Read sango Job 31 Bible Online

Job 31 - sango bible

Job 31

¹Mbi na le ti mbi, e use kue, e deba titene mbi baa maseka-wali na nzara ni pepe.

²Tongana ye ni ayeke fade tongaso pepe, ka nyen laa Nzapa abata na nduzu kâ ndali ti mbi nyen? Ka nyen laa lo so ngangu ti lo ahon angangu kue, aleke na nduzu kâ ndali ti mbi?

³Azo ayeke tene: “Ye ti vundu ayeke ndali ti azo ti kirikiri; ye ti ngangu ayeke ndali ti azo ti sarango sioni.”

⁴Ti Nzapa, lo yeke baa sarango ye ti mbi pepe? Lo yeke diko peko ti gere ti mbi pepe?

⁵Mbi yeke tambula ka na lege ti mvene? Mbi yeke gue hio hio ti handa azo?

⁶Ayeke nzoni Nzapa azia mbi na ndö ti kilo so ayeke mbirimbiri; fade lo yeke hinga lo tene, tënë ayeke na li ti mbi pepe.

⁷Tongana mbi zia nzoni lege so lo suru, tongana be ti mbi amu peko ti ye so le ti mbi abaa na nzara ni, tongana maboko ti mbi andu mbeni ye ti sioni,

⁸ayeke nzoni mbeni zo nde ate kobe so mbi lu; ayeke nzoni azo agboto akete keke so mbi lu!

⁹Tongana mbi sara fade nzara ti mbeni wali si mbi luti na hondengo ni na yanga-da ti mba ti mbi,

¹⁰ayeke nzoni wali ti mbi anika ale ti kobe na mbeni koli nde; ayeke nzoni awande alango na lo!

¹¹Tongana mbi sara fade ye tongaso, ka ayeke ye ti sioni mingi, ka ayeke ye so wafango-ngbanga ayeke fâ ngbanga ndali ni.

¹²Ka sioni ti mbi ayeke tongana wâ so agbi mbi ngbii asi na ndo ti akuâ; wâ ni ayeke buba aye so kue mbi wara.

¹³Tongana zo ti kua ti mbi ti koli wala ti wali awara tënë na mbi, mbi yeke baa tënë ti ala na legeni lakue.

¹⁴Tongana ye ni ayeke fade tongaso pepe, ka mbi yeke sara tongana nyen na ndembe so Nzapa ayeke londo ti fâ ngbanga ti mbi? Ka tënë ti nyen laa mbi yeke kiri na ni na lo na ndembe so lo yeke gi nda ti tënë ni?

¹⁵Lo so lo sara mbi na ya ti mama ti mbi, lo laa lo sara nga ala pepe? Gi oko Nzapa so laa asara e na ya ti mama ti e.

¹⁶Laoko mbi ke ti mu ye na awayere? Le ti wali-mua aku mbi gbaa?

¹⁷Mbi te kobe ti mbi gi mbi oko si mbi ke ti kangbi ni na nyindu?

¹⁸Na maseka ti mbi ngbii asi fadeso, mbi bata molenge so babâ ti lo akui tongana taa molenge ti mbi. Lakue mbi yeke mu wango na wali-mua.

¹⁹Zo ti mawa so ayeke na bongo pepe, wayere so ayeke na balangeti pepe, mbi baa ala si mbi zia ala tere ti ala angba senge?

²⁰Andaa mbi mu na ala bongo ti sara si tere ti ala amu wâ, bongo so a sara ni na kua ti tere ti ataba ti mbi; si na pekoni, ala mu singila na mbi.

²¹Laoko mbi yoro maboko na le ti nyindu, ngbanga ti so mbi hinga, mbi tene, mbeni zo ti mu mbage ti mbi na le ti ngbanga ayeke daa?

²²Tongana mbi sara fade ye tongaso, ayeke nzoni ndö ti maboko ti mbi azi na ya ti bio ni si peko ti maboko ti mbi akungbi!

²³Biani, mbeto titene Nzapa atokua kpale na ndö ti mbi asara mbi mingi; nilaa mbi sara ni pepe. Mbi kpa ti luti na dawa ti gonda ti lo ti sara mara ti ye tongaso?

²⁴Mbi zia be ti mbi na ndö ti lôro? Wala mbi tene na lôro ni: “Mo laa mo yeke bata mbi”?

²⁵Mbi wara ngia ndali ti gba ti mosoro so mbi yeke na ni? Wala ndali ti aye mingi mingi so mbi wara?

²⁶Tongana mbi baa zango ti lâ si nze atambula pendere pendere,

²⁷be ti mbi ahanda mbi ndali ti aye ni so? Mbi baa ala tongana anzapa si mbi voro ala?

²⁸Tongana mbi sara fade sioni ye tongaso, ka wafango-ngbanga alingbi ti fâ ngbanga na li ti mbi; ka mbi ke Nzapa so ayeke na nduzu kâ awe.

²⁹So aye ti ngangu asi na wato ti mbi so, tere ti mbi anzere ndali ni? So ye ti mawa awara lo so, mbi dodo na ngia ndali ni?

³⁰Âdu tënë ti dengo ba na ndö ti lo titene lo wara kuâ, ti mbi, mbi gbanzi yanga ti mbi ti sara mara ti siokpari tongaso.

³¹Azo so kue mbi yamba ala na da ti mbi, atene: “Na ndo ti lo, zo wa laa ate nyama, ya ti lo asi pepe, zo wa?”

³²Laoko wande alango na gigi pepe, yanga ti da ti mbi ayeke lakue na zingo ni ndali ti azo so ayeke tambula na lege.

³³Azo mingi ayeke honde sioni ti ala si ala yeke bata ni na hondengo ni na ya ti be ti ala. Mbi sara tongana ti ala?

³⁴Laoko mbeto ti lutingo na le ti gba ti azo asara mbi pepe. Ataa asewa ahe mbi na ngia, so laa azia mbeto na be ti mbi pepe; so laa akanga yanga ti mbi ti tene tënë pepe, so laa agbanzi mbi na yanga-da pepe.

³⁵Ae! Tongana mbeni zo ti mango mbi ayeke fade daa! So tanga ti tënë ti mbi laa! Nzapa so ngangu ti lo ahon angangu kue, fadeso ayeke ngoi ti lo ti kiri tënë na mbi! Âdu ti mbeti so wato ti mbi ade na tere ti mbi na ngbanga,

³⁶fade mbi yeke yo ni na ngia na ndö ti go ti mbi; mbi yeke zia ni na li ti mbi tongana kpoto ti gbia.

³⁷Biani, apeko ti gere ti mbi kue, fade mbi yeke fa peko ni na Nzapa si mbi yeke gue na mbage ti lo tongana makonzi.

³⁸Laoko ayaka adema tere ti ala ndali ti mbi? Sese ti ayaka ni ayeke na mbeni tënë ti bi na li ti mbi?

³⁹Mbi te akobe ni senge senge? Mbi sara ye na awa ti ayaka ni na legeni pepe?

⁴⁰Tongana ye ni ayeke tongaso, ayeke nzoni akeke ti ki asigigi na plase ti *ble; afungo pere asigigi na plase ti *orze. Atënë ti Job ahunzi na ndo so.