Read sango Abia (Psaumes) 10 Bible Online

Abia (Psaumes) 10 - sango bible

Abia (Psaumes) 10

¹*KOTA GBIA, ngbanga ti nyen si mo ngba yongoro kâ? Ngbanga ti nyen si mo honde tere ti mo na ngoi ti ye ti ngangu?

²Zo ti sioni ayeke te azo ti mawa na mbana, kamene agbu le ti lo pepe. Ala ti na ya ti ye ti mayere so zo ti sioni ni aleke so.

³Zo ti sioni ni apika kate ti lo ndali ti aye so nzara ni ayeke na be ti lo; so lo wara aye ni awe, lo zonga KOTA GBIA, lo he lo na ngia.

⁴Na lege ti baba ti lo, zo ti sioni ayeke hunda tere ti lo pepe. Ti be ti lo, lo tene: “Nzapa ayeke daa lawa!”

⁵Aye so kue lo yeke sara aga nzoni lakue; fango ngbanga ti mo Nzapa ayo na nduzu kâ mingi, ayeke sara ye oko na lo pepe. Lo baa awato ti lo kue tongana mbumbuse ye.

⁶Lo tene na be ti lo, lo tene: “Nyen laa ayeke sara mbi, nyen? Mbeni ye ti sioni ayeke si na mbi laoko pepe.”

⁷Atënë ti yanga ti lo asi singo na tënë ti dengo ba, tënë ti mvene nga na tënë ti sarango ngangu na zo. Atënë ti yanga ti lo ayeke sara pasi na sioni na zo.

⁸Lo yeke honde tere ti lo na peko ti kete kodro; Na hondengo ni, lo yeke fâ zo so asara sioni pepe. Le ti lo ayeke gi zo so ayeke na ngangu pepe.

⁹Lo honde tere ti lo ngangu tongana bamara na ya ti pere; lo honde tere ti lo ti gbu zo ti mawa; lo gbu lo, lo gboto lo na gbanda ti lo.

¹⁰Lo lango na sese, lo yeke hara; na pekoni, zo so ayeke na ngangu pepe ati na ya ti maboko ti lo.

¹¹Lo tene na be ti lo: “Nzapa agirisa tënë ni awe; lo kanga le ti lo awe, lo baa ye laoko pepe.”

¹²KOTA GBIA, londo! Nzapa, sara mbeni ye maa! Ayeke nzoni mo girisa azo ti mawa pepe.

¹³Ngbanga ti nyen si zo ti sioni ayeke he mo? Ngbanga ti nyen si lo tene na be ti lo, lo tene: “Mo yeke hunda ande peko ti tënë ni na mbi pepe.”

¹⁴KOTA GBIA, mo baa ye kue: mo yeke baa azo so ayeke baa pasi na azo ti mawa; mo ye ti mu tënë ti ala na maboko ti mo. Zo so ayeke na ngangu pepe, lo zia be ti lo kue na ndö ti mo; mo laa mo yeke mu maboko na nyindu.

¹⁵Mo buba ngangu ti zo ti sioni. Tongana mo gi peko ti ye ti sioni so lo sara, fade mo yeke wara ye oko pepe.

¹⁶KOTA GBIA ayeke gbia kpu na kpu; amara nde angba na ya ti kodro ti lo mbeni pepe.

¹⁷KOTA GBIA, mo ma ye so azo so asara tere ti ala kete aye; mo mu ngangu na be ti ala, mo zi mê ti mo, mo ma ala.

¹⁸Nyindu na zo so a sara ngangu na lo, mo yeke fâ ngbanga ti ala na legeni. Tongaso si mbeni zo na ndö ti sese so akiri anika mba ti lo pepe.