Read sango Job 38 Bible Online

Job 38 - sango bible

Job 38

¹*KOTA GBIA akiri tënë na Job na ya ti ngangu pupu, lo tene:

²Mo so mo yeke tene abuba tënë ti honde aye so mbi leke ti sara, mo yeke ti mo zo wa?

³Mo leke tere ti mo, luti tongana koli! Mbi yeke hunda mo na atënë, fade mo yeke kiri peko ni na mbi.

⁴Na ngoi so mbi zia gere ti sese, mo yeke lani na ndo wa? Mo so mo hinga ye kue so, tene na mbi.

⁵Zo wa laa adiko konongo ti sese? Mo hinga ni? Zo wa laa agboto kamba ti haka na ni?

⁶Angbongboro gere ti sese aluti na ndö ti nyen? Zo wa laa azia kozo têne ti gere ni

⁷na ngoi so atongoro ti ndaperere abongbi yanga oko si ayeke he bia, na ngoi so ala so alango na yayu ayeke dekongo na ngia? Mo hinga ni?

⁸Na ngoi so kota ngu-ingo akporo ti sigigi na ya ti mama ti lo, zo wa laa akanga yanga-da na ndö ti kota ngu-ingo ni?

⁹Mbi laa mbi yu ambinda na tere ni tongana bongo, mbi kanga vuko mbinda na tere ni.

¹⁰Mbi kanga lege matamata na kota ngu-ingo ni, mbi suru maka na tere ni; mbi kanga yanga-da na ndö ni ngangu.

¹¹Mbi tene na lo: “Fade mo ga ngbii mo luti ge; mo yeke hon ndo so pepe! *Amapo ti mo so ayeke sara baba so, ayeke luti ti ala kâ!”

¹²Na ya ti fini ti mo, mo mu yanga fani oko na lâ ti londo awe? Mbeni lâ, mo fa ndo na lâ ti ndaperere ti duti daa?

¹³“Gbu sese na yanga ni, yingi ni tongana konza titene azo ti sioni atuku!” Mbeni lâ mo mu yanga tongaso awe?

¹⁴So ndo ahan, aye ato nda ti sigigi polele; ala sigigi tongana anzoroko so a kpo na tere ti ta ti sese, ala sigigi pendere tongana bongo ti matanga.

¹⁵Ti azo ti sioni, a gbanzi na ala lumiere ti ala; maboko so ala yeke yo na nduzu akungbi awe.

¹⁶Mo gue ngbii mo si na ndo so kota ngu-ingo alondo daa? Mo fono na gbe ti kota ngu-ingo awe?

¹⁷A fa na mo yanga-da ti ndo ti akuâ awe? Mo baa yanga-da ti kodro ti akuâ awe?

¹⁸Mo hinga mbeni tënë na ndö ti konongo ti sese? Tongana mo hinga aye so kue, fa na mbi peko ni.

¹⁹Lumiere asara kodro na mbage wa? Vukongo ndo ayeke duti na ndo wa?

²⁰Mo lingbi ti gi ala na ndo ti ala? Mo hinga lege ti da ti ala?

²¹Mo hinga ni nzoni mingi, ngbanga ti so a du mo ando giriri si lango ti fini ti mo awu ahon ndoni.

²²Mo gue ngbii mo si na ndo so a bata *neze daa? Ndo so a bata *apembe ti bekpa daa, mo baa ni awe?

²³Mbi bata ni ndali ti ngoi ti ye ti vundu, ndali ti ngoi ti tiri nga na ngoi ti bira.

²⁴Ndo so lumiere alondo daa si aga, mo hinga ni? Lege so pupu ti To ahon daa si ayeke ya na ndö ti sese, mo hinga ni?

²⁵Zo wa laa asuru lege na le ti nduzu ndali ti ngu-Nzapa so apika ngangu? Zo wa laa azi lege na mbinda so aga na sungbango ti bekpa?

²⁶Zo wa laa asara si ngu-Nzapa ayeke pika na ndö ti sese so zo ayeke daa pepe; na ndö ti benyama so zo oko ayeke daa pepe so?

²⁷Zo wa laa asara si ngu apika si kuru sese awoko pendere titene pere asigigi si akono?

²⁸Babâ ti ngu-Nzapa ayeke daa? Akete ngu ti pere, zo wa laa adu ala, zo wa?

²⁹Mama wa laa adu *glase? Zo wa laa adu glase so amu ndö ti apere na ngoi ti de?

³⁰Na ngoi ni, ngu akpengba kpengbango tongana têne, le ti ngu ni abongbi aga glase.

³¹Baa bongbi ti atongoro na le ti nduzu: Mo lingbi ti kanga Pleyade ndo oko si mo zi akamba na tere ti Orion?

³²Mo lingbi ti sara si atongoro asigigi na nzoni ngoi? Mo lingbi ti fa lege na Kota Urse nga atongoro ti tere ni?

³³Mo hinga andia ti aye so ayeke na yayu? Mo laa mo yeke sara si andia ni asara kua ti ala nzoni na ndö ti sese?

³⁴Mo laa mo yeke dekongo na ambinda si gba ti ngu atuku na ndö ti mo?

³⁵So awâ ti bekpa ayeke hon na le ti nduzu so, mo laa mo tokua ala? Ala yeke ma yanga ti mo?

³⁶Zo wa laa amu ndara na ibis, zo wa? Zo wa laa amu hingango ndo na koli-kondo, zo wa?

³⁷Zo wa laa alingbi ti diko ambinda na lege ti ndara ti lo si lo tuku ngu so kue a bata na yayu?

³⁸Na ngoi ni so, fuku ti sese aga gba ti potopoto si angbongboro sese agbu tere.

³⁹Mo laa mo yeke gi nyama ndali ti mama ti bamara? Mo laa mo yeke mu kobe na amolenge ti bamara, ala te ya ti ala asi,

⁴⁰na ndembe so ala kuku na ngbonda ti du ti ala, ala honde tere ti ala na ya ti pere ti ku ti gbu mbeni nyama so?

⁴¹Zo wa laa ayeke leke kobe ndali ti *kpakpo tongana amolenge ti lo adekongo na Nzapa, tongana ala woko ngangu, ndali ti so kobe atia ala?