Read sango Job 37 Bible Online

Job 37 - sango bible

Job 37

¹Aye ti kpene so asara si be ti mbi ayeke do, be ti mbi aye ti huru ti zia ndo so lo yeke daa.

²Ala ma, ala ma go ti Nzapa so ayeke sungba; ala ma totongo ti go so ayeke sigigi na yanga ti lo.

³Lo tokua awâ ti bekpa ti lo na le ti nduzu kue, ague ngbii asi na nda ti sese kue.

⁴Na pekoni, go ti Nzapa atoto tongana ti bamara, go ti lo ti gbia asungba. Gi so lo dekongo ngangu awe, lo tokua awâ ti bekpa ti lo kue.

⁵Na lege ti go ti lo so asungba, Nzapa ayeke sara aye ti kpene ti lo; lo yeke sara akota ye so e hinga li ti e daa pepe.

⁶Lo yeke mu yanga na *neze: “Ti na ndö ti sese!” Lo yeke zia lege na ngu-Nzapa, nga na kota ngu-Nzapa ti pika ngangu.

⁷Tongaso lo yeke kanga lege na azo ti sara kua ti ala si ala hinga akua so lo yeke sara.

⁸Anyama ti ngonda ayeke li na ya ti du ti ala, ala yeke honde tere ti ala na ndo ti lango ti ala.

⁹Ngangu pupu alondo na mbage ti Mbongo si ayeke ga, de alondo na mbage ti Banga.

¹⁰Na lege ti pupu ti yanga ti Nzapa, *glase abaa gigi si ngu akpengba kpengbango tongana têne.

¹¹Lo sara si ambinda asi singo na ngu; lo zia awâ ti bekpa na ya ti ambinda si lo kangbi ala na ndo kue.

¹²Lo laa lo sara si ala yeke hon mbage na mbage kue ti sara ye so be ti lo aye; ti sara aye so kue lo mu yanga na ala ti sarango ni na ndö ti dunia kue.

¹³Nzapa atokua ala ti pika azo ti ndö ti sese, wala ti fa na ala nzoni be ti lo.

¹⁴Job, dingi mê ti mo, mo ma tënë so kue; gbu li ti mo na ndö ti aye ti kpene so Nzapa asara.

¹⁵Mo hinga lege so Nzapa ayeke mu yanga na aye ni? Mo hinga lege so lo sara si wâ ti bekpa ayeke za na ya ti mbinda?

¹⁶Mo hinga lege so lo zia ambinda si ala yeke ya na le ti nduzu? Mara ti ye ti kpene tongaso ahunda hingango nzoni kode.

¹⁷Ti mo, tere ti mo ayeke mu wâ ngangu na ya ti bongo ti mo na ngoi so pupu ti Mbongo ayeke ga na ndo-wâ na ndö ti sese.

¹⁸Mo kpa zo ti mungo maboko na Nzapa na ngoi so lo gbara ambinda na le ti nduzu? So lo sara si le ti nduzu akpengba kpengbango tongana tatara ti wen so?

¹⁹Fa na mbi ye so e lingbi ti tene na Nzapa! Me ndali ti so e yeke na ya ti vukongo ndo, e hinga tënë so e lingbi ti tene pepe.

²⁰Tongana mbi tene tënë, alingbi mbeni zo atene tënë ni na lo? Alingbi mbeni zo atene sango ni na lo si lo hinga tënë ni?

²¹Mo ye ti baa, e kiri e baa ndo polele pepe; ambinda ahonde le ti lâ, na pekoni, pupu alondo si amu mbinda ni ahon na ni.

²²Mbeni zango ndo tongana lôro alondo na mbage ti Banga aga; mbeni zango ndo so ayeke zia mbeto na be ti zo, angoro tere ti Nzapa.

²³Lo yeke Nzapa so ngangu ti lo ahon angangu kue, e lingbi ti ga nduru na lo pepe. Lo yeke kota na lege ti ngangu ti lo, nga na lege ti mbirimbiri ti lo. Zo ti mbirimbiri, Nzapa ayeke sara pasi na lo pepe.

²⁴Ndani laa, alingbi azo akpe mbeto ti lo; me azo so abaa tere ti ala azo ti ndara, ngbanga ti lo ayeke na ala pepe.