Read sango Job 29 Bible Online

Job 29 - sango bible

Job 29

¹Job angba ti tene atënë so aso be ti lo, lo tene:

²Ae! Alango so mbi yeke ando daa so, zo wa laa ayeke kiri na mbi kâ, zo wa? Ngoi so Nzapa ayeke bata ando mbi so, zo wa laa ayeke kiri ti mu ni na mbi, zo wa?

³Lamba ti lo ayeke za na ndö ti mbi si lumiere ti lo afa na mbi lege na ya ti vukongo ndo.

⁴Na ngoi ni so, mbi ga kangba awe; songo ti Nzapa ayeke bata da ti mbi.

⁵Nzapa so ngangu ti lo ahon angangu kue ayeke lani na mbi; amolenge ti mbi ti koli angoro mbi kue;

⁶amosoro ti mbi ayeke gbani gbani tongana ngu ti *bale, du ti mbi so mbi yeke pete ale ti olive daa, mafuta ayeke sigigi daa tongana akete ngu.

⁷Tongana mbi yeke gue lani na ndo so azo ayeke leke ka tënë daa, tongana mbi zia mbata ti mbi na be ti kodro,

⁸amaseka so abaa mbi ayeke gboto tere ti ala yamba; ambakoro ayeke londo, aluti na nduzu.

⁹Akota zo ti kodro ayeke kai tënë ti ala; tënë ayeke hunzi na yanga ti ala.

¹⁰Amakonzi ayeke tene tënë na nduzu mbeni pepe, tënë ahunzi na yanga ti ala.

¹¹Azo so ayeke ma mbi ayeke gonda mbi, atene: “Ti lo nzoni!” Azo so ayeke baa mbi ayeke tene nzoni tënë ti mbi.

¹²Biani, wayere so adekongo, mbi yeke soo lo; nyindu so zo ti mungo maboko na lo ayeke daa pepe, mbi yeke mu maboko na lo.

¹³Azo so aga nduru ti kui ayeke sara tufa na ndö ti mbi; mbi yeke zia ngia na be ti awali-mua.

¹⁴Sarango ye ti mbirimbiri ayeke tongana bongo ti mbi ti yungo ni; sarango ye na legeni ayeke tongana kota bongo ti de, wala kpoto ti yungo ni.

¹⁵Mbi yeke le ndali ti waziba, gere ndali ti zo ti bubango gere.

¹⁶Mbi yeke babâ ti azo ti mawa; mbi yeke baa nda ti tënë ti awande mbirimbiri.

¹⁷Mbi yeke kungbi pembe ti azo ti kirikiri; ye so ala gbu, mbi yeke gboto ni na yanga ti ala.

¹⁸Mbi tene na be ti mbi, mbi tene: “Lango ti fini ti mbi ayeke duti gbani gbani tongana le ti mbutu si mbi yeke kui na ya ti da ti mbi.

¹⁹Mbi yeke tongana keke so agunda ni ague, awara ngu. Na bi, ngu ti pere aduti na ndö ti maboko ti keke ni.

²⁰Azo ayeke kiri ti ne mbi; mbi yeke kiri ti wara fini ngangu tongana ti kokora so a gboto ya ni.”

²¹Na ngoi ni kâ, azo ayeke ma tënë ti mbi, ala yeke ku mbi, ala yeke duti kpoo ti ma wango ti mbi.

²²Tongana tënë ti mbi ahunzi awe, zo ti dengo kite ni ayeke daa pepe. Tënë ti mbi ayeke ti oko oko na ndö ti ala.

²³Ala yeke ku mbi tongana ti so zo ayeke ku ngu-Nzapa. Ala zi yanga ti ala ti ku tongana ti so sese ayeke ku akozo ngu-Nzapa.

²⁴Ala yeke baa gi ndö ti le ti mbi ti gi ti hinga wala mbi yeke sara nzoni be na ala. Tongana mbi he ngia na ala, ala baa ti ala atene, mbi yeke handa ala.

²⁵Mbi yeke duti na li ti ala tongana makonzi, mbi yeke fa na ala lege titene ala tambula daa. Mbi yeke duti na popo ti ala tongana gbia so aduti na popo ti aturugu ti lo, tongana zo so ayeke de be ti azo ti mawa.