Read sango Job 24 Bible Online

Job 24 - sango bible

Job 24

¹Nzapa so ngangu ti lo ahon angangu kue, ngbanga ti nyen si lo bata mbeni lango ti fango ngbanga pepe? Lango so lo ga ti sara na kua ti lo, ngbanga ti nyen si azo so ahinga lo abaa ni pepe?

²Azo ayeke nzi yanga ti yaka ti amba ti ala; ala yeke nzi anyama si ala wani ayeke bata ni.

³Ala yeke mu lele ti nyindu ti hon na ni; ala yeke gbu bagara ti wali-mua na yongo titene lo futa mbeni ye si a kiri na lo bagara ni.

⁴Ala yeke tumba awayere na tere ti lege; ti azo ti mawa kue ti kodro, ye so angba na ala ayeke gi ti honde tere ti ala.

⁵Ala yeke tongana alele ti ngonda so ayeke na benyama; na kota ndaperere, ala yeke gue na kua, ala yeke gi kobe na ya ti ngonda ndali ti amolenge ti ala.

⁶Ala yeke fâ pere na yaka, ala yeke ro ale ti vinye so angba na peko ti azo ti sioni.

⁷Na bi, ala yeke lango tere ti ala senge, ngbanga ti so ala yeke na bongo pepe. Tongana de asara, ala yeke na balangeti pepe.

⁸Ngu-Nzapa so apika na ndö ti ahoto apika ala; ala duti na gbe ti kota têne, ngbanga ti so ndo titene ala bata tere ti ala daa ayeke pepe.

⁹A yeke gboto nyindu na yanga ti me; a yeke gbu zo ti mawa na ngangu ti futa yongo so ayeke na li ti lo.

¹⁰A yeke gbu lo na ngangu ti tambula tere ti lo senge, bongo na tere ti lo pepe. Na nzara na ya ti lo, lo yeke yo gba ti ale ti kobe.

¹¹Na ya ti gbagba ti ambeni zo, lo yeke pete mafuta ti olive; lo yeke pete le ti vinye, me lo lingbi ti nyon ni kete pepe.

¹²Na ya ti kodro, azo ayeke dema tere ti ala; azo so awara ka ayeke dekongo, me Nzapa akanga mê ti lo na ndö ti aye ti mbana so.

¹³Azo ti sioni ake tënë ti kota lâ, lege so ndo avuru daa, ala hinga ni pepe; ala yeke tambula daa pepe.

¹⁴Zo ti fango zo ayeke londo na kota ndaperere, lo yeke fâ zo ti mawa na wayere. Na bi, lo ga zo ti nzi.

¹⁵Koli ti gingo wali ti zo ayeke ku lakui, lo tene na be ti lo, lo tene: “Zo oko ayeke baa mbi pepe”, lo yeke bi bongo na li ti lo titene azo ahinga lo pepe.

¹⁶Na bi laa zo ti nzi ayeke kungbi yanga ti da. Na kota lâ, lo yeke kanga yanga ti da na ndö ti lo, lo hinga vurungo ndo pepe.

¹⁷Ti azo so kue, ala baa ndaperere tongana ndo so avuko pitipiti; me vukongo ndo aga ye ti tere ti ala si ala yeke sara mbeto ni oko pepe.

¹⁸Me ala amba ti mbi, ala tene: “Ti azo ti sioni, ala yeke hon hio tongana ti so ngu amu zo ahon na lo. Azo ti kodro adeba aye ti azo ni si azo ni akiri ague na yaka ti vinye pepe.

¹⁹Tongana ti so kuru sese na ndo-wâ ayeke mene ngu ti pere, ndo ti akuâ ayeke mene azo ti siokpari.

²⁰Be ti amama ti dungo ala ayeke girisa ala, azo ni ayeke ga nzoni kobe ti angusu. Be ti azo ayeke girisa na ala biani biani; sioni sarango ye ti ala ahunzi awe tongana keke so akungbi.

²¹Ye ni asi, ngbanga ti so awali so alingbi ti du pepe so, azo ti sioni asara pasi na ala; ala sara nzoni be na awali-mua pepe.

²²Me Nzapa ayeke na ngangu ti tumba asioni makonzi. Tongana lo londo, ala hinga atene, ala yeke ngba na fini pepe.

²³Andaa Nzapa azia lege na ala ti duti kpoo; me le ti lo ayeke na ndö ti sarango ye ti ala.

²⁴A mu ala na nduzu gi na ya ti kete ngoi; na pekoni, ala yeke daa mbeni pepe. Ala ti tongana pere so a fâ ni na sese, ala hole tongana ale ti kobe so a fâ ni.”

²⁵Ye ni ayeke tongaso pepe? Zo wa laa alingbi ti tene, mbi tene mvene, zo wa? Zo wa laa alingbi ti bere tënë ti mbi, zo wa?