Read sango Job 27 Bible Online

Job 27 - sango bible

Job 27

¹Job angba ti tene atënë so aso be ti lo, lo tene:

²Mbi deba na iri ti Nzapa so ayeke na fini! Lo laa lo ke ti fâ ya ti ngbanga ti mbi na legeni. Mbi deba na iri ti lo so ngangu ti lo ahon angangu kue! Lo laa lo sara si vundu asi singo na be ti mbi.

³Tongana mbi ngba ti wu, tongana pupu ti Nzapa angba na du ti hon ti mbi,

⁴fade mbi yeke tene tënë ti handango zo laoko pepe; tënë ti mvene ayeke sigigi na yanga ti mbi oko pepe.

⁵Mbi lingbi ti tene na ala laoko pepe, mbi tene, tënë ti ala ayeke na legeni. Ngbii mbi kui na ni, mbi yeke ngba ti tene, mbi sara sioni oko pepe.

⁶Mbi ngba ti luti ngangu na ndö ti tënë ti mbi, mbi tene: sarango ye ti mbi ayeke mbirimbiri. Mbi yeke kiri na peko pepe: Na be ti mbi, mbi baa sioni ye oko na li ti mbi pepe.

⁷Wato ti mbi laa alingbi ti baa pasi tongana ti zo ti sioni; zo so alondo ti ke mbi laa alingbi ti baa pasi tongana ti zo ti sarango sioni.

⁸Nyen laa sioni zo azia be ti lo ti ku tongana Nzapa azi fini ti lo?

⁹Tongana ye ti ngangu asi na lo, fade Nzapa ayeke ma dekongo ti lo?

¹⁰Fade lo yeke wara ngia ti lo na lege ti lo so ngangu ti lo ahon angangu kue? Fade lo yeke iri Nzapa lakue?

¹¹Mbi yeke fa na ala kota ye so Nzapa ayeke sara, tënë ti be ti lo so ngangu ti lo ahon angangu kue, mbi yeke honde ni na ala pepe.

¹²Ala kue, ala baa ye ni na le ti ala awe; ngbanga ti nyen si ala ngba ti tene asenge senge tënë tongaso?

¹³Baa, ye so Nzapa abata ti ku na zo ti sioni laa; ye so lo so ngangu ti lo ahon angangu kue ayeke mu na zo ti sarango ngangu na amba ti lo laa:

¹⁴Tongana lo du gba ti amolenge, fade ala yeke kui kue na ya ti bira; kobe ayeke tia *ahale ti lo.

¹⁵Azo ti lo so angba na fini, sioni kobela ti bubango kodro ayeke fâ ala kue, awali-mua ti ala ayeke toto kuâ ti ala pepe.

¹⁶Ataa ala bongbi nginza tongana fuku ti sese, ataa ala bongbi bongo gbani gbani tongana potopoto,

¹⁷zia ala bongbi ni ma! Fade zo ti mbirimbiri laa ayeke yu abongo ni; zo so tënë ayeke na li ti lo pepe laa, nginza ni ayeke ga ti lo.

¹⁸Da ti zo ti sioni akpengba pepe; awoko tongana kpangba ti sanziri.

¹⁹Kozo titene lo lango, lo yeke na gba ti mosoro; me so tanga ni laa. So lo zi le ti lo, ye oko angba pepe.

²⁰Kota mbeto ayeke hon ndö ti lo, tongana ngu so asuku amu zo ahon na lo. Na bi, kota pupu ayeke mu lo, ahon na lo.

²¹Pupu ti To ayeke yo lo na nduzu, ahon na lo yongoro; pupu ni ayeke gboto lo na ngangu na ndo ti lo si ayeke hon na lo.

²²Nzapa ayeke tokua ale ti kokora na tere ti zo ti sioni; lo yeke baa mawa ti lo pepe. Lo sara kue ti kpe na maboko ti zo ti bingo ale ti kokora ni.

²³Azo ayeke pika maboko na tingo ti lo; na ndo so lo yeke lani daa, azo ayeke huru yanga ti ala.