Read sango Sigingo 8 Bible Online

Sigingo 8 - sango bible

Sigingo 8

¹KOTA GBIA atene na Moïse: “Tene na Aaron, mo tene: ‘Yoro maboko ti mo nga na keke ti mo na ndö ti *abale, na ndö ti angu so ayeke sua na ya ti adu nga na ndö ti angu ti *alende; mo sara si akongba asigigi amu ya ti Ezipte kue.’ ”

²Aaron ayoro maboko ti lo na ndö ti angu ti Ezipte si akongba asigigi amu ya ti kodro ni kue.

³Me azo ti mazi ti Ezipte asara gi mara ti ye so na lege ti mazi ti ala. Ala nga asara si akongba asigigi amu ya ti kodro ni kue.

⁴Faraon airi Moïse na Aaron si lo tene na ala: “Ala sambela KOTA GBIA titene lo zi akongba so na tere ti mbi nga na tere ti azo ti kodro ti mbi. Fade mbi yeke zia lege na azo ti Israel titene ala gue, aya *sandaga na KOTA GBIA.”

⁵Moïse akiri tënë na Faraon, atene: “Tongana mo ye, mo fa na mbi lango so mbi lingbi ti sambela Nzapa ndali ti mo, ndali ti azo ti gbe ti mo nga ndali ti azo ti kodro ti mo. Mbi yeke hunda na Nzapa titene akongba ni alondo na ndo ti mo nga na ya ti yangbo ti mo ahon. Tongaso ala yeke ngba gi na ya ti bale ti Nil.”

⁶Faraon atene: “Kekereke.” Moïse atene: “Nzoni! Mbi yeke sara tongana ti so mo hunda. Tongaso, fade mo yeke hinga, mo tene, mbeni nzapa ti lingbi na KOTA GBIA, Nzapa ti e ayeke daa pepe.

⁷Fade akongba ni ayeke londo na ndo ti mo nga na ya ti yangbo ti mo ti hon; ala yeke londo na ndo ti azo ti gbe ti mo nga na ndo ti azo ti kodro ti mo ti hon. Ala yeke ngba gi na ya ti bale ti Nil.”

⁸Moïse na Aaron alondo na ndo ti Faraon asigigi. Moïse atoto na KOTA GBIA ndali ti akongba so lo tokua ala na tere ti Faraon so.

⁹KOTA GBIA asara ye so Moïse ahunda na lo. Akongba ni akui na ya ti ada, na ya ti agbagba nga na ya ti ayaka.

¹⁰Azo abongbi kuâ ti ala gbani gbani, na ndö ti tere, na ndö ti tere si ya ti kodro ni kue afun sioni sioni.

¹¹So Faraon abaa atene ye ni aga nzoni kete, lo sara ngangu li. Lo ma Moïse na Aaron pepe, alingbi na tënë so KOTA GBIA atene.

¹²KOTA GBIA atene na Moïse: “Tene na Aaron, mo tene: Yoro keke ti mo, mo pika na fuku ti sese. Fade fuku ti sese ni ayeke ga angungu na ya ti kodro ti Ezipte kue.”

¹³Moïse na Aaron asara ye alingbi na ni: Aaron ayoro maboko ti lo si na keke ti lo, lo pika fuku ti sese ni. Fuku ti sese ni aga angungu si angungu ni atuku na ndö ti azo nga na anyama. Na ya ti kodro ti Ezipte kue, fuku ti sese aga angungu.

¹⁴Azo ti mazi ti Ezipte aye nga ti sara angungu na lege ti mazi ti ala, me ala ha gbaa. Angungu ni angba na ndö ti azo nga na anyama.

¹⁵Azo ti mazi ni atene na Faraon: “So maboko ti Nzapa laa ayeke sara kua so!” Me be ti Faraon angba ti kpengba. Lo ma Moïse na Aaron pepe, alingbi na tënë so KOTA GBIA atene.

¹⁶KOTA GBIA atene na Moïse: “Kekereke na kota ndaperere, mo londo mo gue, mo luti na dawa ti Faraon na ndembe so lo yeke gue na yanga ti *bale ti Nil. Fade mo tene na lo, mo tene: ‘Tënë so KOTA GBIA atene ayeke so: Zia lege na azo ti mbi titene ala gue, avoro mbi.

¹⁷Tongana mo ke ti zia lege na azo ti mbi titene ala gue, fade mbi yeke tokua asioni vuma na ndö ti mo, na ndö ti azo ti gbe ti mo, na ndö ti azo ti kodro ti mo nga na ya ti ayangbo ti mo. Asioni vuma ni ayeke si singo na ya ti ada ti azo ti Ezipte, ala yeke mu ndö ti sese ti kodro so kue ala yeke duti daa.

¹⁸Me na lango ni so, fade mbi yeke sara si ti sese ti Goshen, ye ni ayeke duti nde: ndo so azo ti mbi aduti daa so, asioni vuma ni ayeke si kâ pepe. Tongaso si mo hinga, mo tene, mbi KOTA GBIA, mbi yeke na ya ti kodro so.

¹⁹Mbi yeke zi azo ti mbi na ya ti ye ti vundu so ayeke si na azo ti mo so. Ye ti kpene so ayeke si kekereke.’ ”

²⁰KOTA GBIA asara ye ni tongaso: gba ti asioni vuma ali na ya ti yangbo ti gbia Faraon, na ya ti ada ti azo ti gbe ti lo na ti azo ti kodro ti Ezipte kue. Asioni vuma ni abuba kodro ni kue.

²¹Faraon airi Moïse na Aaron si lo tene na ala: “Ala gue, amu *sandaga na Nzapa ti ala, me gi na ya ti kodro so!”

²²Moïse akiri tënë: “E lingbi ti sara tongaso pepe, ngbanga ti so asandaga so e yeke ya na KOTA GBIA, Nzapa ti e so ayeke sioni ye mingi na le ti azo ti Ezipte. Tongana ala baa e na yango mara ti asandaga tongaso, fade ala yeke bo e na têne!

²³Fade e yeke tambula na ya ti lango ota ti gue na benyama; kâ, e yeke ya na KOTA GBIA, Nzapa ti e asandaga so lo yeke fa ni na e.”

²⁴Faraon atene: “Fade mbi yeke zia lege na ala titene ala gue na benyama, ala mu sandaga na KOTA GBIA, Nzapa ti ala. Me ala gue yongoro pepe! Ala sambela ndali ti mbi.”

²⁵Moïse akiri atene: “Gi so mbi yeke sigigi na ndo ti mo, fade mbi yeke sambela KOTA GBIA. Kekereke, fade asioni vuma ni ayeke hon yongoro na tere ti mo, na tere ti azo ti gbe ti mo nga na tere ti azo ti kodro ti mo. Gi ye oko, alingbi mo kiri mo handa e pepe, mo kanga lege na azo ti Israel pepe titene ala gue, amu sandaga na KOTA GBIA.”

²⁶Moïse asigigi na ndo ti Faraon si lo sambela KOTA GBIA.

²⁷KOTA GBIA asara ye alingbi na ye so Moïse ahunda: asioni vuma ni ahon yongoro na tere ti Faraon, na tere ti azo ti gbe ti lo nga na tere ti azo ti kodro ti lo. Mbeni vuma oko angba pepe.

²⁸Ataa so kue, Faraon akiri asara ngangu li si lo ke ti zia lege na azo ti Israel ti gue.