Read sango Sigingo 3 Bible Online

Sigingo 3 - sango bible

Sigingo 3

¹Moïse ayeke bata ataba na angasa ti kogara ti lo Zetro, wayango-sandaga ti azo ti mara ti Madian. Mbeni lâ, lo mu anyama ni, lo gue na ala na mbage ti benyama kâ, lo si na Horeb, hoto ti Nzapa.

²*Ange ti KOTA GBIA asi na lo na ya ti menga ti wâ, na ya ti mbeni kete keke ti ki. Moïse abaa ndo si lo baa so ya ti keke ni kue gi wâ, me wâ ni agbi keke ni pepe.

³Moïse atene na be ti lo: “Mbi yeke ngoro ti gue ti baa kota ye ti ndima so. Ngbanga ti nyen si wâ agbi keke ni pepe so?”

⁴So KOTA GBIA abaa atene, Moïse angoro ti baa ye ni so, na ya ti kete keke ti ki ni kâ, Nzapa airi lo: “Moïse, Moïse!” Moïse ayeda, atene: “Mbi laa!”

⁵KOTA GBIA atene: “Ga nduru na kete keke ni pepe! Zi poro na gere ti mo, ngbanga ti so ndo so mo yeke luti daa so ayeke nde si ayeke nzoni kue.

⁶Mbi yeke Nzapa ti babâ ti mo, Nzapa ti Abraham, Nzapa ti Isaac na Nzapa ti Jacob.” Tongaso Moïse ahonde le ti lo, ngbanga ti so lo yeke na mbeto ti baa Nzapa.

⁷KOTA GBIA akiri atene: “Mbi baa biani lege so azo ti mbi ayeke baa pasi na Ezipte; mbi ma toto ti ala ndali ti aye ti ngangu so amakonzi ti kua ti Ezipte ayeke sara na ala. Biani, mbi hinga pasi so ala yeke na ya ni.

⁸Nilaa mbi zu ti zi ala na maboko ti azo ti Ezipte, ti mu ala na sese so ala yeke daa, ti gue na ala na mbeni nzoni sese so akono, so *ngu ti me ti bagara na mafuta ti wotoro asi singo daa. Sese ni ayeke sese ti azo ti Kanaan, ti azo ti mara ti Het, ti Amori, ti Perizi, ti Hivi na ti Yebus.

⁹Fadeso, toto ti azo ti Israel ague na nduzu ngbii asi na mbi awe; mbi baa nga lege so azo ti Ezipte ayeke sara pasi na ala.

¹⁰Fadeso, mbi yeke tokua mo. Gue na ndo ti gbia Faraon, mo zi azo ti Israel, azo ti mbi na sese ti Ezipte, mo sigigi na ala!”

¹¹Moïse atene na Nzapa, atene: “Mbi yeke zo wa ti gue na ndo ti Faraon ti zi azo ti Israel na sese ti Ezipte ti sigigi na ala?”

¹²Nzapa atene na lo: “Fade mbi yeke na mo. Ye so ayeke fa atene mbi laa mbi tokua mo ayeke so: Tongana mo zi azo ti Israel na sese ti Ezipte mo sigigi na ala, fade mo na ala ayeke voro mbi na ndö ti hoto so.”

¹³Moïse atene na Nzapa: “Nzoni ma! Fade mbi yeke gue ti wara azo ti Israel si mbi yeke tene na ala: ‘Nzapa ti akotara ti ala atokua mbi na ala’. Me tongana ala hunda mbi, atene: ‘Iri ti lo ayeke nyen?’ Fade mbi yeke tene na ala nyen?”

¹⁴Nzapa atene na Moïse: “MBI YEKE SO MBI YEKE”. Fade mo tene na azo ti Israel, mo tene: “MBI YEKE laa atokua mbi na ala.”

¹⁵Nzapa akiri atene na Moïse: “Fade mo tene na azo ti Israel, mo tene: ‘KOTA GBIA, Nzapa ti akotara ti ala, Nzapa ti Abraham, Nzapa ti Isaac, Nzapa ti Jacob laa atokua mbi na ala.’ So iri ti mbi kpu na kpu laa; iri so azo ti angoi kue ayeke iri mbi na ni laa.

¹⁶Fadeso, gue, mo bongbi *akangba ti Israel si mo tene na ala: ‘KOTA GBIA, Nzapa ti akotara ti ala, Nzapa ti Abraham, Nzapa ti Isaac na Nzapa ti Jacob asi na mbi, lo tene: Mbi yeke ga biani ti mu maboko na ala ndali ti ye so azo ayeke sara na ala na Ezipte.

¹⁷Nilaa mbi tene: Mbi yeke zi ala na sese ti Ezipte, ndo so ala yeke baa pasi daa mingi so, ti sigigi na ala. Mbi yeke gue na ala na sese ti azo ti Kanaan, azo ti mara ti Het, ti Amori, ti Perizi, ti Hivi na ti Yebus, *sese so ngu ti me ti bagara na mafuta ti wotoro asi singo daa.’

¹⁸“Azo ti Israel ayeke ma ande mo; tongaso mo na akangba, ala yeke gue na ndo ti gbia ti Ezipte si ala yeke tene na lo: ‘KOTA GBIA, Nzapa ti ahebro afa tere ti lo na e. Fadeso, mu na e lango ota, e gue na benyama, e mu *sandaga na KOTA GBIA, Nzapa ti e.’

¹⁹Me mbi hinga so gbia ti Ezipte ayeke zia lege na ala pepe titene ala gue, gi tongana a gbu lo na ngangu si.

²⁰Tongaso, mbi yeke yoro maboko ti mbi ti pika sese ti Ezipte na lege ti aye ti kpene nde nde. Na pekoni, gbia ni ayeke zia lege na ala titene ala gue.

²¹Fade mbi yeke sara titene azo ti Ezipte abaa ala na nzoni le si na guengo ti ala, azo ti Israel, ala yeke gue maboko senge pepe.

²²Wali oko oko ti Israel ayeke hunda na awali ti Ezipte so ayeke nduru na lo nga na awali so ayeke lango na da ti lo aye ti pendere so a sara na lôro nga na wen ti nginza; lo yeke hunda nga abongo. Fade amolenge ti ala, azo ti Israel, ala ti koli na ti wali laa ayeke yo ni. Lege so ala yeke zi amosoro kue ti azo ti Ezipte na maboko ti ala laa.”