Read sango Sigingo 28 Bible Online

Sigingo 28 - sango bible

Sigingo 28

¹“Moïse, na popo ti azo ti Israel, mo mu ita ti mo Aaron na tere ti mo, lo na amolenge ti lo Nadab, Abihu, Elazar na Itamar titene ala sara kua na mbi tongana awayango-sandaga.

²Fade mo yeke mu yanga titene a fu abongo ti awayango-sandaga ndali ita ti mo Aaron. Ayeke nzoni abongo ni alingbi na gonda ti lo nga na nengo ti lo.

³Ndali ni, fade mo yeke tene tënë na azo so kue ayeke sara ye na kode, ala so mbi mu na ala kota ndara ti fu abongo ti Aaron. Lo yeke yu abongo ni na ndembe so a yeke zia lo nde ti sara kua ti wayango-sandaga nga na ngoi so lo yeke sara kua ni.

⁴Abongo so ala yeke fu ayeke so: bozo, *efod, kaba, yongoro bongo ti gbeni so a sara apendere nzoroko na tere ni, bongo so a yeke kanga na li tongana kpoto nga na kamba ti ndö ti bongo. Ita ti mo Aaron na amolenge ti lo ayeke yu abongo ni titene ala sara kua na mbi tongana awayango-sandaga.

⁵Fade azo ti kpongo bongo na apendere nzoroko ayeke mu kamba so a sara na lôro, bongo so nzoroko ni akpa le ti nduzu na bongo so abe bengo, bengba bongo so ayeke za zango nga na *len ti fu na abongo ni.”

⁶“Fade azo ti sarango ye na kode ayeke fu *efod ni na kamba ti *len so akpengba kpengbango, ala yeke bongbi ni na bongo so nzoroko ni akpa le ti nduzu, bongo so abe bengo, bengba bongo so ayeke za zango. Ala yeke kpo apendere nzoroko na tere ti efod ni na kamba so a sara na lôro.

⁷Fade ala yeke fu akamba use na yanga ti efod ni ti kanga na ni na ndö ti go.

⁸Ala yeke sara titene akamba ti efod ni na efod ni aga gi ye oko. Ala yeke sara nga ni na kamba ti len so akpengba kpengbango, ala yeke bongbi ni na bongo so nzoroko ni akpa le ti nduzu, bongo so abe bengo, bengba bongo so ayeke za zango. Ala yeke kpo apendere nzoroko na tere ni na kamba so a sara na lôro.

⁹Fade mo yeke mu atêne ti kornaline use si mo yeke kpaka iri ti amolenge ti Jacob na ndö ni.

¹⁰Mo yeke kpaka iri ti amolenge omene na ndö ti kozo têne ni; mo yeke kpaka iri ti tanga ti amolenge omene ni na ndö ti use têne ni. Mo yeke kpaka iri ni na lege ti molongo ti dungo ala.

¹¹Tongana ti so zo ti sarango ye na kode ayeke kpaka iri na ndö ti atêne, mo yeke kpaka iri ti amolenge ni na ndö ti atêne use so tongana ti so a yeke kpaka iri ti zo na ndö ti *ye ti kpongo na nzoroko. Na pekoni, mo yeke zia atêne ni na ya ti akadere use ti lôro.

¹²Mo yeke zia atêne use so na tere ti akamba ti ndö ti go ti efod ni. Atêne ni ayeke ga mbeni ye ti dango be ndali ti amara baleoko na use ti Israel. Tongaso, fade Aaron ayeke yo na ndö ti go ti lo iri ti ala ti gue na ni na dawa ti mbi KOTA GBIA. Ti mbi KOTA GBIA, mbi yeke dabe ti mbi na ala lakue.

¹³Fade akadere use so ayeke duti na lôro,

¹⁴a yeke kanga na tere ni akete zingiri use ti lôro ti nzoni ni. Ala yeke sara akamba ni tongana pete.”

¹⁵“Fade azo ti sarango ye na kode ayeke sara bozo ti fango ngbanga. Ala yeke sara ni tongana ti so a sara na *efod so. Ala yeke sara ni na kamba ti *len so akpengba kpengbango, ala yeke bongbi ni na bongo so nzoroko ni akpa le ti nduzu, bongo so abe bengo, bengba bongo so ayeke za zango. Ala yeke kpo apendere nzoroko na tere ni na kamba so a sara na lôro.

¹⁶Tongana a kungbi ya ni use, fade yongoro ti bozo ni ayeke duti santimetere baleuse na oku alingbi tere mbage na mbage kue.

¹⁷Ala yeke zia atêne ti ngangu ngere na yanga ni. Molongo ti atêne ni ayeke duti osio. Na kozo molongo ni, ala yeke zia rubis, topaze na emerode.

¹⁸Na use molongo ni, ala yeke zia grena, safir na diaman.

¹⁹Na ota molongo ni, ala yeke zia yasente, agate na ametiste.

²⁰Na osio molongo ni, ala yeke zia krizolite, kornaline na zaspe. Ala yeke zia têne oko oko na ya ti kadere so a sara na lôro.

²¹Ala yeke kpaka iri ti amolenge ti Jacob baleoko na use na ndö ti têne oko oko, tongana ti so a yeke kpaka iri ti zo na ndö ti *ye ti kpongo na nzoroko. Fade wungo ti atêne ni ayeke lingbi na wungo ti amara baleoko na use ti Israel.

²²“Ndali ti bozo ni, ala yeke sara akete zingiri use tongana ti so a yeke sara pete; ala yeke sara azingiri ni na lôro ti nzoni ni.

²³Ala yeke mu lôro, ala sara na *akati use si ala yeke zia ni na andangoro use ti bozo ni na mbage ti nduzu.

²⁴Akete zingiri so a sara na lôro so, fade ala yeke kanga ni na tere ti akati use so ayeke na andangoro use ti bozo ni.

²⁵Ala yeke kanga nga mbeni yanga ti akete zingiri ni na tere ti akadere so a sara na lôro si ayeke na ndö ti go ti efod so. Ala yeke kanga ni titene bozo ni aduti na mbage ti dawa.

²⁶Ala yeke mu lôro, ala sara na ambeni kati use; ala yeke zia ni na andangoro use ti bozo ni na mbage ti gbeni, na ndo so abaa le na efod ni.

²⁷Ala yeke mu lôro, ala sara na ambeni kati use; ala yeke zia ni na yanga ti akamba ti ndö ti go ti efod ni, na mbage ti dawa, na ndo so a fu ni daa so. Fade ala yeke zia akati ni na ndö ti akamba ti efod ni.

²⁸Ala yeke tengbi akati ti bozo ni na akati ti efod ni na mbeni kamba so nzoroko ni akpa le ti nduzu. Tongaso si bozo ni alango na ndö ti kamba ti efod ni si bozo ni alingbi ti hon mbage na mbage pepe.

²⁹“Tongaso, tongana Aaron ayeke li na ya ti da so ayeke nde si ayeke nzoni kue, fade lo yeke yu bozo ti fango ngbanga so na kate ti lo. A su iri ti amara baleoko na use ti Israel na ndö ti bozo ni. Na lege so, fade mbi KOTA GBIA, mbi yeke dabe ti mbi na ala lakue.

³⁰Ti mo Moïse, fade mo yeke zia na ya ti bozo ti fango ngbanga ni Urim na Tumim. Tongaso aye ni ayeke duti na kate ti Aaron na ndembe so lo yeke ga na dawa ti mbi. Biani, Aaron ayeke yu aye so lakue na kate ti lo na ndembe so lo yeke ga na dawa ti mbi, tongaso si lo lingbi ti hinga ye so be ti mbi aye na mbage ti azo ti Israel.”

³¹“Fade ala yeke mu bongo so nzoroko ni kue akpa le ti le ti nduzu, ala fu na kaba ti yu na gbe ti *efod ni.

³²Titene a yu kaba ni, ala yeke koro go ni taa gi na be ti mapia-bongo ni. Ala yeke pika yanga ni kue na kpengbango kamba titene asuru pepe.

³³Na yanga ti kaba ni, na mbage ti gbeni, ala yeke zia ambeni ye ti pendere daa, angoro ni kue: ambeni le ti keke so a iri grenade si nzoroko ni akpa le ti nduzu, abe bengo na mbeni so abe si ayeke za zango. Na popo ti ale ti grenade ni, ala yeke zia nga ambeni ye so ayeke toto ngrengre so a sara na lôro.

³⁴Na yanga ti kaba ni, ye so ayeke toto ngrengre si a sara na lôro so, ala yeke zia ni oko, ala yeke zia le ti grenade oko, ala yeke zia ye ti lôro oko, ala yeke zia le ti grenade oko. Ala yeke zia aye ni tongaso angoro yanga ni kue.

³⁵Fade Aaron ayeke yu bongo ni so na ndembe so lo yeke sara kua ti wayango-sandaga. Tongana lo yeke li na ya ti da so ayeke nde si ayeke nzoni kue na le ti mbi KOTA GBIA, fade azo ayeke ma toto ti aye so atoto ngrengre so, wala tongana lo yeke sigigi na ya ti da ni, fade azo ayeke ma nga toto ni. Tongaso si lo kui pepe.

³⁶“Fade ala yeke mu lôro ti nzoni ni, ala leke na mbeni palata so akpa kongo, ala yeke kpaka na ndö ni mbeni tënë tongaso: ‘Ye so a zia nde ndali ti KOTA GBIA.’

³⁷Ala yeke mu kamba so nzoroko ni akpa le ti nduzu, ala kanga na palata ni na ndö ti bongo so a yeke kanga na li tongana kpoto, na dawa ni.

³⁸Aaron ayeke yu palata ni so lakue na ndö ti le ti lo na ndembe so lo yeke ga na dawa ti mbi KOTA GBIA. Ndali ni, mbi yeke yeda na *asandaga so azo ti Israel ayeke ya na mbi, ataa ala sara asioni ye na lege ti gango na asandaga ni na mbi.

³⁹“Fade zo ti kpongo bongo na apendere nzoroko ayeke fu na Aaron mbeni kota bongo so a sara na *len, mbeni bongo so a yeke kanga na li tongana kpoto si a sara na len, nga na kamba ti ndö ti bongo so a kpo apendere nzoroko daa.

⁴⁰“Ti amolenge ti Aaron, fade ala yeke fu abongo, akamba ti ndö ti bongo nga na akpoto na ala; abongo ni ayeke lingbi na gonda ti ala nga na nengo ti ala.

⁴¹“Ti mo Moïse, mo yeke yu abongo ni so na Aaron, ita ti mo nga na amolenge ti lo. Mo yeke tuku mafuta na li ti ala si mo yeke zia ala ti sara kua na mbi. Na lege so laa mo yeke zia ala nde titene ala sara kua na mbi tongana awayango-sandaga.

⁴²Titene azo abaa tere ti ala ti koli pepe, fade mo yeke mu len, mo fu na ala kilote ti yu na gbe ti bongo ni. Kilote ni ayeke londo na ngbonda ti ala ague, asi nduru na likunu ti ala.

⁴³Fade Aaron na amolenge ti lo ayeke yu abongo ni na ndembe so ala yeke li na ya ti da ti bongo so KOTA GBIA na azo ti lo ayeke wara tere daa, wala na ndembe so ala yeke gue nduru na tere ti gbalaka ti sara kua na ndo so ayeke nde si ayeke nzoni kue; tongaso si ala duti ndumbu pepe. Tongana ala duti fade ndumbu, ka ala yeke kui. Ndia so ayeke ngba kpu na kpu ndali ti Aaron na *ahale ti lo.”