Read sango Sigingo 36 Bible Online

Sigingo 36 - sango bible

Sigingo 36

¹“Besalel, Oholiab na azo ti ndara so kue *KOTA GBIA amu na ala ndara na hingango ndo titene ala hinga ti sara akua kue ti da so ayeke nde si ayeke nzoni kue so, fade ala yeke sara aye so kue KOTA GBIA amu yanga na ala ti sara.”

²Moïse airi Besalel, Oholiab nga na azo so kue KOTA GBIA asara si ala si singo na ndara; ala kue ayeda na be ti ala wani ti sara akua ni.

³Moïse amu na ala aye so kue azo ti Israel aga na ni ndali ti kua ti da so ayeke nde si ayeke nzoni kue so. Me lakue na ndaperere, azo angba ti ga na aye na Moïse na be ti ala wani.

⁴Tongaso azo ti ndara so kue ayeda ti sara kua ti da ni azia kua ti ala oko oko kue si ala gue

⁵atene na Moïse: “Azo aga na aye mingi ahon ti so alingbi na kua so KOTA GBIA amu yanga ti sarango ni.”

⁶Moïse amu yanga na azo ti to mbela na ya ti bâbâ ni kue, atene: “Alingbi zo oko, ataa koli, ataa wali akiri amu ye ndali ti kua ti da ni pepe!” Nilaa azo azia ti ga na ye,

⁷ngbanga ti so aye so azo aga na ni alingbi awe ti sara na kua ti da ni. Tanga ni angba ngbango.

⁸Azo so ahinga ti sara kua nzoni asara da so Nzapa ayeke duti daa; ala sara ni na amapia-bongo baleoko so ayeke na kamba ti *len so akpengba kpengbango, so a bongbi ni na kua ti tere ti taba so nzoroko ni akpa le ti nduzu, na mbeni so abe bengo si mbeni abe si ayeke za zango. Ala kpo limo ti *asheruben na tere ni.

⁹Amapia-bongo ni kue alingbi tere: yongoro ni metere baleoko na osio si konongo ti le ni metere use.

¹⁰Ala mu amapia-bongo oku, ala tengbi ni si aga kota mapia-bongo oko; ala mu nga tanga ti amapia-bongo oku ni, ala tengbi ni si aga kota mapia-bongo oko.

¹¹Ala mu yanga ti bongo so nzoroko ni akpa le ti nduzu, ala sara na kamba si ala fu ni na tere ti yanga ti kozo kota mapia-bongo ni. Ala fu nga gi mara ti yanga ti bongo so na tere ti yanga ti use kota mapia-bongo ni.

¹²Ala zia kamba baleoku so na yanga ti kozo kota mapia-bongo ni, kamba baleoku na yanga ti use kota mapia-bongo ni. Kamba oko oko ti kozo kota mapia-bongo ni na akamba ti use kota mapia-bongo ni abaa le ti tere.

¹³Ala sara *akongi baleoku so ayeke na lôro. Na pekoni, ala gbu yanga ti akota mapia-bongo use so na akongi ni, ala tengbi ni si da ni aga gi oko.

¹⁴Na pekoni, ala sara akota mapia-bongo baleoko na oko na kua ti tere ti ngasa si aga use ye ti bingo na li ti da ni.

¹⁵Amapia-bongo ni baleoko na oko kue alingbi tere: yongoro ni metere baleoko na oku, konongo ti le ni metere use.

¹⁶Ala tengbi yanga ti akota mapia-bongo oku daa. Na pekoni, ala tengbi nga yanga ti tanga ti akota mapia-bongo omene so daa.

¹⁷Ala fu kamba baleoku na yanga ti kozo kota mapia-bongo ni, kamba baleoku na yanga ti use kota mapia-bongo ni.

¹⁸Ala sara akongi baleoku na bengba wen ti gbu na akota mapia-bongo ni si da ni aga gi oko.

¹⁹Ti bata use li ti da ni, ala mu poro ti koli-taba so a kpaka bengba nzoroko na tere ni, ala sara na ye ti kangango na li ti da ni; ala sara nga mbeni ye ti kangango na li ti da ni na apendere poro ti nyama, ala zia na ndö ni.

²⁰Na pekoni, ala mu keke ti akasia, ala sara na *amabaya; ala zia ni aluti na nduzu ti gbu na da so Nzapa ayeke duti daa.

²¹Yongoro ti mabaya oko oko ayeke metere oku si nduru ni santimetere balembarambara na oku.

²²Ala sara amabaya ni kue alingbi tere: na mbage ti gbeni, ala zia anduru keke use so abaa le ti tere.

²³Ala sara amabaya baleuse, ala zia na mbage ti Mbongo ti da ni.

²⁴Na pekoni, ala mu wen ti nginza, ala sara na gere ni baleosio si amabaya ni aluti na ndö ni. Gere ni use use ayeke ndali ti mabaya oko oko alingbi na anduru keke use.

²⁵Ala sara nga amabaya baleuse ndali ti use mbage ti da ni, na mbage ti Banga.

²⁶Ala mu wen ti nginza, ala sara na gere ni baleosio si amabaya ni aluti na ndö ni. Gere ni use use ayeke ndali ti mabaya oko oko.

²⁷Ti peko ti da ni, na mbage ti Do, ala sara mabaya omene;

²⁸ala sara nga mabaya use ti zia na andangoro ti da ni na ngbonda ni kâ.

²⁹Na mbage ti gbeni, ya ti amabaya use so azi zingo; me na mbage ti nduzu, amabaya ni agbu tere na ya ti mbeni *kati. Amabaya ni use kue alingbi tere si ayeke na andangoro ti da ni.

³⁰Tongaso amabaya ti peko ti da ni kue ayeke miombe si agere ni baleoko na omene; a sara ni na wen ti nginza, so ti tene mabaya oko, gere ni use.

³¹Na pekoni, ala mu keke ti akasia, ala sara na alate ti kanga na amabaya ni: late oku ndali ti amabaya ti mbage ti da ni,

³²late oku ndali ti amabaya ti mbeni mbage ti da ni, late oku ndali ti peko ti da ni, na mbage ti Do.

³³Late so ahon na be ti amabaya ni ahon na ndo so ndambo ti amabaya ni ayeke daa, tongana a haka ni; late ni alondo na kozo mabaya ni asi na ndangba mabaya ti da ni.

³⁴Ala zia lôro na tere ti amabaya ni nga na tere ti alate ni. Ala mu lôro asara na akati so alate ni ahon na ya ni.

³⁵Na pekoni, azo ti sarango ye na kode amu kamba ti len so akpengba kpengbango, ala bongbi ni na bongo so nzoroko ni akpa le ti nduzu, bongo so abe bengo, bengba bongo so ayeke za zango, ala sara na ridoo. Ala kpo limo ti asheruben na tere ti ridoo ni.

³⁶Ala kanga ridoo ni na nduzu na akongi so a sara na lôro; akongi ni ayeke na tere ti angbongboro keke osio ti akasia so a zia lôro na tere ni. Ala kporo wen ti nginza, ala sara na agere ni osio si angbongboro keke ni aluti na ndö ni.

³⁷Ti ridoo ti yanga ti da ni, azo ti kpongo bongo na apendere nzoroko asara mbeni ridoo nde na kamba ti len so akpengba kpengbango, ala bongbi ni na bongo so nzoroko ni akpa le ti nduzu, bongo so abe bengo na bengba bongo so ayeke za zango.

³⁸Ala sara ambeni ngbongboro keke oku ti gbu ridoo ni na nduzu; ala sara nga awen ni, akongi ni na ali ti keke ni, ala zia lôro na tere ni kue. Ala mu bengba wen si asara na agere ni so angbongboro keke ni aluti na ndö ni.