Read sango Job 26 Bible Online

Job 26 - sango bible

Job 26

¹Job amu tënë si lo tene:

²Zo so ayeke na ngangu pepe so, taa lege ti mungo maboko na lo laa? Zo so ngangu ti lo ahunzi awe, mo hinga ti soo lo biani ma!

³Zo so ayeke na ndara pepe, mo hinga ti mu wango na lo-een! Mo hinga ti fa hingango ye ti mo na ndo kue-een!

⁴Me atënë ti mo ni, mo tene na zo wa? Zo wa laa azia atënë ni na yanga ti mo si mo yeke tene so?

⁵Yongoro na gbe ti kota ngu-ingo, nga na aye so kue ayeke na ya ni, kâ na ndo ti akuâ, aye kue ayeke do na mbeto.

⁶Ndo ti akuâ ayeke polele na le ti Nzapa; *kota du so alinda mingi so, mbeni ye ti honde ni na le ti lo ayeke daa pepe.

⁷Lo laa lo gbara le ti nduzu na mbage ti Banga na ndö ti ndo so ye ayeke daa pepe. Lo mu plase na sese, gbe ni angba senge.

⁸Lo kanga ngu-Nzapa na ya ti ambinda; lo kanga lege na nengo ti ngu-Nzapa ti koro ambinda ni.

⁹Lo honde mbata ti lo ti gbia, lo gbara mbinda na ndö ni.

¹⁰Lo suru ye *kerebende na tere ti kota ngu-ingo, na ndo so vurungo ndo na vukongo ndo atengbi tere daa.

¹¹Tongana Nzapa asuku, agere ti yayu ayeke yingi, ala yeke do na mbeto.

¹²Na lege ti ngangu ti lo, lo suru ya ti kota ngu-ingo; na lege ti hingango ndo ti lo, lo kinda Rahab, sioni nyama ti ngu.

¹³Pupu ti yanga ti lo abalee ayayu, maboko ti lo akpo kota ngbo so akpe ti hon.

¹⁴So gi mbage ti akua ti lo laa si e ma tënë ni gi kete so. Me akota ye so lo sara asungba tongana bekpa; zo wa laa alingbi ti hinga nda ni, zo wa?