Read sango Job 16 Bible Online

Job 16 - sango bible

Job 16

¹Job amu tënë si lo tene:

²Mbi ma mara ti atënë tongaso fani mingi awe; ala yeke azo ti dengo be so tënë ti ala ayeke so be ti zo.

³Ala tene: “Atënë ti mo so ayeke tongana pupu senge so ayeke hunzi lawa?” Wala “Nyen laa aso be ti mo si mo kiri tënë na ngonzo tongaso?”

⁴Tongana ala yeke fade na plase ti mbi, ka mbi nga, mbi lingbi ti tene tënë tongana ala; ka mbi bongbi gba ti tënë ti tene na tere ti ala, mbi yingi li ti mbi ti he ala hengo;

⁵ka mbi tene tënë ti mu ngangu na be ti ala, mbi tene tënë gbani gbani ti de be ti ala.

⁶Ataa mbi tene tënë, pasi ti mbi ayeke hunzi pepe, ataa mbi kai kpoo, pasi ni ayeke hon pepe.

⁷Fadeso, Nzapa awoko mbi kue; lo fâ sewa ti mbi kue awe.

⁸Lo sara si ndö ti le ti mbi aga tongana ti mbakoro, lo sara si mbi nge; aye so laa abi tënë na li ti mbi si afâ ngbanga na li ti mbi.

⁹Na ya ti ngonzo ti lo, Nzapa ayeke tumba peko ti mbi si lo suru ya ti mbi, lo yeke te pembe na tere ti mbi; lo ga wato ti mbi, le ti lo ayeke kpo mbi tongana le ti kokora.

¹⁰Azo azi yanga ti ala kota na tere ti mbi, ala zonga mbi, ala pika ngbangba ti mbi; ala bongbi kue ti ga na tere ti mbi.

¹¹Nzapa azia mbi na maboko ti agodobe; lo bi mbi na maboko ti azo ti sioni.

¹²Mbi duti ti mbi lani kpoo, me lo yingi mbi; lo gbu peko ti li ti mbi si lo kinda mbi, lo zia mbi, mbi luti titene lo tokua ale ti kokora na tere ti mbi.

¹³Ale ti kokora ni aga mbage na mbage, angoro mbi kue; lo kpo ya ti mbi, lo baa mawa ti mbi pepe; lo tuku na sese ngonzo so ayeke na tere ti be ti mbi.

¹⁴Lo huru na ndö ti mbi tongana zo ti bira; lo pika mbi si lo zia ka na tere ti mbi gbani gbani.

¹⁵Mbi kanga bongo ti mua na tere ti mbi, mbi yeke zi ni pepe; mbi yoro li ti mbi na ya ti fuku ti sese.

¹⁶Mbi toto ngbii, le ti mbi abe; vukongo ndo akanga le ti mbi.

¹⁷Me mbi sara ye ti ngangu na zo laoko pepe; lakue mbi yeke sambela na vurungo be.

¹⁸Mene ti mbi so atuku so, sese, mo kanga ndö ni pepe. Alingbi azo ama dekongo ti mbi lakue.

¹⁹Ti fadeso, mbeni zo ti gbungo koko ti mbi ayeke na yayu; mbeni zo so ahinga tënë na ndö ti mbi ayeke na yayu kâ.

²⁰Amba ti mbi ayeke he mbi hengo; me mbi yeke toto na ngu ti le gi na Nzapa.

²¹Ayeke nzoni zo ti gbungo koko ti mbi aleke tënë ti mbi na ti Nzapa tongana ti so zo ti gbungo koko ayeke leke tënë ti zo na mba ti lo.

²²Biani, lango ti fini ti mbi angba mingi pepe si mbi yeke gue na lege so tongana zo amu ni awe, lo yeke kiri pepe.