Read sango Job 10 Bible Online

Job 10 - sango bible

Job 10

¹Nzara ti gigi ni ahunzi na be ti mbi awe! Mbi yeke kiri ti kanga be ti mbi na demango tere ti mbi pepe; mbi ye ti sigigi na sengo ye so ayeke na be ti mbi.

²Fade mbi yeke tene na Nzapa: Fâ ngbanga na li ti mbi pepe. Tënë so mo bi na li ti mbi so, fa na mbi ni si mbi hinga.

³Be ti mo anzere ti sara ngangu na mbi, ti ke ye so maboko ti mo asara? Mo ye ti zia lege na mango tere ti azo ti sioni?

⁴Le ti mo ayeke tongana ti zo? Bango ndo ti mo ayeke tongana ti zo?

⁵Alango ti fini ti mo ayeke tongana ti zo? Angu ti mo ayeke nduru tongana ti zo?

⁶Mo yeke gi ti hinga sioni ti mbi ngbanga ti nyen? Mo yeke hunda tënë na ndö ti siokpari ti mbi ngbanga ti nyen?

⁷Mo hinga kue, mo tene, mbi sara sioni pepe, zo oko ti zi mbi na maboko ti mo ayeke daa pepe!

⁸Maboko ti mo laa asara mbi, aleke mbi; fadeso maboko ti mo angoro mbi si mo ye ti nika mbi!

⁹Dabe ti mo so mo leke mbi tongana ti so a mu sese si a sara na ta. Mo ye ti kiri ti sara si mbi ga fuku ti sese!

¹⁰Mo sara mbi na ya ti mama ti mbi tongana ti so a yeke tuku ngu ti me na ya ti kangu, angba ngbii si akpengba.

¹¹Mo zia poro ti tere ti mbi, na kasa ti tere ti mbi daa. Mo tengbi abio na akamba ti tere ti mbi daa.

¹²Mo sara nzoni be na mbi si mo mu na mbi fini; mo bata fini ti mbi nzoni mingi.

¹³Andaa mo honde tënë na be ti mo, me mbi hinga tënë ti be ti mo awe:

¹⁴mo ye fade titene le ti mo angba na ndö ti mbi si mo gbu mbi na kozo sarango siokpari; sioni ti mbi, mo ye ti zi tënë ni na li ti mbi pepe.

¹⁵Tongana tënë ayeke na li ti mbi, so mawa na mbi! Ataa mbi yeke fade zo ti mbirimbiri, ka mbi lingbi ti yo li ti mbi na nduzu pepe. Kamene ahon ndö ti mbi, kota mawa ahon ndö ti mbi.

¹⁶Tongana mbi ye ti yo li ti mbi na nduzu, mo yeke tumba peko ti mbi tongana bamara. Lakue, mo yeke kiri ti nika mbi na lege ti kota ngangu ti mo.

¹⁷Mo kiri mo tokua akpale na ndö ti mbi na peko ti tere, na peko ti tere; mo kiri mo sara ngonzo na tere ti mbi ahon ndoni; mo tokua aye ti ngangu na ndö ti mbi gbani gbani.

¹⁸Mo sara si mbi sigigi na ya ti mama ti mbi, ngbanga ti nyen? Tongana mbi kui lani, ka zo oko abaa mbi pepe,

¹⁹ka mbi gue biani na ya ti du ti kuâ, mo baa mo tene, mbi yeke daa laoko pepe.

²⁰Lango ti fini ti mbi angba gi kete. Zia mbi wu pupu, mbi sara ngia kete

²¹kozo titene mbi gue na ndo so fade mbi yeke kiri ti ga pepe; mbi yeke gue na kodro so gi vukongo ndo laa ayeke kâ, ndo ni avuko pitipiti;

²²na kodro so kâ, vukongo ndo ahon ndoni, bi avuko pitipiti, aye kue ayeke kirikiri, ataa lumiere akpa bi so avuko pitipiti.