Read sango Job 6 Bible Online

Job 6 - sango bible

Job 6

¹Job amu tënë si lo tene:

²Ae! Mbi ye fade mingi titene a haka pasi ti mbi; a zia na kilo aye ti vundu so asi na mbi!

³Fade ayeke ne ahon mbutu ti akota ngu-ingo. Ndani laa mbi yeke tene tënë kirikiri so.

⁴Biani, Nzapa so ngangu ti lo ahon angangu kue akpo mbi na ale ti kokora ti lo; sioni yoro ti yanga ti ale ti kokora ni alinda na ya ti tere ti mbi. Aye so Nzapa ayeke tokua ti zia mbeto na be ti azo aleke tere ti tiri bira na mbi.

⁵Laoko lele ti ngonda atoto na tere ti fini pere? Bagara atoto na tere ti kobe ti lo?

⁶Kobe so nzerengo ni ayeke daa pepe, tongana a zia ingo daa pepe, zo alingbi ti te ni? Vuru ya ti para-kondo so ade ti to ni pepe, nzerengo ni ayeke daa?

⁷Mbi ye ti tara amara ti kobe so pepe. Pasi ti mbi aga tongana mbeni kobe so asara si be ti mbi aye ti londo.

⁸Ye so mbi hunda so, zo wa laa ayeke mu na mbi, zo wa? Ye so mbi zia be ti mbi ti ku so, ayeke nzoni Nzapa amu ni na mbi.

⁹Tongana Nzapa aye, lo nika mbi ma! Ayeke nzoni lo yoro maboko ti lo, lo fâ mbi biani!

¹⁰Tongaso si be ti mbi ade nga kete, mbi dodo na ngia na ya ti pasi ti mbi so ayeke hunzi pepe so, ngbanga ti so mbi buba atënë ti Nzapa laoko pepe, Nzapa so ayeke nde si ayeke nzoni kue.

¹¹So ngangu ayeke na mbi mbeni pepe so, mbi zia be ti mbi ti ku ngbanga ti nyen? So fini ti mbi ayeke hunzi hunzingo so, mbi ngba na fini ngbanga ti nyen?

¹²Ngangu ti mbi ayeke ngangu ti têne? Tere ti mbi ayeke bengba wen?

¹³Mbeni ye oko titene mbi ku ni ayeke daa laa? Aye ti mungo maboko na mbi kue atia awe?

¹⁴Zo so awoko kue, alingbi mba ti lo abaa mawa ti lo; tongaso pepe, zo ni ayeke ke ti kpe mbeto ti lo so ngangu ti lo ahon angangu kue.

¹⁵A-ita ti mbi ahanda mbi tongana ngu so ahole holengo; ala yeke tongana *bale so ngu ayeke daa pepe.

¹⁶Tongana ngoi ti ngu-Nzapa aga nduru ti hunzi, bale ni ayeke suku.

¹⁷Me na ngoi ti buru, ngu ayeke daa pepe; tongana ndo amu wâ, bale ni ahole kasakasa.

¹⁸Azo so ayeke tambula na benyama azia lege, ala li ti gi ngu; me so ala wara ngu ni pepe, ala girisa si ala kui kâ.

¹⁹Azo ti kodro ti Tema so ayeke tambula na benyama abaa ndo ti gi ngu ni na le ti ala; azo ti kodro ti Saba so ayeke tambula na lege azia be ti ala ti ku ngu ni.

²⁰Me kamene asara ala, ngbanga ti so ala zia be ti ala na ndö ti ngu ni; na ndembe so ala si kâ, kamene ahon ndö ti ala.

²¹Fadeso ala kpa gi angu ni! Ala baa kpale so asi na mbi si kota mbeto agbu ala.

²²Laoko mbi hunda mbeni ye na ala? Mbeni lâ, mbi tene na ala, mbi tene: “Ala mu mbage ti amosoro ti ala

²³titene a zi mbi na maboko ti wato? Wala titene a vo mbi na maboko ti azo ti sarango sioni?”

²⁴Ala fa na mbi ye ni si mbi kai. Sioni ti nyen laa mbi sara?

²⁵Tenengo taa-tënë ayeke so be ti zo? Me ala suku na mbi ndali ti nyen?

²⁶Tënë ti yanga ti mbi laa ala yeke suku na mbi ngbanga ni? Tënë ni asigigi na yanga ti zo so ye ahon ndö ti lo; ala baa ni tongana tënë so ahon na ya ti pupu?

²⁷Ala bi ye ti hinga nyindu wa laa ala ye ti ka lo, taa mba ti ala, ala ye ti ka lo!

²⁸Ala baa le ti mbi si! Mbi yeke tene mvene na ala?

²⁹Tongaso ala kiri, ala baa mbi mbirimbiri, ala diko tënë ti kirikiri na tere ti mbi pepe. Ala kiri, fade ala yeke hinga atene, mbi sara sioni oko pepe.

³⁰Mbeni tënë ti mvene ayeke na yanga ti mbi? Mbi hinga ye so iri ni vundu pepe?