Read sango Job 7 Bible Online

Job 7 - sango bible

Job 7

¹Fini ti zo na ndö ti sese so ayeke ngangu mingi. Alango ti lo ayeke tongana alango ti azo so a gbu ala na ngangu ti sara kua.

²Zo ayeke tongana ngbaa so ayeke na le ti lâ si lo yeke gi gbe ti de; lo yeke tongana senge zo ti kua so ayeke ku futa ti lo.

³Fini ti mbi nga ayeke tongaso. Nze na nze, fini ti mbi ayeke gi senge senge. Bi na bi, mbi yeke baa gi pasi.

⁴Gi so mbi lango kete, mbi yeke tene: “Ndo ayeke han lawa si mbi londo?” Bi ni ayo mingi si mbi ti kâ, mbi ti ge na ndö ti gbogbo ngbii ndo ahan.

⁵Tere ti mbi kue gi na angusu nga na le ti ka so akpa fuku ti sese; poro ti tere ti mbi asuru gi na ka, sanzo ayeke sigigi daa.

⁶Alango ti mbi ahon hio hio tongana navete ti wasarango-bongo; tongana kamba ni ahunzi, navete ni ayeke luti. Legeoko fini ti mbi ayeke hunzi, mbeni ye titene mbi zia be ti mbi ti ku ayeke daa pepe.

⁷Nzapa, dabe ti mo so fini ti mbi ayeke gi pupu senge; le ti mbi ayeke kiri ti baa ye ti nzoni pepe.

⁸Mo so lani mo yeke baa mbi, mo yeke kiri ti baa mbi pepe; tongana le ti mo ayeke gi mbi, mbi yeke daa mbeni pepe.

⁹Tongana ti so mbinda ahon si agirisa, zo ayeke gue gi tongaso na ndo ti akuâ, lo lingbi ti londo kâ ti sigigi pepe.

¹⁰Lo yeke kiri na da ti lo mbeni pepe; ndo so lani lo yeke lango daa, azo ni akiri ti hinga lo pepe.

¹¹Ndani laa, mbi lingbi ti kanga yanga ti mbi pepe. Ataa vundu ayeke na be ti mbi, mbi yeke tene tënë; ataa be ti mbi aso mingi, mbi yeke dema tere ti mbi.

¹²Mbi yeke kota ngu-ingo wala kota sioni nyama ti ngu-ingo si mo yeke baa ndo na tere ti mbi tongaso?

¹³Tongana mbi gue ti lango, mbi yeke tene: “Fade lango ayeke de be ti mbi, bi ayeke kai demango tere ti mbi.”

¹⁴Me mo yeke zia mbeto na be ti mbi na lege ti asioni bango-li; mo yeke zia kota mbeto na be ti mbi na lege ti aye so mo fa na mbi.

¹⁵Mbi ye fade titene mo pete go ti mbi; mbi ye fade kuâ ahon titene abio ti mbi kue angba na gigi.

¹⁶Ye ni ahon ndoni awe! Mbi yeke ngba na fini lakue lakue pepe. Zia mbi, mbi kui. Biani fini ti mbi ayeke gi pupu senge.

¹⁷Zo ayeke nyen si mo yeke mu ngoi ti mo ndali ti lo? Ngbanga ti nyen laa mo yeke baa ndo na ndö ti lo tongaso?

¹⁸Ndali ti nyen si lakue na ndaperere, mo yeke ga na tere ti lo si na ngoi kue, mo yeke tara be ti lo?

¹⁹Lawa laa mo yeke zia ti *bembe mbi? Lawa laa mo yeke zia mbi ti mene ngu ti yanga ti mbi?

²⁰Mo so mo yeke bembe zo so, tongana mbi sara siokpari, siokpari ni asara nyen na mo? Mo yeke gi peko ti mbi, ti pika mbi ngbanga ti nyen? Mbi ga kungba na ndö ti mo?

²¹Mo lingbi ti kanga be ti mo na siokpari ti mbi pepe? Mo lingbi ti zi sioni na li ti mbi pepe? Fadeso mbi ga nduru ti lango tongana kuâ na ya ti fuku ti sese. Tongana mo gi mbi, mbi yeke daa mbeni pepe.