Read sango Job 41 Bible Online

Job 41 - sango bible

Job 41

¹Tongana mbeni zo abaa ti lo, atene, ni lingbi ti hon ndö ti Leviatan, andaa lo handa tere ti lo wani. Gi na bango lo, zo ayeke ti na sese.

²Buba zo wa laa alingbi ti gi yanga ti lo? Âdu ti mbi, zo wa laa alingbi ti gbu le ni na mbi, zo wa?

³Zo wa laa boon ti lo ayeke na li ti mbi so mbi lingbi ti kiri ni na lo? Aye so kue ayeke na ndö ti sese, ayeke ti mbi.

⁴Ti ambage ti tere ti sioni nyama ni, na kota ngangu ti lo nga na pendere ti tere ti lo, mbi yeke kanga yanga ti mbi daa pepe.

⁵Zo wa laa alingbi ti suru bongo ti lo na mbage ti dawa? Zo wa laa alingbi ti hon na popo ti amolongo use ti pembe ti lo?

⁶Zo wa laa agbu lo na ngangu si azi ngbangba ti lo? Na dawa ti gba ti apembe ti lo, azo kue ayeke do na mbeto.

⁷Gba ti molongo ti *avala ayeke na ndö ti peko ti lo; avala ni agbu tere ngangu, ali ya ti tere.

⁸Avala ni oko oko agbu tere ngangu, pupu alingbi ti hon na popo ti ala pepe.

⁹Vala oko oko agbu tere na mba ti lo, ala kue agbu tere ngangu, a lingbi ti kangbi popo ti ala pepe.

¹⁰Tongana nyama ni angasi, wâ ayeke sigigi, le ti lo ayeke za tongana lâ ti kota ndaperere.

¹¹Awâ ti bekpa ayeke sigigi na yanga ti lo, ale ti wâ ayeke sigigi mbage na mbage.

¹²Guru ayeke sigigi na du ti hon ti lo tongana ti so ayeke sigigi na ya ti tawa wala na ya ti kota tawa so ayeke kporo na ndö ti wâ.

¹³Pupu ti yanga ti lo alingbi ti sara si wâ aza; amenga ti wâ ayeke sigigi na yanga ti lo.

¹⁴Ngangu ti lo ayeke na go ti lo so akpengba kpengbango; na dawa ti lo, kota mbeto ayeke gbu azo kue.

¹⁵Poro ti ya ti lo agbu tere gbungo, akpengba tongana wen, ayeke yingi oko pepe.

¹⁶Kate ti lo akpengba tongana têne, akpengba tongana têne ti nikango na ye.

¹⁷Tongana lo londo, mbeto ayeke sara amakonzi, kota mbeto asara si ala kpe kirikiri.

¹⁸Tongana a kpo lo na yongoro zeme, ayeke li lo pepe; ataa kete likongo, ataa kota likongo wala le ti kokora ayeke sara ye oko na lo pepe.

¹⁹Lo yeke baa wen tongana holengo pere, bengba wen tongana fungo keke.

²⁰Lo yeke kpe ale ti kokora pepe; ti lo, têne so a bi na *mvingi ayeke tongana holengo pere.

²¹Lo yeke baa kota nengo keke tongana mbeni holengo pere; toto ti alikongo so ayeke hon, lo yeke he ni hengo.

²²Aye tongana afango ta so yanga ni aza zango ayeke na gbe ti ya ti lo, ayeke suru ya ti potopoto tongana wen ti dengo ya ti sese.

²³Gi so lo li na ya ti ngu, ngu ni ayeke kporo kporongo; lo yeke sara si kota ngu-ingo akpa ndo so a yeke zö dukani daa.

²⁴Lo yeke zia na peko ti lo mbeni lege so ayeke za zango, kota ngu so alinda mingi aga tongana kua ti li ti mbeni mbakoro.

²⁵Na ndö ti sese, mbeni nyama ti lingbi na lo ayeke daa pepe; a sara lo titene lo sara mbeto ti ye oko pepe.

²⁶Anyama so akono, ayo, lo yeke kpe mbeto ti ala oko pepe; lo yeke gbia ti angangu nyama kue.