Read sango Sigingo 34 Bible Online

Sigingo 34 - sango bible

Sigingo 34

¹KOTA GBIA atene na Moïse: “Mo leke akpangbara têne use tongana ti kozoni so. Fade mbi yeke su na le ni gi atënë so ayeke lani na le ti akozo têne so mo fâ ya ni so.

²Kekereke na ndaperere, mo leke tere ti mo. Na kota ndaperere, mo gue na ndö ti hoto ti Sinai, mo luti kâ na dawa ti mbi na li ti hoto ni.

³Ayeke nzoni mbeni zo amu peko ti mo pepe! Mbeni zo asi nga na ndö ti hoto ni pepe; ataa taba, ataa ngasa wala bagara alingbi ti te pere nduru na hoto ni pepe.”

⁴Moïse aleke atêne use si aga kpangbara tongana ti kozoni so. Na kota ndaperere, lo londo, lo gue na li ti hoto ti Sinai alingbi gi na yanga so KOTA GBIA amu na lo. Lo mu atêne ni si lo gue na ni.

⁵KOTA GBIA azu na ya ti ngbongboro mbinda si lo luti kâ na tere ti Moïse. Lo di iri ti lo: “KOTA GBIA”.

⁶KOTA GBIA ahon na dawa ti Moïse si lo to mbela, lo tene: “Mbi yeke KOTA GBIA! Mbi yeke KOTA GBIA, Nzapa so mbi yeke baa mawa ti zo, mbi yeke sara nzoni be na zo, mbi yeke sara ngonzo hio hio pepe, nzoni be ti mbi asi singo si mbi yeke bata tënë ti yanga ti mbi lakue.

⁷Mbi yeke sara nzoni be na azo ngbii asi na molongo ti ala saki oko. Azo so asara sioni, azo so asara ngangu li na azo so asara siokpari, mbi yeke kanga be na ala; me zo so tënë ayeke na li ti lo, mbi yeke zia lo senge pepe. Azo so asara siokpari, mbi yeke sara titene siokpari ti azo ni akiri na ndö ti amolenge ti ala na *ahale ti ala ngbii asi na molongo ota ni wala osio ni.”

⁸Hio tongaso, Moïse akuku, akpo li ti lo na sese ti voro KOTA GBIA.

⁹Na pekoni, lo tene: “Kota Gbia, tongana mo baa mbi na nzoni le, ayeke nzoni KOTA GBIA, mo tambula na popo ti e! Biani, azo so ayeke azo ti ngangu li. Me ayeke nzoni mo zi sioni ti e na siokpari ti e na li ti e; mo baa e tongana ye so aga ti mo!”

¹⁰KOTA GBIA atene na Moïse: “Mbi yeke sara titene mbi na ala e ga ambuki. Na le ti azo ti mo kue, fade mbi yeke sara aye ti dongo be so ade ti si laoko pepe na mbeni ndo na ndö ti sese so wala na popo ti mbeni mara. Fade azo so kue angoro mo ayeke baa akota ye so mbi sara na lege ti mo si aye ni ayeke zia mbeto na be ti ala.

¹¹“Ye so mbi mu yanga daa na ala laso, ala sara ye mbirimbiri alingbi na ni. Mbi yeke tumba na dawa ti ala azo ti mara ti Amori, azo ti Kanaan, azo ti mara ti Het, ti Perizi, ti Hivi na ti Yebus.

¹²Kodro so ala yeke gue daa so, ala sara hange si ala na azo ni aga ambuki pepe. Tongaso pepe, fade ye ni ayeke ga kuku ti gbungo ala.

¹³Fade ala yeke kungbi na sese agbalaka ti azo ni, ala yeke kungbi angbongboro têne ti ala so ala leke si aluti na nduzu, ala yeke de na sese akeke so azo ni aleke aluti na nduzu si ala yeke voro ni so.

¹⁴Fade ala yeke kuku akpo li ti ala na sese na gbe ti mbeni nzapa nde pepe, ngbanga ti so iri ti KOTA GBIA ayeke: ‘Lo so lo yeke sara mbanda’. Biani, mbi yeke Nzapa so mbi yeke sara mbanda.

¹⁵Tongaso, alingbi ala na azo ti kodro ni aga ambuki pepe. Tongaso pepe, tongana azo ni ayeke kpe na peko ti anzapa ti ala si ayeke mu *asandaga na anzapa ni, gbaa fade azo ni ayeke tisa ala, azo ti Israel ti te kobe so azo ni ayeke mu na sandaga na anzapa ti ala ni.

¹⁶Tongana ala mu awali ti kodro ni ti ga awali ti amolenge ti ala, fade awali ni ayeke kpe na peko ti anzapa ti ala si ala yeke handa amolenge ti ala, azo ti Israel ti kpe nga na peko ti anzapa ti awali ni.

¹⁷“Alingbi ala kporo wen ti sara na mbeni yanda pepe.

¹⁸“Alingbi ala sara matanga ti Mapa so a sara na mama ni pepe: na ya ti lango mbarambara na nze ti Abib, fade ala yeke te mapa so a sara na mama ni pepe alingbi na yanga so mbi mu na ala. Biani, lani na nze ti Abib laa ala sigigi na Ezipte.

¹⁹“Amolenge so kue azi lege ti dungo ni na mama ti ala ayeke ti mbi. Ataa akozo molenge-koli ti nyama, ataa akozo molenge-koli ti taba wala ti ngasa, fade ala yeke mu ala na mbi.

²⁰Me tongana ayeke kozo molenge ti lele, fade ala yeke sanze lo na kete taba wala na kete ngasa. Tongana ala sanze lele ni pepe, fade ala pete go ti lo, ala fâ lo. Me ti akozo molenge-koli ti ala azo, fade ala yeke kiri ti vo ala vongo. “Fade zo ayeke ga na ya ti da ti mbi maboko senge pepe.

²¹“Fade ala yeke sara kua na ya ti lango omene, me na lango mbarambara ni, ala yeke wu tere ti ala. Ataa ayeke ngoi ti fango yaka wala ngoi ti fango ale ti kobe, ala yeke sara kua pepe.

²²“Fade ala yeke sara matanga ti ale ti kobe na ndembe so ala yeke fâ akozo le ti *ble. Na hunzingo ti ngu, fade ala yeke sara matanga ti ale ti kobe ni.

²³“Na ya ti ngu oko oko, fade akoli kue ti mara ti ala ayeke ga fani ota na dawa ti mbi Kota Gbia, NZAPA ti Israel.

²⁴Fade mbi yeke tumba amara nde na dawa ti ala, mbi yeke sara si sese ti ala, azo ti Israel akono. Na ndembe so ala yeke gue fani ota na ya ti ngu oko oko na dawa ti mbi KOTA GBIA, Nzapa ti ala, zo oko ayeke tara ti mu sese ti ala pepe.

²⁵“Mapa so a sara na mama ni, fade ala yeke bongbi ni na sandaga ti anyama ti ga na ni na mbi pepe. Nyama so a mu na sandaga ndali ti *matanga ti Pake, ala yeke bata ni, ti londo na bi ngbii asi na ndaperere pepe.

²⁶Fade ala yeke ga na akozo le ti kobe ti yaka ti ala na ya ti da ti mbi KOTA GBIA, Nzapa ti ala. Alingbi ala to molenge ti ngasa na ya ti ngu ti me ti mama ti lo pepe.”

²⁷KOTA GBIA atene na Moïse: “Su andia so na mbeti, ngbanga ti so na lege ti andia so laa mbi yeke sara mbuki na mo nga na azo ti Israel.”

²⁸Moïse angba na KOTA GBIA na ndo so lango baleosio na bi baleosio. Lo te kobe pepe, lo nyon ngu pepe. Lo su na ndö ti atêne ni atënë ti mbuki so ayeke Andia baleoko.

²⁹Moïse alondo na li ti hoto ti Sinai ti zu; atêne use so a su atënë ti ndia na le ni ayeke na maboko ti lo. So lo yeke zu, ndö ti le ti lo ayeke za zango, ngbanga ti so lo na KOTA GBIA atene tënë. So ndö ti le ti lo ayeke za so, lo hinga ye oko daa pepe.

³⁰So Aaron na azo ti Israel kue abaa so ndö ti le ti Moïse ayeke za zango, mbeto ti ga nduru na lo asara ala.

³¹Moïse airi ala; Aaron na amakonzi kue ti bongbi ti azo ni aga na mbage ti lo si lo tene tënë na ala.

³²Na pekoni, azo ti Israel kue aga nduru na tere ti Moïse si lo fa na ala peko ti atënë ti yanga ti KOTA GBIA so kue lo mu na Moïse na li ti hoto ti Sinai.

³³So Moïse ahunzi ti tene tënë na ala awe, lo bi bongo na le ti lo.

³⁴Ti londo na ngoi ni so, lakue tongana lo yeke ga na dawa ti KOTA GBIA ti tene tënë na lo, lo yeke zi bongo ni na le ti lo ngbii lo sigigi si. Tongana lo sigigi ti tene na azo ti Israel peko ti atënë ti yanga so KOTA GBIA amu na lo,

³⁵azo ti Israel ayeke baa so ndö ti le ti Moïse ayeke za zango. Na pekoni, Moïse akiri abi bongo ni na le ti lo ngbii asi na ngoi so lo yeke kiri ti tene tënë na KOTA GBIA.