Read sango Sigingo 23 Bible Online

Sigingo 23 - sango bible

Sigingo 23

¹“Alingbi ala fono na atënë ti mvene na iri ti amba ti ala pepe. Zo so asara sioni, ala tene mvene na le ti ngbanga pepe ti gbu koko ti lo.

²Tongana gba ti azo aye ti sara sioni, ala mu peko ti azo ni pepe. Tongana gba ti azo aye ti tene mvene na le ti ngbanga, ala mu peko ti azo ni pepe, tongana azo ni aye ti fâ ngbanga ni na legeni pepe.

³Na le ti ngbanga, ala mu mbage ti zo pepe, ataa zo ni ayeke zo ti mawa.

⁴“Tongana bagara ti wato ti ala wala lele ti lo agirisa si ala wara lo, alingbi ala kiri na ni na lo.

⁵Zo so be ti lo ake ala, tongana ala baa lele ti lo ati na gbe ti nengo kungba, ala zia lo pepe. Alingbi ala mu maboko na zo ni ti yo lele ni na nduzu.

⁶“Na le ti ngbanga, ala sara si fango ngbanga ti zo ti mawa ague kirikiri pepe.

⁷Ala zia mê ti ala ti ma atënë ti mvene pepe. Zo so tënë ayeke na li ti lo pepe wala zo ti mbirimbiri, ala fâ lo pepe. Biani, mbi Kota Gbia, zo so tënë ayeke na li ti lo, mbi yeke zia lo senge tongaso pepe.

⁸Tongana mbeni zo aye ti pete goro na ala, ala yeda na ni pepe, ngbanga ti so goro ayeke vuko le ti zo, ataa zo so le ti lo azi; asara si fango ngbanga ague kirikiri.

⁹“Awande so ayeke na ndo ti ala, alingbi ala sara ngangu na ala pepe. Ala wani ahinga lege ti dutingo ti awande awe, ngbanga ti so ala nga, ala yeke lani awande na sese ti Ezipte.”

¹⁰“Na ya ti ngu omene kue, fade ala yeke lu ale ti kobe na yaka ti ala si ala yeke fâ ale ti kobe ni.

¹¹Me na ngu mbarambara ni, fade ala yeke zia yaka ni awu tere, ala de ni pepe. Tongaso si azo ti mawa so ayeke na popo ti ala alingbi ti wara mbeni ye ti te. Tanga ni so angba, fade anyama ti ngonda ayeke te ni. Fade ala yeke sara gi mara ti ye so na yaka ti *vinye ti ala nga na yaka ti olive ti ala.

¹²“Na ya ti lango omene, fade ala yeke sara akua ti ala. Me na lango mbarambara ni, ala wu tere ti ala; tongaso si bagara ti ala na lele ti ala alingbi ti wu tere ti ala; tongaso si angbaa nga na awande so ayeke na ndo ti ala alingbi ti wu pupu.

¹³“Aye so kue mbi mu yanga daa na ala so, ala sara ye alingbi na ni. Ala sambela ambeni nzapa nde pepe; ala di nga iri ti anzapa ni na yanga ti ala pepe.”

¹⁴“Na ya ti ngu oko oko, fade ala yeke sara akota matanga ota ndali ti mbi.

¹⁵Kozo matanga ni ayeke matanga ti Mapa so a sara na mama ni pepe. Na nze ti Abib, na ya ti lango mbarambara, mapa so a sara na mama ni pepe, ala yeke te ni alingbi na yanga so mbi mu na ala. Biani, na nze ti Abib laa ala sigigi na Ezipte. Fade zo ayeke ga na ya ti da ti mbi maboko senge pepe.

¹⁶Na pekoni, fade ala yeke sara matanga ti ale ti kobe na ndembe so ala yeke fâ akozo le ti kobe so ala lu na yaka. Na peko ti so, na hunzingo ti ngu, tongana ala hunzi fango ale ti kobe ni awe, fade ala yeke sara matanga ti bongbingo ale ti kobe ni.

¹⁷Na ya ti ngu oko oko, fade akoli kue ti mara ti ala ayeke ga fani ota na dawa ti mbi, Kota Gbia NZAPA.

¹⁸“Tongana ala fâ nyama ti mu na mbi na *sandaga, alingbi ala bongbi mapa so a sara na mama ni na mene ti nyama ni pepe. Mafuta ti anyama so ala mu na sandaga na mbi so, ala bata ni na bi ngbii asi kekereke na ndaperere pepe.

¹⁹Fade ala yeke ga na akozo le ti kobe ti yaka ti ala na ya ti da ti mbi KOTA GBIA, Nzapa ti ala. Alingbi ala to molenge ti ngasa na ya ti ngu ti me ti mama ti lo pepe.”

²⁰“Fade mbi yeke tokua mbeni *ange na dawa ti ala ti bata ala na lege; lo yeke sara si ala si na ndo so mbi leke ndali ti ala.

²¹Ala kpe mbeto ti lo, ala ma yanga ti lo. Ala sara ye ti songo be na lo pepe, fade lo yeke zi siokpari na li ti ala pepe, ngbanga ti so lo yeke sara ye na iri ti mbi.

²²Me tongana ala ma yanga ti lo si ala sara ye so kue mbi mu yanga na ala ti sarango ni, fade mbi yeke ga wato ti awato ti ala; mbi yeke ke azo so ayeke ke ala.

²³“Na ndembe so ange ti mbi ayeke tambula na dawa ti ala ti gue na ala na ndo ti azo ti mara ti Amori, ti Het, ti Perizi, ti Kanaan, ti Hivi na ti Yebus, fade mbi yeke hunzi amara ni so kue.

²⁴Fade ala yeke kuku na gbe ti anzapa ti amara ni so pepe, ala yeke voro anzapa ni pepe; ala yeke mu peko ti sarango ye ti amara ni pepe. Me fade ala yeke buba alimo ti anzapa ni biani biani, ala yeke kungbi na sese angbongboro têne ti ala so ala leke si aluti na nduzu so.

²⁵Tongana ala voro gi mbi oko KOTA GBIA, Nzapa ti ala, fade mbi yeke sara tufa na ndö ti kobe ti ala nga na ndö ti ngu ti ala; fade mbi yeke tumba kobela yongoro na tere ti ala.

²⁶Na ya ti kodro ti ala, fade ya ti mbeni wali oko ayeke buba pepe, wala fade mbeni wali oko ti dungo ni pepe ayeke duti daa pepe. Mbi yeke sara titene ala lango na ndö ti gigi so aninga.

²⁷“Amara so ayeke ma tënë ti gango ti ala, mbi yeke sara titene kota mbeto agbu azo ni. Amara so kue ala yeke li na ya ti kodro ti ala, mbi yeke sara titene azo ni akpe kirikiri, mbi yeke sara titene awato ti ala kue akpe na dawa ti ala.

²⁸Mbi yeke tokua akota didiri kozo ti ala titene adidiri ni atumba na dawa ti ala azo ti mara ti Hivi, azo ti Kanaan na azo ti mara ti Het.

²⁹Me mbi yeke tumba amara ni so na dawa ti ala gi na ya ti ngu oko pepe. Tongana mbi sara tongaso, fade kodro ni ayeke ga ngonda si anyama ti ngonda ayeke wu mingi ti sara sioni na ala.

³⁰Fade mbi yeke tumba amara ni kete na kete na dawa ti ala, ngbii asi na ndembe so, ala azo ti Israel, ala yeke ga gbani si ala yeke mu ya ti kodro ni kue titene aga ti ala.

³¹Fade mbi yeke sara titene katikati ti sese ti ala alondo na kota ngu-ingo ti Asosongo ague ngbii asi na kota ngu-ingo ti Mediterane, akiri alondo na benyama ti Sinai ague ngbii asi na *bale ti Efrate. Mbi yeke zia azo ti sese ni na maboko ti ala si ala yeke tumba azo ni.

³²Alingbi ala na azo ni wala ala na anzapa ti azo ni aga ambuki pepe.

³³Alingbi azo ni asara kodro na ndo ti ala pepe, tongaso pepe, fade azo ni ayeke handa ala titene ala sara siokpari so ake mbi. Biani, tongana ala azo ti mbi, ala voro anzapa ti azo ni, fade vorongo anzapa ni ayeke ga tongana kuku ndali ti ala.”