Read sango Job 39 Bible Online

Job 39 - sango bible

Job 39

¹Mo hinga ngoi so angasa ti ngonda ayeke du amolenge ti ala? Mo baa lege so atagba ayeke du amolenge ti ala awe?

²Mo lingbi ti diko nze ti ngo ti ala? Mo hinga lango so ala yeke du na ni?

³Ala yeke kuku si ala du amolenge ti ala, na pekoni, songo ya ti ala akai.

⁴Amolenge ti ala ayeke kpengba, ala yeke kono na ya ti ngonda. Na pekoni, ala hon na tere ti amama ti ala, ala yeke kiri mbeni pepe.

⁵Zo wa laa azi lele ti ngonda si lo yeke fono ti be ti lo so? Zo wa laa azi akamba na tere ti lo?

⁶Mbi sara si ngonda aga ndo ti duti ti lo, sese so ingo ayeke daa aga ndo ti lango ti lo.

⁷Wuluwulu ti agbata, lo yeke he ni hengo; dekongo ti wa ti lo, lo yeke ma ni oko pepe.

⁸Lo yeke tambula na ndö ti ahoto, ndo so lo yeke wara kobe ti lo daa; amara ti fini pere kue, lo yeke gi ni gingo.

⁹Fade ngbä ayeke yeda ti sara kua na mo? Lo yeke lango na ya ti gbagba ti anyama ti mo?

¹⁰Mo lingbi ti kanga lo titene lo fâ yaka ti mo? Fade lo yeke gboto na peko ti mo wen ti dengo ya ti sese na popo-hoto?

¹¹Mo yeke zia be ti mo na ndö ti kota ngangu ti lo titene mo zia kua ti mo na lo?

¹²Mo yeke zia be ti mo na ndö ti lo ti ro ale ti kobe ti mo ti zia ni na ya ti gogoro?

¹³*Naamo ayeke pika akpangi ti lo na ngia, me lo lingbi ti huru tongana sigonye pepe.

¹⁴Naamo ayeke zia para ti lo na ndö ti sese, lo hon, lo yeke zia mbutu amu wâ na para ni.

¹⁵Lo girisa so gere ti zo alingbi ti fâ ni, mbeni nyama ti ngonda alingbi ti do ni.

¹⁶Lo yeke sara ngangu mingi na amolenge ti lo mo baa mo tene, amolenge ti lo laa pepe. Be ti lo agi lo pepe na pasi so lo baa na dungo para senge senge.

¹⁷Ye ni ayeke so, Nzapa ake ti mu na lo ndara, lo mu na lo hingango ndo pepe.

¹⁸Me gi so lo londo ti mu loro, lo yeke he mbarata hengo, na zo ti kpengo na mbarata ni.

¹⁹Mo laa mo mu ngangu na mbarata? Yongoro kua ti ndö ti go ti lo so, mo laa mo zia ni?

²⁰Mo laa mo sara si lo yeke huru tongana gbadola? Toto ti lo ayeke zia mbeto na be ti zo.

²¹Na sokoto ti gere ti lo, lo yeke do sese ti popo-hoto na ngia; lo yeke mu loro na dawa ti aturugu so aga ti tiri na lo.

²²Lo yeke he mbeto hengo, lo yeke sara mbeto ti mbeni ye oko pepe. Na dawa ti yongoro zeme, lo yeke kiri na peko pepe.

²³Bozo ti ale ti kokora, likongo so aza zango nga na yongoro zeme ayeke toto na ndö ti lo.

²⁴So lo ku gbaa, lo huru na loro. Tongana tatalita atoto, lo yeke kanga be ti lo gbaa, lo kpe loro.

²⁵Lakue tongana a huru tatalita, lo yeke dekongo: “Ahaa!” Lo ngba yongoro, lo ma fion ti bira, lo ma dekongo ti amakonzi ti bira, lo ma dekongo ti bira.

²⁶Na lege ti hingango ndo ti mo, mo laa mo sara si fini kua ti tere ti ndeke ti gbungo kondo asigigi si lo huru lo gue na mbage ti Mbongo?

²⁷Mo laa mo yeke mu yanga na *ngoalo ti huru na nduzu, ti gue ti sara da ti lo na ndö ti ahoto?

²⁸Lo yeke duti na ndö ti atêne, lo sara da ti lango ti lo na li ti têne so ayeke ndo ti batango lo.

²⁹Kâ, lo yeke gi ti baa kobe ti lo, le ti lo ayeke baa ni yongoro.

³⁰Amolenge ti lo aye ti nyon mene mingi. Ndo so akuâ ayeke daa, ngoalo ayeke nga daa.