Read sango Job 33 Bible Online

Job 33 - sango bible

Job 33

¹Fadeso, Job, ma tënë so mbi ga ti tene na mo; dingi mê ti mo, mo ma atënë ti mbi kue.

²Baa, mbi zi yanga ti sara tënë, tënë ni ayeke na li ti menga ti mbi.

³Tënë so ayeke na legeni na be ti mbi, mbi ye ti tene na mo; mbi yeke tene na mo gi taa-tënë.

⁴Yingo ti Nzapa laa asara mbi; Nzapa so ngangu ti lo ahon angangu kue, pupu ti yanga ti lo laa amu fini na mbi.

⁵Tongana mo kpa, kiri tënë na mbi ma, leke tere ti mo, mo ke tënë ti mbi, e baa!

⁶Mbi na mo kue, e yeke legeoko na le ti Nzapa; mbi nga, a sara mbi na potopoto ti sese.

⁷Tongaso, mo sara mbeto ti mbi pepe; mo do na mbeto na dawa ti mbi pepe. Mbi ye ti sara ngangu na ndö ti mo pepe.

⁸Tënë so mo tene so, mbi ma ni awe, tënë ni angba ti toto na mê ti mbi:

⁹“Fini ti mbi ayeke na legeni, mbi sara siokpari oko pepe. Mbi sara sioni oko pepe, tënë ayeke na li ti mbi pepe.

¹⁰Me Nzapa asigigi na tënë ti li ti lo ti bi na li ti mbi, lo baa mbi tongana wato ti lo.

¹¹Lo kanga gere ti mbi na zingiri; aye so kue mbi yeke sara, le ti lo gi na ndö ni.”

¹²Me mbi ye ti tene na mo, mbi tene: tënë ti mo ayeke na legeni pepe. Biani, Nzapa ayeke kota mingi ahon zo.

¹³Mo gi tënë na Nzapa ngbanga ti nyen? Aye so kue lo yeke sara, lo lingbi ti fa peko ni na zo?

¹⁴Andaa Nzapa ayeke tene tënë na azo na alege nde nde, me zo ayeke sara hange na ni pepe.

¹⁵Na bi, tongana azo akui na lango na ndö ti gbogbo ti ala, Nzapa ayeke fa ye na ala na lege ti bango-li nga na lege ti ambeni ye tongana bango-li.

¹⁶Lo yeke zi mê ti azo si lo yeke gboto mê ti ala biani biani.

¹⁷Lo ye titene azo azia sioni lege ti sarango ye ti ala; lo ye titene kota zo ake lege ti baba.

¹⁸Tongaso, lo yeke bata fini ti ala si ali na ya ti du ti kuâ pepe, lo yeke gbanzi ala ti mu lege so ague na ndo ti akuâ.

¹⁹Mbeni lâ, Nzapa ayeke fa ye na zo na lege ti kobela, zo ni ayeke lango na gbogbo, tere ti lo ayeke so ngangu si ayeke do dongo, akai pepe.

²⁰Kobe anzere na yanga ti lo pepe; nzoni kobe kue, nzara ni asara lo pepe.

²¹Lo nge mingi, kasa ti tere ti lo ahon kue; abio ti lo kue angba na gigi.

²²Lo ga nduru na du ti kuâ awe; fini ti lo ayeke na ya ti maboko ti ala so ayeke mu kuâ na zo.

²³Me mbeni *ange oko na popo ti ala saki oko alingbi ti duti na tere ti zo ti kobela ni; ange ni ayeke gbu koko ti zo ni si ayeke fa na lo nzoni lege so lo lingbi ti tambula daa.

²⁴Ange ni ayeke baa mawa ti zo ni si lo tene na Nzapa, lo tene: “Zia lege na lo ti zu na ya ti du ti kuâ pepe, mbi wara mbeni ye ti futa ti soo lo na kuâ awe.”

²⁵Tongaso, zo ni akiri awara ngangu ti lo ti kozoni, lo kiri lo ga tongana ti ngoi so lo de maseka.

²⁶Tongana lo sambela, Nzapa ayeke yeda na lo, lo luti na dawa ti Nzapa, lo yeke dekongo na ngia, ngbanga ti so Nzapa azi tënë na li ti lo awe.

²⁷Lo yeke he bia na dawa ti azo kue, lo tene: “Mbi sara siokpari, mbi sara ye so ake ndia, me Nzapa asara na mbi alingbi na sioni so mbi sara so pepe.

²⁸Lo zi mbi si mbi zu na ya ti du ti kuâ pepe, nilaa mbi ngba na fini si mbi yeke baa lumiere so!”

²⁹Baa, ye so kue Nzapa ayeke sara ndali ti zo laa; lo yeke sara ni fani mingi.

³⁰Lo ye ti gboto fini ti zo na ya ti du ti kuâ, tongaso si lumiere ti fini ayeke za na ndö ti lo.

³¹Job, dingi mê ti mo, mo ma mbi; kanga yanga ti mo, tënë ti mbi ade.

³²Tongana mo yeke na mbeni tënë ti kiringo na ni, tene ni, ngbanga ti so mbi ye ti baa so tënë ti mo ayeke na legeni.

³³Tongaso pepe, mo ma mbi. Kanga yanga ti mo, mbi ye ti fa na mo ndara.