Read sango Job 15 Bible Online

Job 15 - sango bible

Job 15

¹Elifaz, zo ti kodro ti Teman amu tënë si lo tene:

²Zo ti ndara tongana mo so ayeke kiri buba tënë tongaso? Lo yeke suku kate na tenengo asenge senge tënë tongaso?

³Mo ye ti fa so tënë ayeke na li ti mo pepe, na tenengo atënë so ane pepe; atënë ti mo ayeke ye oko pepe.

⁴Na ndö ni kue, mo sara si azo akpe mbeto ti Nzapa pepe; mo kanga lege na azo ti gbu li ti ala na dawa ti Nzapa.

⁵Tënë ti yanga ti mo afa sioni ti mo; mo yeke tene tënë tongana zo ti mayere.

⁶Tënë ti yanga ti mo wani laa afâ ngbanga na li ti mo, me mbi pepe; yanga ti mo ayeke bi tënë na li ti mo.

⁷Mo yeke Adam, a du mo kozo ti azo kue? A du mo kozoni na ahoto?

⁸Atënë ti Nzapa so angba na hondengo ni, mo ma ni? Nilaa mo wara ndara gi mo oko so?

⁹Nyen laa mo hinga si e hinga pepe so? Hingango ndo ti nyen laa mo yeke na ni si e yeke na ni pepe so?

¹⁰Na popo ti e ge, mbeni kangba ayeke daa; mbeni mbakoro ayeke daa so ngu ti lo ahon ngu ti babâ ti mo!

¹¹Atënë so Nzapa atene ti de be ti mo so ayeke senge ye na le ti mo? Atënë so e tene na wokongo go so ayeke nga senge ye na le ti mo?

¹²Be ti mo gi wâ wâ so ngbanga ti nyen? Mo yeke pika le ti mo ni ngbanga ti nyen?

¹³Mo yeke sara ngonzo na tere ti Nzapa ngbanga ti nyen? Mo zia gba ti tënë tongaso asigigi na yanga ti mo ngbanga ti nyen?

¹⁴Zo ayeke nyen si lo tene ni yeke *nzoni? Zo so wali adu lo ayeke nyen si lo tene ni yeke mbirimbiri?

¹⁵Ataa *a-ange ti lo, Nzapa azia be ti lo na ndö ti ala pepe; ataa yayu ayeke *nzoni na le ti lo pepe

¹⁶si âdu zo so ayeke sioni mingi, zo so aye tënë ti goro, zo so ayeke sara sioni hio hio tongana ngu so lo yeke nyon, fade Nzapa azia be ti lo na ndö ti lo?

¹⁷Ma mbi si, mbi ye ti fa mbeni ye na mo; mbi ye ti tene na mo peko ti ye so mbi baa,

¹⁸tënë so azo ti ndara atene, tënë so ala sigigi na nda ni kue, tënë so ala manda na tere ti ababâ ti ala.

¹⁹Nzapa amu ando sese gi na ala oko; mbeni wande aga lani na popo ti ala pepe.

²⁰Ala tene: “Zo ti sioni ayeke baa pasi na lango ti fini ti lo kue; zo ti sarango ngangu na azo, a diko ngu ti lo mingi pepe.

²¹Lo yeke ma toto ti mbeni go so ayeke zia mbeto na be ti zo. Na ngoi so lo yeke duti na siriri si azo ti bubango ye ayeke ti na ndö ti lo.

²²Lo baa ti lo pepe, lo tene, fade lo sigigi na ya ti vukongo ndo; me lo hinga lo tene, kuâ ti ngangu ayeke hara lo.

²³Lo yeke kpe mbage na mbage ti gi kobe, me na ndo wa? Lo hinga lo tene, ye so ayeke ku lo ayeke vukongo ndo.

²⁴Ye ti ngangu na ye ti vundu ayeke zia mbeto na be ti lo. Aye ni ayeke tuku na ndö ti lo tongana gbia so aleke tere ti lo ti tiri bira.”

²⁵Biani lo yoro maboko na le ti Nzapa; lo gi yanga ti Nzapa, lo so ngangu ti lo ahon angangu kue.

²⁶Lo ba li ti lo na sese na peko ti kota *vala ti lo, lo mu loro ti gue ti tiri na Nzapa.

²⁷Ndö ti le ti lo ayeke za zango na mafuta; tere ti lo akono konongo.

²⁸Lo gue, lo duti na ya ti agbata so a buba ni kue, ti lango na ya ti da so azo ado azia, ada so aga nduru ti tuku na sese.

²⁹Zo ni ayeke ga zo ti mosoro laoko pepe, fade gba ti mosoro ti lo ayeke ninga pepe; azo ayeke ne lo na ya ti kodro pepe.

³⁰Fade lo yeke sigigi na ya ti vukongo ndo pepe, lo yeke ga tongana mbeni keke so wâ ahole maboko ni; pupu ti yanga ti Nzapa ayeke mu lo ti hon na lo yongoro.

³¹Alingbi lo zia be ti lo na ndö ti handango ndo pepe. Tongana lo sara ni, andaa lo mu sioni lege, fade lo yeke wara futa ni.

³²Ye ni ayeke si kozo si lango ti lo ahunzi; lo yeke tongana keke so afini maboko ni akiri ti sigigi daa pepe.

³³Lo yeke tongana keke ti vinye so ale ni ade ti be pepe si atuku na sese; lo yeke tongana keke ti olive so akongo ni atuku na sese.

³⁴Biani, fade sewa ti zo ti sioni ayeke kiri ti du amolenge pepe; wâ ayeke gbi da ti azo so aye tënë ti goro.

³⁵Zo so amu ngo ti ye ti sioni, fade lo yeke du ye ti vundu. Ye so lo leke na be ti lo, tongana asigigi awe, aga ye ti handango lo wani.