Read sango Sigingo 37 Bible Online

Sigingo 37 - sango bible

Sigingo 37

¹Besalel asara sanduku ni na keke ti akasia. Yongoro ni ayeke santimetere ngbangbo oko baleuse na oku, nduru ni santimetere balembarambara na oku si yongo ni na nduzu santimetere balembarambara na oku.

²Besalel azia lôro ti nzoni ni na tere ti sanduku ni, na ya ni nga na mbage ti gigi ni kue. Lo mu lôro, lo leke na mbeni pendere ye, lo zia na tere ti yanga ti sanduku ni, angoro ni kue.

³Lo kporo lôro na wâ, lo leke na *akati osio, lo zia na tere ti andangoro ni: use na mbage, use na mbage.

⁴Lo leke ayongoro keke ti akasia use, lo zia lôro na tere ni kue.

⁵Lo yoro akeke ni na ya ti akati ni so ayeke na tere ti sanduku ni mbage na mbage titene a yo na ni.

⁶Lo sara mbeni *ye ti kangango na yanga ti sanduku ni na lôro ti *nzoni ni. Yongoro ni ayeke santimetere ngbangbo oko baleuse na oku, nduru ni santimetere balembarambara na oku.

⁷Lo sara *asheruben use na lôro so a pika tere ni pikango, lo zia ala na ndö ti ye ti kangango na yanga ti sanduku ni, oko na yanga ni, oko na mbeni yanga ni.

⁸Asheruben use so na ye ti kangango na yanga ti sanduku ni ayeke gi ye oko, sheruben oko na yanga ni, oko na mbeni yanga ni.

⁹Asheruben ni azi ya ti *akpangi ti ala kota na ndö ti ye ti kangango na yanga ti sanduku ni ti bata ni. Asheruben ni ayeke luti, ala yeke baa le ti tere si ala yeke baa ndo na mbage ti ye ti kangango na yanga ti sanduku ni.

¹⁰Na pekoni, lo sara mbeni meza na keke ti akasia. Yongoro ni ayeke metere oko, nduru ni santimetere baleoku, yongo ni na nduzu santimetere balembarambara na oku.

¹¹Lo zia lôro ti nzoni ni na tere ni; lo mu lôro, lo leke na mbeni pendere ye, lo zia na tere ti yanga ni, angoro ni kue.

¹²Na tere ti ayanga ni osio kue, lo zia kadere so nduru ni ayeke santimetere miombe; na tere ti kadere ni, lo mu lôro, lo leke na mbeni pendere ye, lo zia na tere ni, angoro ni kue.

¹³Lo kporo lôro si lo sara na *akati osio; lo zia akati ni na ndangoro osio ti meza ni, nduru na ndo so gere ni osio ayeke daa.

¹⁴A zia akati ni nduru na tere ti kadere ni titene a yoro ayongoro keke ni daa ti yo na meza ni.

¹⁵Lo leke ayongoro keke use ti akasia, lo zia lôro na tere ni kue. Akeke ni laa ayeke mu lege na azo ti yo na meza ni.

¹⁶Lo sara agbakuru ti ziango na ndö ti meza ni: akpangbara sembe, akopo, adu ti sembe na akota sembe titene a tuku *sandaga ti samba daa. Lo sara aye ni kue na lôro ti nzoni ni.

¹⁷Na pekoni, lo sara mbeni gere ti alamba na lôro ti nzoni ni so a pika tere ni pikango. Gere ti lamba ni, amaboko ni, akopo ni, akutu ni nga na akongo ni abongbi kue ti ga gi ye oko.

¹⁸Amaboko ni asigigi omene na tere ti yongoro gere ti alamba ni: ota na mbage, ota na mbage.

¹⁹Na ndö ti maboko oko oko ti gere ti alamba ni, akopo ota so a sara ni si akpa ndika, na akutu ni nga na aye so akpa kongo ayeke na tere ni.

²⁰Na tere ti gere ti alamba ni wani, akopo osio so a sara ni si akpa ndika, na akutu ni nga na aye so akpa kongo ayeke na tere ni.

²¹Na gbe ti akozo maboko use ti gere ti alamba ni so asigigi, oko na mbage, oko na mbage, kutu oko oko ayeke duti daa. Kutu oko oko aduti nga na gbe ti tanga ti amaboko use use so asigigi so. Ye ni aduti gi tongaso ndali ti amaboko omene so kue.

²²Akutu ni, na amaboko ni na gere ti alamba ni abongbi kue si aga gi ye oko; a sara ni kue na lôro ti nzoni ni so a pika tere ni pikango.

²³Lo mu lôro ti nzoni ni, lo sara na lamba mbarambara, aye ti zingo na zende na tere ti ameshe ti lamba ni nga na akete sembe so a yeke tuku amburu ti wâ daa.

²⁴Lo mu lôro ti nzoni ni so nengo ni ayeke kilo baleota, lo sara na gere ti alamba ni nga na agbakuru ni.

²⁵Na pekoni, lo mu keke ti akasia, lo sara na mbeni gbalaka ti zö dukani na ndö ni. Yongoro ni ayeke santimetere baleoku alingbi tere mbage na mbage; yongo ni na nduzu metere oko. Adidi ti andangoro osio ti gbalaka ni na gbalaka ni abongbi kue si aga gi ye oko.

²⁶Lo zia lôro ti nzoni ni na tere ti gbalaka ni kue, na ndö ni, na tere ni mbage na mbage kue nga na tere ti adidi ni. Lo mu lôro, lo leke na mbeni pendere ye, lo zia na tere ti yanga ti gbalaka ni, angoro ni kue.

²⁷Lo mu lôro, lo sara na *akati use si lo kanga na tere ti gbalaka ni mbage na mbage, na gbe ti ye ti pendere ni. A yeke yoro ayongoro keke na ya ti akati ni ti yo na gbalaka ni.

²⁸Lo mu keke ti akasia si lo sara na ayongoro keke ni; lo zia lôro na tere ni kue.

²⁹Lo sara mafuta so a yeke tuku na li ti zo ti zia lo nde nga na yombo ti nzoni ni so a yeke zö na wâ. Zo ti sarango yombo laa asara ni.