Read sango Job 1 Bible Online

Job 1 - sango bible

Job 1

¹Ando, na kodro ti Us, mbeni koli ayeke daa, iri ti lo Job. Koli so ayeke sara ye na legeni, mbeni tënë ayeke na li ti lo pepe. Lo yeke kpe mbeto ti Nzapa si lo yeke kpe lege ti sarango sioni.

²Lo du amolenge-koli mbarambara nga na amolenge-wali ota.

³Lo yeke na ataba saki mbarambara, *azambala saki ota, abagara ti fango na yaka saki oko, amama ti lele ngbangbo oku nga na gba ti azo ti kua. Lo yeke kota zo ahon azo ti mbage ti To kue.

⁴Amolenge ti lo ti koli ayeke sara ka matanga na da ti ala oko oko kue; na mbeni lango, ala sara na da ti mbeni, na mbeni lango, ala sara na da ti mbeni. Ala yeke tisa a-ita ti ala ti wali ota ti ga titene ala na ala ate, anyon.

⁵Tongana amatanga ni ahunzi awe, Job ayeke iri amolenge ti lo ni ti ga titene lo *sukula sioni ti ala. Na ndade ni, lo yeke londo na kota ndaperere si lo mu *sandaga so a yeke gbi ni kue na wâ ndali ti zo oko oko. Lo yeke tene na be ti lo, lo tene: “Mbi hinga pepe, amolenge ti mbi asara siokpari, wala ala zonga Nzapa na be ti ala.” Ye so Job ayeke sara lakue laa!

⁶Mbeni lâ, ala so ayeke lango na yayu aga aluti na dawa ti *KOTA GBIA. Satan, lo so ayeke bi tënë na li ti zo, lo nga lo ga na popo ti ala.

⁷KOTA GBIA ahunda Satan, atene: “Mo londo na ndo wa?” Satan akiri tënë: “Mbi fono, mbi baa ndö ti sese si mbi ga so.”

⁸KOTA GBIA atene na lo: “Mo baa dutingo ti Job, zo ti kua ti mbi awe? Na ndö ti sese so, mbeni zo ti lingbi na lo ayeke daa pepe. Lo yeke mbeni koli so tënë ayeke na li ti lo pepe, lo yeke sara ye na legeni; lo yeke kpe mbeto ti Nzapa si lo yeke kpe lege ti sarango sioni.”

⁹Me Satan akiri tënë na KOTA GBIA: “Senge laa Job ayeke kpe mbeto ti Nzapa?

¹⁰Mo bata lo mbage na mbage kue, asewa ti lo nga na aye so kue lo yeke na ni. Mo sara tufa na ndö ti akua so lo yeke sara si anyama ti lo amu ya ti kodro kue.

¹¹Me mo yoro maboko ti mo, mo ndu aye so kue lo yeke na ni, e baa! Mbi hinga so fade lo yeke deba mo taa na le ti mo.”

¹²Tongaso KOTA GBIA atene na Satan: “Nzoni! Aye so kue lo yeke na ni, mbi zia na maboko ti mo. Gi ye oko, mo ndu tere ti lo pepe.” Na pekoni, Satan alondo na dawa ti KOTA GBIA ahon.

¹³Mbeni lâ, amolenge ti Job ti koli, na ala ti wali ayeke te kobe si ala yeke nyon vin na ndo ti yaya ti ala ti koli.

¹⁴Mbeni watokua aga na tere ti Job si atene na lo: “Abagara ayeke fâ yaka, amama ti lele ayeke te pere na tere ti yaka ni.

¹⁵Azo ti Saba atuku biaku na ndö ti anyama ni, agbu ala; ala fâ azo ti kua ti mo. Gi mbi oko laa mbi ngba na fini si mbi ga ti tene tënë ni na mo.”

¹⁶Tënë angba ngbango na yanga ti lo, mbeni watokua nde asi si lo tene: “Wâ ti bekpa alondo na yayu, aga ati na ndö ti ataba nga na azo ti kua ti mo. Wâ ni agbi ala kue. Gi mbi oko laa mbi ngba na fini si mbi ga ti tene tënë ni na mo.”

¹⁷Tënë angba ngbango na yanga ti lo, mbeni watokua asi si lo tene: “Abongbi ota ti azo ti Kalde atuku na ndö ti azambala, agbu ala; ala fâ azo ti kua ti mo. Gi mbi oko laa mbi ngba na fini si mbi ga ti tene tënë ni na mo.”

¹⁸Tënë angba ngbango na yanga ti lo, mbeni watokua asi si lo tene: “Amolenge ti mo ti koli na ala ti wali ayeke te kobe si ala yeke nyon vin na ndo ti yaya ti ala ti koli.

¹⁹Mbeni ngangu pupu alondo na benyama aga apika da ni mbage na mbage kue. Da ni ati na ndö ti amolenge ni si ala kui. Gi mbi oko laa mbi ngba na fini si mbi ga ti tene tënë ni na mo.”

²⁰Tongaso Job alondo, lo suru kota bongo ti lo ti de si lo kio kua ti li ti lo. Na pekoni, lo ti, lo kpo li ti lo na sese

²¹si lo tene: “Mbi sigigi na ya ti mama ti mbi, tere ti mbi senge; mbi yeke kiri na ya ti sese, tere ti mbi senge. KOTA GBIA amu ye na mbi, KOTA GBIA akiri amu ye ti lo. Ayeke nzoni e mu singila na KOTA GBIA!”

²²Na ya ti aye so kue, Job asara siokpari pepe; lo bi mbeni sioni tënë na li ti Nzapa pepe.