lo ngbii pepe, tongaso lo mu mbeni sakpa so a sara na pere ti yanga ti ngu; lo kanga adu ti tere ti sakpa ni na gudron nga na kole. Lo zia molenge ni na ya ni si lo gue, lo zia sakpa ni na ya ti pere, na yanga ti *bale ti Nil.

⁴Ita ti molenge ni ti wali aluti yongoro ti ku ti baa ye so ayeke si ande na molenge ni.

⁵Na pekoni, molenge ti Faraon ti wali ague ti sukula ngu na ya ti bale ni. Awali so amu peko ti lo ayeke tambula na yanga ti ngu ni. Molenge ti Faraon abaa sakpa ni na ya ti pere si lo tokua mbeni zo ti kua ti lo ti wali ti gue ti mu ni.

⁶Lo zi yanga ti sakpa ni si lo baa kete molenge-koli so ayeke toto. Mawa ti molenge ni asara lo si lo tene: “So mbeni molenge ti ahebro laa!”

⁷Yaya ti kete molenge ni atene na molenge ti Faraon ti wali, atene: “Mo ye titene mbi gue, mbi gi na popo ti ahebro mbeni wali ti mungo me na amolenge titene lo bata molenge ni?”

⁸Molenge ti Faraon ti wali atene na lo: “Mo gue!” Tongaso molenge-wali ni ague, airi mama ti molenge ni.

⁹Molenge ti Faraon ti wali atene na mama ni: “Gue na molenge so, mo mu me na lo; fade mbi yeke futa mo ndali ni.” Wali ni amu molenge ni si lo mu na lo me.

¹⁰So molenge ni amai awe, mama ti lo ague na lo na molenge ti Faraon ti wali. Molenge ti Faraon amu lo tongana molenge ti lo si lo tene: “Ndali ti so mbi gboto lo na ya ti ngu si mbi sigigi na lo, mbi di iri ti lo Moïse.”

¹¹So Moïse aga koli awe, mbeni lâ, lo gue na mbage ti a-ita ti lo si lo baa angangu kua so a mu na ala ti sarango ni. Lo baa nga mbeni zo ti Ezipte so ayeke pika mbeni hebro, mbeni ita ti Moïse ni.

¹²Lo baa ndo mbage na mbage, so lo baa mbeni zo oko ayeke daa pepe, lo fâ zo ti Ezipte ni si lo honde kuâ ti lo na ya ti mbutu.

¹³Lango oko na pekoni, lo kiri lo gue si lo baa ahebro use so ayeke tiri na popo ti ala. Lo tene na zo ti gingo tënë ni, atene: “Mo yeke pika mba ti mo ngbanga ti nyen?”

¹⁴Lo kiri tënë na Moïse, lo tene: “Zo wa laa azia mo makonzi titene mo fâ ngbanga na popo ti e, zo wa? Mo ye ti fâ mbi tongana ti so mo fâ zo ti Ezipte so?” Tongaso mbeto agbu Moïse si lo tene: “Azo ahinga tënë ti ye so mbi sara so awe!”

¹⁵Gbia Faraon ama tënë ni si lo yeke gi lege ti fâ Moïse. Me Moïse alondo na ndo ti Faraon, lo kpe, lo gue, lo duti na sese ti Madian. Kâ, lo duti na tere ti mbeni du ti ngu.

¹⁶Wayango-sandaga ti azo ti mara ti Madian, Zetro ayeke na amolenge-wali mbarambara. Ala ga ti to ngu titene asi ya ti du so ataba na angasa ti babâ ti ala ayeke nyon ka ngu daa.

¹⁷Me ambeni zo ti batango nyama aga, atumba amolenge-wali ni. Tongaso Moïse alondo, lo mu maboko na amolenge-wali ni; lo mu ngu na anyama ti ala titene ala nyon.

¹⁸Amolenge-wali ni akiri na tere ti babâ ti ala Reuel; lo hunda ala, lo tene: “Ngbanga ti nyen si ala kiri laso hio so?”

¹⁹Ala kiri tënë: “Mbeni zo ti Ezipte laa azi e na maboko ti azo ti batango nyama. Gi lo laa lo to ngu na e si lo mu ngu na anyama ti e, ala nyon.”

²⁰Reuel ahunda amolenge ti lo, atene: “Lo yeke na ndo wa? Ala zia lo kâ ngbanga ti nyen? Ala gue, airi lo, lo ga, lo te kobe!”

²¹Moïse ayeda ti ngba na ndo ti Zetro. Zetro amu Sefora, molenge ti lo ti wali, ti ga wali ti Moïse.

²²Sefora adu molenge-koli si Moïse adi iri ti lo Gershom, so ti tene ‘Gene na ndo so’. Biani, Moïse atene lani, atene: “Mbi yeke gene na sese ti awande.”

²³Aninga mingi na pekoni, gbia ti Ezipte akui. Kua ti ngbaa ahon ngangu ti azo ti Israel, ala yeke dema si ala yeke toto; toto ti ala ni asi na Nzapa.

²⁴Nzapa ama demango tere ti ala si lo dabe ti lo na tënë ti mbuki ti lo na Abraham, na Isaac nga na Jacob.

²⁵Nzapa abaa azo ti Israel si tënë ti ala agbu be ti lo.