Read sango Job 5 Bible Online

Job 5 - sango bible

Job 5

¹Fadeso mo dekongo maa! Mbeni zo ti kiri tënë na mo ayeke daa? Na popo ti *a-ange, lo so wa laa mo yeke gue na mbage ti lo?

²Biani, songo be laa ayeke fâ zo ti buba; zo so li ti lo ayeke daa pepe, kota be ayeke fâ lo.

³Taa-tënë, mbi baa so dutingo ti mbeni zo ti buba ayeke nzoni mingi; me hio tongaso, mbi deba ndo ti lango ti lo, mbi tene:

⁴“Amolenge ti lo ti koli, alingbi zo oko amu maboko na ala pepe. Na le ti ngbanga, zo oko agbu koko ti ala pepe si awafango-ngbanga anika ala nikango.

⁵Ale ti kobe ti lo so lo fâ so, alingbi azo so nzara ahon ndö ti ala ate ni kue! Ataa so lo sara gbagba ti aki na tere ni, fade azo ni ayeke ga ti zi akobe ni kue! Amosoro ti lo, alingbi azo so ayeke na nzara ti aye mingi amu ni kue!”

⁶Biani, ye ti sioni ayeke londo na ya ti sese si asigigi pepe; pasi ayeke sigigi na ya ti yaka pepe.

⁷Me a du zo titene lo baa pasi tongana ti so kua ti akete kete le ti wâ ayeke ti hurungo na nduzu nzerrr.

⁸Âdu fade mbi, ka mbi yeke kpe na mbage ti Nzapa; tënë ti mbi, mbi yeke fa na lo.

⁹Lo yeke sara kota ye so zo agi nda ni gbaa; lo yeke sara aye ti kpene so zo alingbi ti diko wungo ni pepe.

¹⁰Lo yeke sara si ngu-Nzapa apika na ndö ti sese kue; lo yeke tokua ngu-Nzapa na ndö ti ayaka.

¹¹Lo yeke mu asenge zo na nduzu; azo so ayeke na ya ti mua, lo yeke zi ala na ya ti mua ni titene ala wara ngia.

¹²Azo so ayeke sara ye na sioni mayere, lo yeke buba pialo ti ala. Ye so ala ye ti sara, ala ha gbaa.

¹³Nzapa ayeke gbu azo ti ndara na lege ti sioni mayere ti ala; azo ti mvene, lo yeke kinda hio tënë ti be ti ala.

¹⁴Na kota lâ, ala tengbi na vukongo ndo; na bekombite, ala yeke tatara ndo, mo baa mo tene, bi laa.

¹⁵Me zo so be ti lo awoko, Nzapa asoo lo na maboko ti azo ni; lo zi wayere na maboko ti azo ti ngangu.

¹⁶Fadeso, zo so ayeke na ngangu pepe, lo lingbi ti zia be ti lo ti ku ye ti nzoni; zo so ayeke sara sioni, yanga ti lo akanga.

¹⁷Biani, ti lo nzoni, zo so Nzapa agboto mê ti lo! Tongaso, lo so ngangu ti lo ahon angangu kue, mo ke pika ti lo pepe.

¹⁸Nzapa ayeke zia ka na tere ti zo, lo laa lo yeke kanga ka ni; lo yeke pika zo, lo laa lo yeke sara si tere ti zo aga nzoni.

¹⁹Fani mingi aye ti ngangu ayeke si na mo, me lo yeke zi mo na ya ni; ti hunzi na ni, lo yeke sara si sioni akiri ti wara mo pepe.

²⁰Na ngoi ti nzara, lo yeke soo mo na kuâ; na ngoi ti bira, lo yeke zi mo na yanga ti yongoro zeme.

²¹Fade sioni yanga ti azo ayeke sara ye oko na mo pepe; tongana sioni ye ti bubango kodro asi, mbeto ayeke sara mo pepe.

²²Tënë ti ye ti bubango kodro, tënë ti nzara, fade mo yeke he ni hengo na ngia; asioni nyama ti ngonda, sara mbeto ti ala pepe!

²³Biani, mo na atêne ti yaka aga *ambuki; mo na asioni nyama ti ngonda asara songo.

²⁴Fade mo yeke duti na siriri na ya ti da ti mo; tongana mo gue ti baa ndo so anyama ti mo ayeke te pere daa, ye oko ayeke girisa pepe.

²⁵Mo yeke baa so *ahale ti mo ayeke ga mingi; amolenge ti mo ayeke wu tongana pere ti ngonda.

²⁶Mo yeke ngba na ngangu ngbii mo kui na ni; mo yeke ngba na ngangu tongana gba ti *ble so a kanga ni na ngoi ti fango ale ti kobe.

²⁷Baa ye so e gi nda ni laa! Ye ni ayeke tongaso. Mo ma ni si mo mu ni ndali ti fini ti mo!