Read sango Job 22 Bible Online

Job 22 - sango bible

Job 22

¹Elifaz, zo ti kodro ti Teman amu tënë si lo tene:

²Nzapa alingbi ti wara ye na lege ti zo? Aye so zo ayeke sara, ayeke mu ye gi na zo ni wani tongana lo sara ye na ndara.

³Tongana mo sara ye mbirimbiri, nzoni ye ti nyen laa lo so ngangu ti lo ahon angangu kue ayeke wara na peko ni nyen? Tongana sarango ye ti mo ayeke mbirimbiri, nyen laa lo yeke wara daa, nyen?

⁴Tongana lo pika mo, lo gue na mo na ngbanga, mo baa ti mo, mo tene, lo sara ni ndali ti so mo kpe mbeto ti lo?

⁵Lo pika mo, ngbanga ti so mo sara sioni mingi si asioni ti mo ayeke hunzi pepe.

⁶Ndali ti boon so ayeke na li ti amba ti mo, mo yeke gbu ka aye ti ala senge senge; gi oko bongo so ala yeke na ni, mo yeke mu ni na maboko ti ala.

⁷Zo so nzara ti ngu asara lo, mo yeke mu ka na lo ngu ti nyongo ni pepe; zo so nzara asara lo, mo yeke ke ti mu na lo kobe.

⁸Me mo yeke zia ka azo ti ngangu amu sese ti ambeni zo; azo so ayeke na tere ti azo ti ngangu ni ayeke duti na sese ni.

⁹Mo yeke tumba awali-mua maboko ti ala senge; mo yeke nika anyindu.

¹⁰Ndani laa akuku angoro mo kue si gi hio tongaso, kota mbeto ahon ndö ti mo.

¹¹Ndo avuko awe, mo yeke baa ndo oko pepe; gba ti ngu amene mo kue.

¹²Nzapa ayeke na nduzu, na yayu kâ pepe? Baa atongoro so ayeke na le ti nduzu kâ; ala yeke kâ yongoro.

¹³Tongaso mo tene: “Nzapa alingbi ti hinga nyen? Lo lingbi ti fâ ngbanga ti e na peko ti ambinda so avuko vukongo so?

¹⁴Ambinda ni ayeke tongana bongo so akanga le ti Nzapa; lo yeke baa ye oko pepe na ndembe so lo yeke fono ti ngoro tere ti yayu.”

¹⁵Mo ye ti mu ngbene lege so azo ti sioni amu ando so?

¹⁶A mu ala, ahon na ala kozoni si lango ti ala alingbi; ala yeke tongana gere ti da so kota ngu amu, ahon na ni.

¹⁷Azo ni ayeke tene na Nzapa: “Zia e kpoo! Lo so ngangu ti lo ahon angangu kue so, nyen laa lo lingbi ti sara na e, nyen?”

¹⁸Andaa lo laa lo sara si da ti ala asi singo na mosoro. Ayeke nzoni mbi tara mara ti sarango ye ti azo ti sioni so oko pepe.

¹⁹Azo ti mbirimbiri ayeke baa tingo ti azo ti sioni si tere ti ala ayeke nzere. Zo so tënë ayeke na li ti lo pepe, fade lo yeke he azo ti sioni ni hengo.

²⁰Ala tene: “Baa, azo ti kengo e ayeke daa mbeni pepe; wâ agbi aye so kue ala zia.”

²¹Tongaso, leke songo ti mo na Nzapa; sara si siriri aduti na popo ti mo na lo si fade mo yeke duti nzoni.

²²Ye so Nzapa wani afa na mo, yeda na ni; bata tënë ti lo na be ti mo.

²³Tongana mo kiri na mbage ti lo so ngangu ti lo ahon angangu kue, fade lo yeke zia mo na ndo ti mo. Me ye ti sioni, mo zia yongoro na da ti mo.

²⁴Bi lôro ti mo na sese, lôro ti mo ti nzoni ni, bi ni na popo ti atêne ti kete ngu

²⁵si fade lo so ngangu ti lo ahon angangu kue ayeke ga lôro ti mo na gba ti nginza ti mo.

²⁶Tongaso, fade mo yeke wara ngia ti mo na lege ti Nzapa so ngangu ti lo ahon angangu kue, mo lingbi ti yo le ti mo na mbage ti lo.

²⁷Tongana mo sambela lo, fade lo yeke ma mo; tongaso mo yeke sara gi ye ti peko ti zendo so mo mu so.

²⁸Ye so mo leke na be ti mo ti sara, fade ayeke ga nzoni, ndo ayeke vuru na lege so mo yeke hon daa.

²⁹Tongana ambeni zo awoko, mo lingbi ti tene na ala: “Ala londo!” Biani, azo so asara tere ti ala kete, Nzapa ayeke soo ala.

³⁰Azo so tënë ayeke na li ti ala pepe, lo yeke zi ala na ya ti ye ti sioni. Tongana maboko ti mo avuru, fade lo yeke zi mo.