Read sango Sigingo 22 Bible Online

Sigingo 22 - sango bible

Sigingo 22

¹“Tongana a wara mbeni zo ti nzi so ayeke koro dere ti da ti nzi ye na bi, tongana a pika lo si a fâ lo, fade a yeke baa zo ti fango zo ti nzi ni tongana zo ti fango zo pepe.

²Me tongana lo fâ zo ti nzi ni na kota lâ, fade a yeke baa lo tongana zo ti fango zo. Alingbi zo ti nzi afuta nginza so alingbi ndali ye so lo nzi. Tongana lo yeke na ye ti futa na ni pepe, fade a yeke ka lo na ngbaa.

³“Tongana a wara mbeni nyama na fini le ti lo na ndo ti zo ti nzi: bagara, lele, taba wala ngasa, alingbi zo ti nzi ni azia mbeni nyama na ndö ti so lo nzi so si lo kiri na ni.”

⁴“Tongana zo azia anyama ti lo ti gue ti te pere na yaka ti lo wala na yaka ti *vinye ti lo wani, me anyama ni ague, ate pere na yaka ti mba ti lo wala na yaka ti vinye ti mba ti lo, alingbi wa ti anyama ni amu na mba ti lo ni anzoni le ti kobe ti yaka ti lo wala anzoni le ti kobe ti yaka ti vinye ti lo.

⁵“Tongana zo ayeke gbi asioni pere na ya ti yaka ti lo si wâ ni ague, agbi gba ti *ble so a fâ ni awe, wala ble so ade ti fâ ni pepe wala ble so angba ti mai, alingbi zo ti sarango wâ ni afuta nginza so alingbi ndali ti aye so agbi so.

⁶“Tongana zo amu nginza, wala ambeni ye na mba ti lo titene lo bata si mbeni zo anzi aye ni na da ti mba ti lo ni, tongana a wara zo ti nzi ni, alingbi lo futa aye ni so lo nzi so fani use.

⁷Tongana a wara zo ti nzi ni pepe, fade wa ti da ni ayeke ga ti luti na dawa ti mbi, Nzapa ti lo, lo yeke deba yanga ti lo atene, ni laa ni mu ye ti zo ni pepe.

⁸Tongana tënë alondo ndali ti bagara, lele, taba wala ngasa, kota bongo ti de wala mbeni ye so agirisa si azo use atene: ‘Ye ti mbi laa’, alingbi ala use kue ague na tënë ni na dawa ti mbi: zo so mbi yeke fa lo atene lo laa lo nzi ye ni, fade lo yeke futa nyama ni wala ye ni lege use na mba ti lo.

⁹“Tongana zo amu lele, bagara, taba, ngasa wala nyama ti nyen na mba ti lo titene lo bata si nyama ni akui, wala lo wara ka, wala *azaragina anzi lo si zo oko abaa ala pepe,

¹⁰fade mba ti lo ni ayeke deba na iri ti KOTA GBIA atene, ni laa ni nzi nyama ni pepe. Fade wa ti nyama ni ayeke yeda na dengo ba ti mba ti lo ni si mba ti lo ni ayeke futa mbeni ye oko pepe.

¹¹Me tongana a nzi nyama ni na ndo ti lo, fade lo yeke futa na wa ti nyama ni nginza so alingbi.

¹²Tongana mbeni sioni nyama laa asuru ya ti nyama ni, fade zo ni ayeke mu tanga ti kasa ti nyama ni, lo ga na ni titene azo abaa. Tongaso, fade lo yeke futa mbeni ye oko pepe.

¹³“Tongana mbeni zo ahunda nyama ti mba ti lo ti sara na kua si nyama ni awara ka wala lo kui na ndembe so wani ti lo ayeke daa pepe, fade zo ni ayeke futa mbeni ye na wani.

¹⁴Me tongana wa ti nyama ni ayeke daa si ye ni asi, fade zo so ahunda nyama ni so ayeke futa mbeni ye oko pepe. Tongana zo ni afuta fade mbeni nginza ti sara kua na nyama ni ndali ti mbeni kete ngoi, nginza so lo futa so alingbi awe.”

¹⁵“Tongana koli ahanda mbeni maseka-wali so ade ti hinga koli pepe si alango na lo, fade koli ni ayeke ka nginza ti peko ti maseka-wali ni na babâ ti lo. Na pekoni, koli ni ayeke mu wali ni ti ga wali ti lo.

¹⁶Me tongana babâ ni ake ti mu maseka-wali ni na lo, fade koli ni ayeke futa nginza so alingbi na nginza so a yeke ka ka na peko ti amaseka-wali so ade ti hinga koli pepe.

¹⁷“Wali so ayeke zo ti yoro, fade ala zia lo, lo ngba na fini pepe.

¹⁸“Zo so alango na nyama, alingbi ala fâ lo.

¹⁹“Zo so amu *sandaga na anzapa nde si lo ke ti mu gi na mbi KOTA GBIA, alingbi ala fâ lo.

²⁰“Awande so alango na ndo ti ala, alingbi ala sara sioni na ala pepe wala ala sara ngangu na ala pepe. Biani, ala nga, ala yeke lani awande na sese ti Ezipte.

²¹Alingbi ala sara ngangu pepe na wali-mua nga na nyindu.

²²Tongana ala sara sioni na wali-mua ni nga na molenge ni si ala dekongo na mbi ti mu maboko na ala, fade mbi yeke ma ala.

²³Fade ngonzo ti mbi ayeke londo tongana wâ si mbi yeke fâ azo ti sioni ni na lege ti bira. Tongaso, fade awali ti ala ayeke ga awali-mua si amolenge ti ala ayeke ga anyindu.

²⁴“Tongana ala sara boon ti nginza na zo ti mbi, zo ti mawa so ayeke na popo ti ala, alingbi ala sara ye na lo pepe tongana ambeni zo ti sarango boon so ahunda ye ahon ndoni so. Alingbi ala hunda na zo ti mbi ni ti zia mbeni nginza na ndö ni pepe.

²⁵“Tongana ala mu kota bongo ti de ti mba ti ala ndali ti mbeni ye ti ala so ayeke na maboko ti lo, alingbi ala kiri na lo bongo ni kozoni si lâ akui.

²⁶Biani, gi oko bongo so lo yeke bi na ndö ti lo laa. Tongana ala gbanzi ni, nyen laa lo yeke bi na ndö ti lo ti lango na ni? Tongana lo dekongo na mbi ti mu na lo maboko, fade mbi yeke ma lo. Biani, mbi yeke Nzapa so mbi yeke baa mawa ti zo.

²⁷“Alingbi ala deba Nzapa pepe; ala deba makonzi ti mara ti ala pepe.

²⁸“Ale ti kobe ti ala na ale ti vinye ti ala, ti mbi mbage ni, ala ku kungo pepe ti ga na ni na mbi. “Fade ala zia nde ndali ti mbi kozo molenge ti ala ti koli.

²⁹“Fade ala sara gi mara ti ye so na kozo molenge ti bagara ti ala nga na kozo molenge ti taba ti ala. Fade molenge ti nyama ni ayeke ngba na tere ti mama ti lo lango mbarambara; na lango miombe ni, ala mu lo na mbi.

³⁰“Fade ala yeke duti azo so azia tere ti ala nde ndali ti mbi. Nyama so mbeni sioni nyama asuru ya ti lo, fade ala te kasa ni pepe; ala bi ni na ambo.”