Read sango Sigingo 24 Bible Online

Sigingo 24 - sango bible

Sigingo 24

¹KOTA GBIA atene lani na Moïse, atene: “Mo ma na li ti hoto na mbage ti mbi, mo na Aaron, na Nadab, na Abihu nga na *akangba ti Israel balembarambara. Ala luti yongoro, ala kuku akpo li ti ala na sese.

²Me gi mo, Moïse oko, mo yeke ga nduru na mbi KOTA GBIA. Tanga ti azo ni ayeke ga nduru pepe, fade mo na azo ni ayeke ma na li ti hoto ni pepe.”

³Moïse aga afa na azo ni peko ti atënë kue ti KOTA GBIA nga na andia ti lo kue. Azo ni kue akiri tënë yanga oko, atene: “Atënë so kue KOTA GBIA atene, fade e yeke sara ye alingbi na ni.”

⁴Moïse asu na mbeti atënë kue ti KOTA GBIA. Na pekoni, lo londo na kota ndaperere, lo leke mbeni gbalaka na gbe ti hoto ni; lo leke nga angbongboro têne baleoko na use aluti na nduzu ndali ti mara baleoko na use ti Israel.

⁵Lo tokua ambeni maseka ti Israel ti gue ti mu na KOTA GBIA *sandaga so a yeke gbi ni kue na wâ, ti fâ akoli-bagara ti mu na sandaga ti beoko.

⁶Moïse amu ndambo ti mene ti anyama ni, lo zia na ya ti adu ti sembe; tanga ti mene ni, lo fi na ndö ti gbalaka ni.

⁷Lo mu mbeti ti mbuki si lo diko na le ti azo ni. Azo ni atene: “Atënë so kue KOTA GBIA atene, fade e yeke sara ye alingbi na ni, fade e yeke ma yanga ti lo.”

⁸Moïse amu mene ni, lo fi na tere ti azo ni si lo tene: “So ayeke mene ti mbuki so Nzapa asara ndali ti ala laa; lo sara ni alingbi na atënë ti ndia so kue.”

⁹Na pekoni, Moïse ama na li ti hoto, lo na Aaron, na Nadab, na Abihu nga na akangba ti Israel balembarambara.

¹⁰Ala baa Nzapa ti Israel. Mbeni ye so ayeke tongana kpangbara têne so iri ni safir si ayeke za zango tongana ti le ti nduzu, ayeke na gbe ti gere ti lo.

¹¹Nzapa asara sioni na akota zo ti Israel so pepe. Ala baa lo, na pekoni, ala te, ala nyon.

¹²KOTA GBIA atene na Moïse: “Ma na li ti hoto na mbage ti mbi, mo duti na ndo so. Mbi yeke mu na mo akpangbara têne so mbi su atënë ti *Ndia na le ni titene mo fa na azo ti Israel.”

¹³Moïse alondo, lo na Josué, zo ti mungo maboko na lo, ala ma na li ti hoto ti Nzapa.

¹⁴Kozo titene Moïse ama na li ti hoto ni, lo tene na *akangba ni, lo tene: “Ala ku e ge ngbii e kiri, e ga, e wara ala. Aaron na Hur ayeke ngba na tere ti ala. Zo so ayeke na mbeni tënë, fade lo baa ala.”

¹⁵So Moïse ayeke ma na li ti hoto ni, mbinda akanga ndö ti hoto ni kue.

¹⁶Gonda ti KOTA GBIA angba na ndö ti hoto ti Sinai si mbinda akanga ndö ti hoto ni na ya ti lango omene. Na lango mbarambara ni, kâ na ya ti mbinda ni, KOTA GBIA airi Moïse.

¹⁷Azo ti Israel abaa gonda ti KOTA GBIA tongana mbeni wâ so ayeke gbi ye kue na li ti hoto ni.

¹⁸Moïse ali na ya ti mbinda ni si lo ma na li ti hoto ni. Lo ngba kâ lango baleosio na bi baleosio.