Read sango Job 11 Bible Online

Job 11 - sango bible

Job 11

¹Sofar, zo ti kodro ti Naama amu tënë si lo tene:

²Mara ti gba ti tënë tongaso, zo alingbi ti kiri tënë daa pepe? Zo adiko gba ti tënë si lo ga mbirimbiri?

³Apendere tënë so mo yeke tene so, ni laa ayeke kanga yanga ti azo? Tongana mo he azo na ngia, fade ala yeke zia kamene na le ti mo pepe?

⁴Mo gue daa ti tene: “Tënë so mbi yeke tene ayeke taa-tënë; na le ti Nzapa, mbeni tënë ayeke na li ti mbi pepe.”

⁵Âa! Mbi ye fade titene Nzapa azi yanga, lo kiri tënë na mo, lo wani!

⁶Tongana lo fa fade na mo nda ti ndara ti lo, ndara ti lo so ahon hingango ndo ti zo, ka mo hinga, mo tene, be ti Nzapa agirisa mbage ti sioni ti mo.

⁷Mo lingbi ti hinga ye so ayeke na be ti Nzapa kâ? Nzapa so ngangu ti lo ahon angangu kue so, mo lingbi ti hinga mbirimbiri ti lo so ahon aye ti mbirimbiri kue?

⁸Ndara ti lo ayo na nduzu kâ ahon yayu, nyen laa mo lingbi ti sara, nyen? Ndara ti lo ayo na gbe ti sese ahon ndo ti akuâ, nyen laa mo lingbi ti hinga daa, nyen?

⁹Ndara ti lo ayo ahon sese, akono ahon kota ngu-ingo.

¹⁰Tongana Nzapa ayeke hon, tongana lo gbu zo, lo zia zo ni na da ti kanga, tongana lo iri zo ni na ngbanga, zo wa laa ayeke ke na lo, zo wa?

¹¹Biani, Nzapa ahinga zo ti mvene; titene lo baa sioni ti zo, lo yeke gbu li ti lo mingi pepe.

¹²Me zo so ahinga ndo pepe, lo yeke hinga ande ndo laoko pepe; lo yeke hinga ndo gi na lango so lele ti ngonda ahinga ndo nzoni si.

¹³Ti mo, tongana mo leke be ti mo mbirimbiri, yoro maboko ti mo na mbage ti lo si mo sambela lo.

¹⁴Zia lege ti asioni so maboko ti mo asara, zia ye ti sioni aduti na da ti mo pepe.

¹⁵Tongaso, mo yeke yo le ti mo na nduzu, le ti mo so sioni ye ayeke daa pepe, mo yeke luti nganganga si mbeni ye ti zia mbeto na be ti mo ayeke daa pepe.

¹⁶Biani, pasi so mo baa, mo yeke dabe ti mo na ni pepe. Tongana ngu so asua ahon, be ti mo ayeke girisa na ni.

¹⁷Fade fini ti mo ayeke za ahon sungo ti lâ ti bekombite; vukongo ndo ayeke sanze ti ga tongana lumiere ti ndaperere.

¹⁸Ye so mo zia be ti mo ti ku ayeke daa; nilaa, mo zia be ti mo na ndö ni. Tongana mo baa so ye ni aga nzoni awe, fade mo yeke lango na siriri.

¹⁹Na ndembe so mo yeke wu tere ti mo, zo ti so li ti mo ayeke daa pepe; azo mingi ayeke tene nzoni tënë ti woko be ti mo.

²⁰Me azo ti sioni, le ti ala ayeke ngba gi na lege ti ku; ndo ti bata tere ti ala daa, ala yeke wara ni pepe; gi kuâ laa ala yeke zia be ti ala ti ku ni.