Read sango Job 20 Bible Online

Job 20 - sango bible

Job 20

¹Sofar, zo ti kodro ti Naama amu tënë si lo tene:

²Agingo be ti mbi ayeke pusu mbi ti kiri tënë, be ti mbi ayeke do dongo ti tene tënë.

³Mbi yeke ma mbeni wango so aso be ti mbi; me hingango ndo ti mbi ahuru tënë na mê ti mbi so mbi yeke kiri na ni.

⁴Mo hinga pepe? Ngbene ye giriri, ngbene ye so a zia zo na ndö ti sese,

⁵azo ti sioni ayeke dekongo na ngia, me dekongo ni ayeke ninga pepe; azo so ake Nzapa, ngia ti ala ayeke gue yongoro pepe.

⁶Ataa zo ti sioni ayo ngbii li ti lo andu yayu, ataa li ti lo akpo mbinda,

⁷lo yeke girisa legeoko tongana puru ti lo. Azo so lani abaa lo ayeke hunda ndo, atene: “Lo yeke na ndo wa?”

⁸Lo yeke hon tongana bango-li, zo ayeke kiri ti wara lo pepe; lo girisa tongana mbeni ye so zo abaa na ya ti bango-li.

⁹Azo so lani abaa lo, ala yeke kiri ti baa lo pepe. Ndo so lani lo yeke lango daa, azo ayeke kiri ti baa lo daa pepe.

¹⁰Amosoro so lo gbu, fade lo wani, lo yeke kiri na ni na awa ni; amolenge ti lo ayeke kiri na aye ti awayere na ala.

¹¹Lo yeke lani na ngangu mingi tongana ti maseka; me ngangu ti lo na lo wani, ala use kue ayeke lango na ya ti fuku ti sese.

¹²Sioni anzere nzerengo na yanga ti zo ti sioni; lo yeke honde ni na gbe ti menga ti lo,

¹³lo yeke su ni aninga, lo yeke bata ni na yanga ti lo.

¹⁴Me ye so lo te so ayeke fun na ya ti lo si ayeke ga sioni ngu ti yanga ti ngbo.

¹⁵Amosoro so lani lo gbu na ngangu si lo mene so, fade lo yeke de ni. Nzapa ayeke sara si amosoro ni alondo na ya ti lo asigigi.

¹⁶Ye so lani lo su so, andaa sioni ngu ti yanga ti ngbo laa; fade sioni ngu ni ayeke fâ lo.

¹⁷Gba ti mafuta ti wotoro so ayeke sua tongana kete ngu, fade lo yeke tara ni pepe; ngu ti me so ayeke sua ngangu ngangu, lo yeke nyon ni oko pepe.

¹⁸Ye so lo wara na peko ti kua ti lo, lo yeke kiri na ni na azo, lo yeke te ni pepe. Ye so lo wara na peko ti dengo buze ti lo, lo yeke sara ye oko na ni pepe.

¹⁹Aye ni kue asi na lo, ngbanga ti so lo do awayere, lo zia, lo nika ala, lo mu da ti ala na ngangu, me lo sara da ti li ti lo wani pepe.

²⁰So nzara ti mosoro angba ti sara lo lakue, lo lingbi ti bata mbeni nzoni ye ti lo oko pepe.

²¹Ndali ti so nzara ti lo ayeke mingi ahon ndoni, mbeni ye oko na peko ti tengo ye ti lo angba pepe; ndani laa nzoni duti ti lo ayeke ninga pepe.

²²Tongana zo ti sioni awara ye ahon ndoni, mbeto ayeke sara lo, ye ti vundu ayeke ti na ndö ti lo.

²³Na ndembe so lo yeke te kobe titene ya ti lo asi, Nzapa ayeke tokua sioni ngonzo na ndö ti lo; ngonzo ni ayeke tuku na ndö ti lo si ayeke ga kobe ti lo ti tengo ni.

²⁴Tongana lo kpe zeme ti bira so a sara na wen, kokora so a sara na bengba wen ayeke kpo lo.

²⁵Lo gboto le ti kokora so asigigi na peko ti lo; gi so le ti kokora so yanga ni aza zango asigigi na ya ti lo, biaku tongaso, mbeto ti kuâ agbu lo.

²⁶Ndo so kue lo yeke honde tere ti lo daa, vukongo ndo ayeke ku lo kungo. Wâ so zo laa atingo ni pepe ayeke gbi lo kue; wâ ni ayeke gbi tanga ti aye so angba na ya ti da ti lo.

²⁷Yayu ayeke fa na gigi asioni ti lo, sese ayeke londo ti ke lo.

²⁸Na lango so Nzapa ayeke tokua ngonzo ti lo, ngu ayeke suku mingi, amu aye ti lo ahon na ni.

²⁹Baa ye so Nzapa abata ti ku na azo ti sioni laa, ye so Nzapa aleke ndali ti ala laa!