Read sango Job 34 Bible Online

Job 34 - sango bible

Job 34

¹Elihu akiri amu tënë si lo tene:

²Ala azo ti ndara, ala ma tënë so mbi yeke tene; ala azo so ahinga ye ti gigi, ala dingi mê ti ala, ala ma mbi.

³Biani, mê ayeke tara tënë tongana ti so yanga ayeke tara nzerengo ti kobe.

⁴Tongaso, kua ti e ayeke ti gi ti hinga ye so ayeke mbirimbiri, ti baa na popo ti e ye so ayeke nzoni.

⁵Tënë so Job atene ayeke so: “Mbi sara sioni pepe, me Nzapa ake ti yeda so mbi yeke mbirimbiri.

⁶Mbi sara ye so ayeke mbirimbiri, me a baa mbi tongana zo ti mvene. Mbi sara siokpari pepe, me lo pika mbi na kota ka ti fâ mbi.”

⁷Mbeni zo ti lingbi na Job ayeke daa? Tenengo abuba tënë na tere ti Nzapa ayeke tongana ngu ti lo ti nyongo ni.

⁸Lo yeke fono na azo ti sarango sioni, lo yeke tambula na azo ti sioni.

⁹Biani, lo tene: “Zo so asara ye ti zia ngia na be ti Nzapa, nyen laa lo yeke wara na peko ni, nyen?”

¹⁰Ala azo so ahinga ndo so, ala ma mbi si! Nzapa alingbi ti sara sioni ye? Lo so ngangu ti lo ahon angangu kue so, lo lingbi ti sara sioni? Oko pepe!

¹¹Me lo yeke futa zo alingbi na ye so zo ni asara; lo yeke sara na zo oko oko alingbi na lege ti dutingo ti lo.

¹²Taa-tënë, Nzapa asara sioni laoko pepe, lo so ngangu ti lo ahon angangu kue, lo yeke fâ ngbanga kirikiri pepe.

¹³Zo wa laa azia lo ti sara komandema na ndö ti sese? Gi lo oko laa dunia ayeke na maboko ti lo.

¹⁴Tongana Nzapa abaa ndo fade gi na lo wani, tongana lo zi fade pupu ti lo na ya ti fini ti azo ndali ti lo wani,

¹⁵ka azo kue akui gi legeoko, ka zo akiri aga fuku ti sese.

¹⁶Job, tongana mo hinga ndo, ma tënë so; dingi mê ti mo, mo ma tënë so mbi yeke tene.

¹⁷Tongana Nzapa ake fade ye so ayeke mbirimbiri, ka lo lingbi ti le-gbia? Nzapa ayeke mbirimbiri, lo so ngangu ti lo ahon kue. Mo kpa ti fâ ngbanga na li ti lo?

¹⁸Zo wa laa alingbi ti tene na gbia: “Buba zo!”, zo wa? Zo wa laa alingbi ti mu akota zo tongana azo ti fango zo, zo wa?

¹⁹Nzapa laa ayeke mu mbage ti amakonzi pepe, lo yeke yamba zo ti mosoro nzoni ahon wayere pepe, ngbanga ti so lo laa lo sara ala use kue.

²⁰Na be ti bi, gi hio tongaso, azo ni akui; azo ti kodro atomboka, a fâ amakonzi. A mingo angangu makonzi, me maboko ti zo laa asara ni pepe.

²¹Biani, le ti Nzapa ayeke baa ndo na ndö ti dutingo ti azo; lo yeke baa peko ti gere ti ala kue.

²²Ataa vukongo ndo, ataa ndo so avuko pitipiti alingbi ti honde azo ti sarango sioni na le ti lo pepe.

²³Titene Nzapa ague na zo na gbe ti ngbanga, lo lingbi ti gi nda ti tënë ti zo ngbii pepe.

²⁴Lo yeke kinda angangu gbia, lo hunda nda ni pepe, lo yeke zia ambeni zo nde na plase ti ala.

²⁵Biani, lo hinga mbirimbiri ye so agbia ni ayeke sara. Gi na bi oko, lo yeke kinda ala; ala laa a nika ala so.

²⁶Lo yeke pika ala na le ti azo kue tongana ti azo ti sarango sioni.

²⁷Lo sara ni, ngbanga ti so azo ni azia ti tambula na peko ti lo, ala ke ti hinga aye so kue lo fa na ala.

²⁸Ala pusu azo ti mawa ti dekongo na Nzapa. Andaa lo ma dekongo ti azo so amba ti ala asara ngangu na ala.

²⁹Me tongana Nzapa akanga maboko aduti, zo wa laa ayeke fâ ngbanga na li ti lo? Tongana lo honde le ti lo, zo wa laa alingbi ti baa lo, zo wa? Andaa lo yeke bata kodro nga na azo.

³⁰Lo ye titene zo ti sioni ale-gbia pepe, zo aleke kuku pepe titene azo ti kodro ati daa.

³¹Me mbeni zo alingbi ti tene na Nzapa: “Pikango mbi ni alingbi awe, mbi yeke kiri ti sara sioni pepe.

³²Asioni so mbi baa pepe so, mo wani, fa ni na mbi. Tongana mbi sara sioni, fade mbi yeke kiri ti sara ni pepe.”

³³Ti be ti mo, alingbi Nzapa apika lo? Mbi hinga, mbi tene, mo yeke kasa ndo kasango. Andaa mo laa mo leke na be ti mo tongaso, me mbi pepe. Tongaso, tënë so ayeke na be ti mo, fa ni.

³⁴Azo so ahinga ndo, ala na azo ti ndara so ama tënë so mbi tene, ala yeke tene:

³⁵“Job ayeke tene tënë, me lo hinga ye so lo yeke tene pepe; nda ti atënë ti lo ayeke daa pepe.

³⁶Lo yeke tene tënë tongana zo ti sioni. Nilaa, alingbi a gi nda ti tënë ti lo mbirimbiri si.

³⁷Biani, na ndö ti siokpari ti lo, lo kiri lo tomboka na tere ti Nzapa. Lo yeke diko gba ti tënë na tere ti Nzapa; lo zia dengo kite na popo ti e.”