Read sango Job 4 Bible Online

Job 4 - sango bible

Job 4

¹Elifaz, zo ti kodro ti Teman amu tënë si lo tene:

²Tongana mbi gi lege ti tene tënë na mo, fade mo yeke kanga be ti mo? Me zo wa laa alingbi ti kanga yanga ti lo ti tene tënë?

³Baa, mo mu wango na azo mingi; mo hinga lani ti sara si azo so awoko mingi awara ngangu.

⁴Azo so aye ti ti, tënë ti mo amu ala na nduzu; mo sara si likunu so awoko akpengba.

⁵Me fadeso, ye ni asi na mo awe, mo woko kue; ye ni awara mo awe, li ti mo aga kirikiri.

⁶Mo so mo yeke kpe lani mbeto ti Nzapa so, mo lingbi ti zia be ti mo na ndö ti lo pepe? Mo so mo yeke sara lani ye na legeni so, mo lingbi ti zia be ti mo ti ku Nzapa pepe?

⁷Gbu li ti mo si: mbeni zo so tënë ayeke na li ti lo pepe, mo baa laoko lo kui? Azo so ayeke sara ye na legeni so, mo baa laoko a fâ ala awe?

⁸Ti mbi, ye so mbi baa ayeke so: Azo so alu ye ti kirikiri na ala so alu pasi, ye ti kirikiri na pasi laa ala yeke ko lengo ni.

⁹Tongana Nzapa ahuru pupu na ndö ti azo ni, ala yeke kui; tongana sioni ngonzo ti lo alondo, ala hunzi kue.

¹⁰Toto ti ala so akpa ti bamara na ti sioni nyama so, Nzapa akai ni awe; pembe ti ala so akpa ti akete bamara so, lo kungbi ni awe.

¹¹Bamara ni akui, ngbanga ti so kobe ti tengo ni ayeke daa pepe; amolenge ti mama ti bamara ni ahon kirikiri.

¹²Mbeni tënë aga ati na mê ti mbi na hondengo ni; mbi ma mbeni tënë so a tene na gbe ti go.

¹³Ye ni asi na bi, na ndembe so azo ayeke baa li ti ala kirikiri, na ndembe so ala kui na lango.

¹⁴Kota mbeto agbu mbi si tere ti mbi kue ado kpakpakpa.

¹⁵Mbeni pupu ahon na ndö ti le ti mbi, kua ti tere ti mbi alondo.

¹⁶Mbeni zo aluti na dawa ti mbi, me mbi baa lo nzoni pepe; mbeni yingo ti zo aluti na dawa ti mbi. Kozoni, ndo ade ngii, na pekoni, mbi ma go ti zo:

¹⁷“Zo alingbi ti duti mbirimbiri na le ti Nzapa? Zo alingbi ti duti *nzoni na le ti lo so asara lo?

¹⁸Baa, ala so ayeke sara kua na lo, Nzapa azia be ti lo na ndö ti ala pepe; ataa *a-ange ti lo, lo wara tënë ti kirikiri na li ti ala.

¹⁹Lo lingbi ti zia be ti lo na ndö ti azo tongana nyen? Azo so a mu sese si a sara na ala so, azo so ayeke fuku ti sese so si a yeke nika ala nikango tongana angungu so!

²⁰Ti londo na ndaperere, ade ti si na lakui pepe, a nika ala awe, ala kui biani biani, tënë ni aso zo oko pepe.

²¹Kamba so ayeke bata ala na fini afâ awe, ala kui, me ade ala wara ndara pepe.”