Read sango Job 14 Bible Online

Job 14 - sango bible

Job 14

¹Zo so wali adu lo, lango ti lo ayeke nduru; gingo be ti lo ahon ndoni.

²Lo yeke tongana kongo so asigigi si ahole; lo hon tongana gbe ti de, lo ninga pepe.

³Lo laa mo zi le ti mo ti baa lo! Mbi laa, mo iri mbi titene mbi na mo, e gue na ngbanga!

⁴Zo wa laa alingbi ti sara si ye so ayeke *nzoni asigigi na ya ti ye so ayeke *sioni? Zo oko pepe!

⁵Biani, mo diko lango ti fini ti zo awe, mo diko wungo ti nze ti lo si lo lingbi ti hon ni pepe.

⁶Tongaso, alingbi mo baa ndo na mbage ti lo pepe, mo zia lo kpoo titene tere ti lo anzere tongana ti zo ti kua so awara futa ti lo ti lango oko.

⁷Ataa keke, lo yeke lakue na nzoni ye ti ku; tongana a de lo na sese, afini maboko ni ayeke sigigi daa si ayeke kono.

⁸Ataa agunda ni alango mingi na gbe ti sese si gere ni aye ti kui na ya ti fuku ti sese,

⁹gi so lo ma fion ti ngu awe, amaboko ti keke ni akiri asigigi tongana fini keke.

¹⁰Me tongana zo akui, ngangu ti lo ahunzi awe. Tongana zo akui, lo yeke na ndo wa?

¹¹Mbeni lâ, ngu ti kota ngu-ingo alingbi ti hon; *abale alingbi ti hole;

¹²me zo so akui, lo yeke kiri ti londo pepe; na ngoi so yayu angba, lo yeke zingo pepe.

¹³Mbi ye fade titene mo honde mbi na ndo ti akuâ, mo honde mbi kâ ngbii ngonzo ti mo ahunzi si. Tongaso, ka mo fa na mbi mbeni ngoi titene mo dabe ti mo na mbi!

¹⁴Me zo so akui awe, lo yeke kiri ti duti na fini? Tongana ye ni ayeke fade tongaso, ka na ya ti ngoi so kue mbi baa pasi, mbi ku ngbii mbeni zo aga amu plase ti mbi si.

¹⁵Tongana ye ni ayeke fade tongaso, ka mo iri ndo, mbi yeda, ka mo sara nzara ti baa mbi, mbi so mo sara mbi!

¹⁶Tongana ye ni ayeke fade tongaso, ka mo ke ti sara hange na sioni ti mbi, me fadeso, le ti mo gi na peko ti aye so mbi sara.

¹⁷Ka sioni ti mbi, mo honde ni fade na ya ti sake, mo kanga yanga ni fade nzoni; ka siokpari ti mbi, mo zi fade ni na li ti mbi.

¹⁸Me kota hoto ayeke ti, aga fuku ti sese; kota têne ayeke londo na ndo so lo yeke daa ti gue na mbeni ndo nde.

¹⁹Ngu ayeke te tere ti têne; ngu so ayeke sua ayeke mu sese ahon na ni. Gi tongaso laa mo yeke buba ye so zo azia be ti lo daa ti ku.

²⁰Mo yeke bi zo ni na sese, lo yeke hon ti lo biani; mo yeke sara si le ti lo akiri akpa ti zo pepe si mo yeke tumba lo.

²¹Tongana azo ane amolenge ti lo, lo yeke hinga ti lo ye oko daa pepe; tongana azo abaa ala tongana mbumbuse ye, lo yeke hinga ni pepe.

²²Lo oko laa lo yeke ma songo ti pasi ti lo; lo oko laa lo yeke dema ndali ti vundu ti lo.