Read sango Sigingo 40 Bible Online

Sigingo 40 - sango bible

Sigingo 40

¹KOTA GBIA atene na Moïse:

²“Na kozo lango ti kozo nze, fade mo yeke gbara da ti bongo so mbi na azo ti mbi e yeke wara tere daa, da so mbi yeke duti daa.

³Mo yeke zia na ya ti da ni sanduku so a zia na ya ni atêne so a su atënë ti mbuki na le ni; mo yeke honde ni na peko ti ridoo so akangbi ya ti da ni.

⁴Mo yeke ga na meza ni si mo yeke zia na ndö ni mapa so a yeke zia na dawa ti KOTA GBIA. Mo yeke ga na gere ti alamba ni si mo yeke zia wâ na ya ti alamba ni.

⁵Gbalaka so a sara na lôro titene a zö dukani na ndö ni so, mo yeke zia ni na dawa ti sanduku ti mbuki ni. Mo yeke kanga ridoo na yanga ti da ni.

⁶Gbalaka so a yeke ya na ndö ni *asandaga so a yeke gbi ni kue na wâ, mo yeke zia ni na yanga ti da ni.

⁷Mo yeke zia kota sembe ni na ndo so ayeke na popo ti da ni na gbalaka ni si mo yeke to ngu daa.

⁸Mo yeke zia abongo ni na tere ti gbagba ti ndo so ayeke nde si ayeke nzoni kue si mo yeke kanga ridoo ni na yanga ti gbagba ni.

⁹“Fade mo yeke mu mafuta ti tukungo na li ti zo ti zia lo nde, mo yeke tuku ni na ndö ti da ni nga na ndö ti aye so kue ayeke na ya ni. Tongaso mo yeke zia da ni na agbakuru ni kue nde ndali ti mbi. Na pekoni, da ni ayeke ga ye ti mbi biani.

¹⁰Mo yeke tuku nga mafuta ni na ndö ti gbalaka so a yeke ya asandaga na ndö ni nga na agbakuru ni kue. Mo yeke zia gbalaka ni nde ndali ti mbi titene aga gi ye ti sarango na kua ti mbi.

¹¹Mo yeke tuku nga mafuta ni na ndö ti kota sembe ni nga na gere ni ti zia ni nde ndali ti mbi.

¹²“Fade mo yeke mu Aaron na amolenge ti lo ti koli, mo ga na ala na yanga ti da ti bongo so mbi na azo ti mbi e yeke wara tere daa si mo yeke sukula ala na ngu.

¹³Na pekoni, mo yeke yu Aaron na abongo ti lo ti wayango-sandaga, mo yeke tuku mafuta na li ti lo ti zia lo nde titene lo sara kua na mbi tongana wayango-sandaga.

¹⁴Mo yeke mu amolenge ti Aaron ti koli, mo ga na ala si mo yeke yu ala na abongo ti ala.

¹⁵Mo yeke tuku mafuta na li ti ala tongana ti so mo sara na babâ ti ala titene ala sara kua na mbi tongana awayango-sandaga. Tongaso, mafuta so mo tuku na li ti ala so ayeke mu lege na ala ti sara kua ti wayango-sandaga ngu na ngu, kpu na kpu.”

¹⁶Moïse asara ye kue alingbi gi na yanga so KOTA GBIA amu na lo.

¹⁷Nilaa, na kozo lango ti kozo nze ti use ngu ni, na peko ti sigingo ti ala na Ezipte, ala yo na nduzu da so Nzapa ayeke duti daa.

¹⁸Moïse ayo da ni na nduzu: lo zia agere ni daa, *amabaya ni, alate ni nga na angbongboro keke ni.

¹⁹Lo gbara abongo na li ti da ni; na pekoni, lo zia na ndö ni ye ti kangango na ndö ti da ni alingbi na yanga so KOTA GBIA amu lani na Moïse.

²⁰Na pekoni, lo mu atêne so a su atënë ti ndia na le ni, lo zia na ya ti sanduku. Lo yoro ayongoro keke na ya ti *akati so ayeke na tere ti sanduku ni si lo zia ye ti kangango na yanga ni na ndö ni.

²¹Moïse ague na sanduku ni na ya ti da so Nzapa ayeke duti daa. Na pekoni, a kanga ridoo so akangbi ya ti da ni titene ahonde sanduku ni. Moïse asara ye ni alingbi na yanga so KOTA GBIA amu lani na lo.

²²Lo zia meza so a yeke zia mapa na ndö ni na ya ti da ti bongo so Nzapa na azo ti lo ayeke wara tere daa. Lo zia ni na mbage ti Banga ti da ni, na dawa ti ridoo ni.

²³Lo leke na ndö ti meza ni mapa so a yeke zia na dawa ti KOTA GBIA, alingbi na yanga so KOTA GBIA amu lani na Moïse.

²⁴Lo zia gere ti alamba ni na ya ti da ti bongo so Nzapa na azo ti lo ayeke wara tere daa. Lo zia ni na mbage ti Mbongo ti da ni, abaa ndo le na le na meza ni.

²⁵Lo zia wâ na ya ti alamba ni na dawa ti KOTA GBIA alingbi na yanga so KOTA GBIA amu lani na Moïse.

²⁶Gbalaka so a sara na lôro so, lo zia ni na ya ti da ti bongo so Nzapa na azo ti lo ayeke tere daa. Lo zia ni abaa ndo le na le na ridoo ni.

²⁷Lo zö dukani so fion ni ayeke fun nzoni na ndö ni alingbi na yanga so KOTA GBIA amu lani na Moïse.

²⁸Na pekoni, lo zia ridoo na yanga ti da ni.

²⁹Lo zia na yanga ti da ti bongo so Nzapa na azo ti lo ayeke wara tere daa gbalaka so a yeke ya na ndö ni *sandaga so a yeke gbi ni kue na wâ. Lo ya na ndö ni sandaga so a yeke gbi ni kue na wâ na sandaga ti ale ti kobe, alingbi na yanga so KOTA GBIA amu lani na Moïse.

³⁰Lo zia kota sembe ni na ndo so ayeke na popo ti da ti bongo so Nzapa na azo ti lo ayeke wara tere daa nga na gbalaka. Lo to ngu daa titene azo *asukula na sioni ti ala.

³¹Moïse, Aaron nga na amolenge ti lo ti koli ayeke sukula maboko na gere ti ala na ya ni.

³²Lakue tongana ala yeke li na ya ti da ti bongo so Nzapa na azo ti lo ayeke wara tere daa, wala tongana ala yeke gue nduru na tere ti gbalaka ni, ala yeke sukula tere ti ala alingbi na yanga so KOTA GBIA amu lani na Moïse.

³³Moïse asara gbagba na tere ti da so Nzapa ayeke duti daa nga na tere ti gbalaka ni si lo zia ridoo na yanga ti gbagba ni. Lege so Moïse ahunzi akua ni kue laa.

³⁴Tongaso mbinda akanga ndö ti da ti bongo so Nzapa na azo ti lo ayeke wara tere daa si gonda ti KOTA GBIA asi singo na ya ni.

³⁵Moïse alingbi ti li na ya ti da ni pepe, ngbanga ti so mbinda angba na ndö ni si gonda ti KOTA GBIA asi singo na ya ni.

³⁶Na ndembe so mbinda ni ayeke londo na ndö ti da ni, azo ti Israel ayeke mu lege ti hon na mbeni ndo nde.

³⁷Tongana mbinda ni alondo pepe, ala yeke hon nga pepe; ala yeke ku lango so mbinda ni ayeke londo si.

³⁸Na kota lâ, mbinda ti KOTA GBIA ayeke na ndö ti da ni; na bi, wâ ayeke za na ya ti mbinda ni si azo ti Israel kue ayeke baa ni na ngoi so kue ala yeke tambula ti gue.