Read sango Job 28 Bible Online

Job 28 - sango bible

Job 28

¹Taa-tënë, ndo ti zingo wen ti nginza na gbe ti sese ayeke daa; ndo ti sukulango lôro titene aga nzoni ayeke daa.

²A yeke zi wen na ya ti sese; a yeke kporo atêne si kuivre asigigi daa.

³Azo ti gingo mosoro ti gbe ti sese amu lamba ti gi mosoro ni na ndo so avuko pitipiti, ngbii na gbe ti sese kâ.

⁴Azo ni azi du yongoro na kodro, na ndo so azo alingbi ti si daa pepe. Ala kanga kamba na tere ti ala si ala yeke hon mbage na mbage, na ndo so azo alingbi ti baa ala pepe.

⁵Na ndö ti sese, kobe ayeke sigigi daa; me na gbe ni, mo baa mo tene, wâ abuba ni kue.

⁶Na ya ti atêne ti gbe ti sese laa, zo ayeke wara safir; zo ayeke wara nga fuku ti lôro daa.

⁷*Angoalo ahinga lege ti gbe ti sese ni pepe; le ti akota ndeke abaa ni laoko pepe.

⁸Asioni nyama ti ngonda ado lege ni pepe; ataa bamara ahon daa pepe.

⁹Me azo asara kua na tere ti ngangu têne, ala de ahoto ngbii asi na gere ni.

¹⁰Na ya ti atêne, azo akoro gba ti lege; amosoro kue ti ngangu ngere, ala baa na le ti ala.

¹¹Ala kanga lege na ngu ti sua na ya ti adu ni; ala mu ye so angba na gbe mingo, ala sigigi na ni na kota lâ.

¹²Me Ndara, zo ayeke wara ni na ndo wa? Hingango ndo alondo na ndo wa?

¹³Azo ahinga taa ngere ti lo pepe; na popo ti azo so angba na fini, a yeke wara nga lo pepe.

¹⁴Kota ngu-ingo atene: “Ndara ayeke na ya ti mbi pepe.” Gbe ti kota ngu-ingo atene: “Lo yeke na ndo ti mbi pepe.”

¹⁵Zo alingbi ti mu ngbongboro lôro ti vo na Ndara pepe; zo alingbi ti mu gba ti nginza ti vo na ni pepe.

¹⁶Ngere ti lôro ti Ofir, kota ngere ti kornaline wala ti safir alingbi na ti Ndara pepe.

¹⁷Ataa lôro, ataa têne so ayeke baa ndo na ya ni, ngere ti ala alingbi na ti Ndara pepe; zo alingbi nga ti mu kangu ti lôro ti vo na ni pepe.

¹⁸Âdu ti atêne ti korayi na ti kristal, e tene tënë ni pepe; ngere ti Ndara ahon ngere ti lenge.

¹⁹Ngere ti topaze ti Etiopii alingbi nga na ngere ti Ndara pepe; ataa lôro ti nzoni ni, ngere ti lo alingbi na ti Ndara pepe.

²⁰Me Ndara alondo ti lo na ndo wa? A yeke wara Hingango ndo na ndo wa?

²¹Ndara ahonde tere ti lo na le ti azo so kue angba na fini; andeke ti nduzu alingbi ti baa lo pepe.

²²Kuâ nga na ndo ti akuâ atene: “Biani, e ma sango ti lo mango.”

²³Me Nzapa laa ahinga lege so Ndara alondo daa si aga; lo laa lo hinga ndo so Ndara ayeke daa.

²⁴Lo laa lo yeke baa ndo ngbii asi na nda ti sese kue, le ti lo ayeke na ndö ti aye so kue ayeke na gbe ti yayu.

²⁵Lo laa lo mu ngangu na pupu, lo haka konongo ti ngu.

²⁶Lo lu ndia ndali ti ngu-Nzapa, lo suru lege na bekpa so ayeke toto.

²⁷Na ngoi so laa, Nzapa abaa Ndara si lo gonda ni, lo baa ni kpoo si lo gi ya ni.

²⁸Na pekoni, lo tene na azo, lo tene: “Kpengo mbeto ti *Kota Gbia, baa ndara ni laa! Kpengo siokpari, baa hingango ndo laa!”